බැරුක් ඔබාමා මහතා මාර්ගය අසල ඇති කුරුම්බා අලෙවි කරන ස්ථානයක් අසල සිට කුරුම්බා ගෙඩියක් පානය කරන අයුරු එම ඡායාරූපයේ දැක්වේ. බැලු බැල්මට එම ඡායාරූපයේ පසුබිම ලංකාවේ පරිසරයට සමාන බවක් පෙන්වයි.

“කවුරුත් දන්නේ නැහැ එයා ඇවිත් ගිහින්” ලෙස සටහනක් සමඟින් එම ඡායාරූපය සමාජ මාධ්‍යයේ හුවමාරු කර ගෙන ඇත.

හිටපු ඇමරිකානු ජනාධිපති බැරැක් ඔබාමා මහතා ලංකාවට පැමිණි බවට ලංකා රජයෙන් ප්‍රකාශයක් සිදුකර නොතිබුණු අතර මේ සම්බන්ධයෙන් සොයා බැලීමට Factseeker  ඔබාමාගේ නිල සමාජ ගිණුම් පරීක්ෂා කළ අතර එවැනි කිසිදු සඳහනක් එම සමාජ මාධ්‍ය ගිණුම්වල අන්තර්ගත කර නොතිබුණි.

මේ හේතුවෙන් අදාළ ඡායාරූප Google reverse image search හරහා සොයා බැලුවිට එම ඡායරූප බැරැක් ඔබාමා මහතා 2017 වසරේ ඉන්දුනීසියාවේ නිවාඩුවක් ගත කිරීමට පැමිණි අවස්ථාවේදී ගත් ඡායාරූප බව තහවුරු විය.  ජාත්‍යන්තර මාධ්‍ය මෙන්ම ඔබමා පවුලේ නිල සමාජ මාධ්‍ය ගිණුම්වලද එය පළකර තිබේ.

ඒ අනුව බැරක් ඔබාමා හොර රහසේම ලංකාවට පැමිණි බවට සඳහන් වෙමින් හුවමාරු වන සමාජ මාධ්‍ය සටහන් අසත්‍ය බව Factseeker තහවුරු කරයි.