මෙම වසර අගදී පැවැත්වීමට නියමිත ජනාධිපතිවරණය සම්බන්ධයෙන් ද මේ වන විට සමීක්ෂණ වාර්තා නිකුත් වෙන්නට පටන් ගෙන තිබේ.

මේ අතර සරණාගතයින් පිළිබද එක්සත් ජාතීන්ගේ ශ්‍රී ලංකා මහ කොමසාරිස් කාර්යාලය (UNHCR) නිකුත් කළ සමීක්ෂණ වාර්තාවක් ඊයේ (14) සමාජ මාධ්‍ය වේදිකාවල හුවමාරු වෙමින් පැවැතිණි.

සරණාගතයින් පිළිබද එක්සත් ජාතීන්ගේ මහ කොමසාරිස් කාර්යාලයේ නිල මුද්‍රාව සහිත ලිපි ශීර්ෂයක පිටු 28 කින් සමන්විත වාර්තාවක් මෙලෙස හුවමාරු වෙමින් පැවැතිණි.

“UNHCR Sri lanka වාර්තාව පැයක් යන්නටත් කලින් ලීක් වෙයි. 2024 සජිත් ට ජය.මාලිමාව 339% ක ඡන්ද වර්ධනයක්.මිලියන දෙකකට වැඩි ඡන්දදායකයින් සමීක්ෂණයට.පොහොට්ටුව බිද වැටෙයි.” යනුවෙන් අරගල නිවුස් නැමැති සමාජ මාධ්‍ය පිටුවක සදහන් කර තිබිණි.

මෙම වාර්තාව විශ්ව විද්‍යාල සිසුන් 330 දෙනෙක් දින 20 ක් තුළ කළ සමීක්ෂණයක් බවත් සෑම දිස්ත්‍රික්කයකම සෑම මැතිවරණ කොට්ඨාශයක් ම නියෝජනය කරමින් ජනතා අදහස් ලබා ගෙන ඇති බව සදහන් කර ඇත.

මෙම වාර්තාවට අනුව පෙන්වා දෙන්නේ, ඉදිරි ජනාධිපතිවරණයේදී සමගි ජන බලවේගයේ නායක සජිත් ප්‍රේමදාස වැඩිම ඡන්ද ප්‍රතිශතය වන සියයට 36.31 ක් ලබා ගන්නා අතර ශ්‍රී ලංකා පොදුජන පෙරමුණ සියයට 34.53 ක් ලබා ගන්නා බවයි. වත්මන් ජනාධිපති රනිල් වික්‍රමසිංහ මෙහිදී සියයට 16.35 ක ඡන්ද ප්‍රතිශතයක් ලබා ගනිමින් තෙවැනි ස්ථානයට පත් වන අතර ජාතික ජන බලවේගය සියයට 10.59 ප්‍රතිශතයක් ලබා ගනිමින් සිව් වැනි ස්ථානයට පත් වන බව සදහන් කර ඇත.

හුවමාරු වන මෙම සමීක්ෂණ වාර්තාව සත්‍ය වාර්තාවක් ද? යන්න පිළිබදව Fact seeker නිරීක්ෂණයක යෙදුනෙමු.

මෙහිදී සරණාගතයින් පිළිබද එක්සත් ජාතීන්ගේ මහ කොමසාරිස් කාර්යාලයේ නිල වෙබ් අඩවිය, මුහුණු පොත ඇතුළු නිල සමාජ මාධ්‍ය ගිණුම් පරීක්ෂා කළ අතර එහි කිසිදු වේදිකාවක එවැනි වාර්තාවක් සදහන් කර නොතිබුණි.

එමෙන්ම සමාජ මාධ්‍ය හරහා හුවමාරු වන ඉහත සමීක්ෂණය එක්සත් ජාතීන්ගේ මානව හිමිකම් කවුන්සිලයේ ශ්‍රී ලංකා කාර්යාලය විසින් සිදු නොකළ බව ත් එය සම්පූර්ණයෙන් ව්‍යාජ වාර්තාවක් බවත් ඔවුන් සිය නිල ‌‌‌‌මුහුණු පොතේ පළ කර තිබිණි.

ඒ අනුව සරණාගතයින් පිළිබද එක්සත් ජාතීන්ගේ මහ කොමසාරිස් කාර්යාලය ඉදිරි ජනාධිපතිවරණය සම්බන්ධයෙන් සමීක්ෂණ වාර්තාවක් ප්‍රකාශයට පත් කර නැති බව Fact seeker තහවුරු කරයි.