ඉන්දීය සුපිරි නළු ෂාරුක් ඛාන් අගෝස්තු මස 02 වන දින ශ්‍රී ලංකාවට පැමිණීමට නියමිතය. ඒ කොළඹ City of Dreams Sri Lanka ව්‍යාපෘතිය නිල වශයෙන් විවෘත කිරීම සඳහායි. City of Dreams Sri Lanka ඒ පිළිබඳව නිකුත් කළ නිවේදනය පහතින්.

මේ අතරතුර ෂාරුක් ඛාන් පෙර පුහුණුවීම් සඳහා කොළඹට පැමිණ සිටින බව දක්වමින් හුවමාරු වන ඡායාරූපයක් FactSeeker අවධානයට යොමු විය. මෙම ඡායාරූපය සජීවීකරණය කොට සකස් කළ වීඩියෝවක් ද FactSeeker ට හමුවිය. එමෙන්ම එම ඡායාරූපය ෂාරුක් ඛාන් සම්බන්ධ වෙනත් පුවතක් වාර්තා කිරීමේදී ඡායාරූපයක් ලෙස යොදාගත් පුවත් වෙබ් අඩවි ද අපට හමු විය.

අදාළ ඡායාරූපයේ ඇතැම් පළකිරීම්වල එය කෘත්‍රිම බුද්ධිය භාවිතයෙන් නිර්මාණය කර ඇති බවටත්, එහි යම් දෝෂ සහිත තැන් ගැනත් අදහස් පළ කර තිබිණි.

FactSeeker එම ඡායාරූපය සමීපව පරීක්ෂා කිරීමේදී නාම පුවරුව අසල ඇති මාර්ග සලකුණ විකෘති වී ගොස් ඇති ආකාරය නිරීක්ෂණය විය. එමෙන්ම “OF DREAMS MBOBO” යනුවෙන් නාම පුවරුවේ ඇති නමෙහි අක්ෂර වින්‍යාසය වැරදි බව ද, සැබෑ නාම පුවරුවේ එම නම දැක්වෙන්නේ “CITY OF DREAMS SRI LANKA” ලෙස බව ද අපට තහවුරු විය.

මෙම ඡායාරූපය කෘත්‍රිම බුද්ධිය මගින් නිර්මාණය කළ අන්තර්ගතයන් හඳුනාගැනීමේ මෙවලම් හරහා කළ පරීක්ෂාවේදී ද එය AI නිර්මාණයක් බව තවදුරටත් සනාථ විය.

ඒ අනුව, පෙර පුහුණුවීම් සඳහා කොළඹට පැමිණ සිටින ෂාරුක් ඛාන් ලෙස හුවමාරු වන ඡායාරූපය කෘත්‍රිම බුද්ධිය යොදාගෙන නිර්මාණය කළ ඡායාරූපයක් බව FactSeeker තහවුරු කරයි.