හිටපු ජනාධිපතිවරුන්ගේ වරප්‍රසාද අහෝසි කිරීමත් සමග හිටපු ජනාධිපති රණසිංහ ප්‍රේමදාසගේ බිරිඳ වන හේමා ප්‍රේමදාස විසින් වත්මන් ජනාධිපතිවරයා වෙත යොමු කරනු ලැබූ ලිපියක් සමාජ මාධ්‍ය ඔස්සේ සංසරණය වන බව FactSeeker හට නිරීක්ෂණය විය.

හිටපු ජනාධිපතිවරුන්ගේ හිමිකම් ඉවත්කිරීමේ පනත සම්මත වූ නිසා ඇය මේ වන තෙක් රුදී සිටි නිවසින් ඉවත්වීමට සිදු වූ බැවින් ජීවිතයේ සැදෑ සමය ගත කිරීමට සුදුසු කොළඹ අවට පිහිටි නිවසක් ලබා දෙන මෙන් මෙම ලිපිය හරහා වත්මන් ජනාධිපතිවරයාගෙන් ඉල්ලීමක් කර ඇත.
දැනට තමාට හෝ තම පවුලට ‍කොළඹ අවට හෝ වෙනත් ප්‍රදේශයක ජීවත් වීම සඳහා සුදුසු නිවසක් නැති අතර නිවසක් ගැනීම සඳහා මූල්‍යමය ශක්තියක් ද තමාට නැති බව එම ලිපිය මගින් හේමා ප්‍රේමදාස අවධාරණය කර ඇත.
මෙම ලිපිය සම්බන්ධයෙන් මතු වූ සැකය නිසා හේමා ප්‍රේමදාස විසින් මෙවැනි ලිපියක් ජනාධිපති අනුර කුමාර දිසානායකට යවා ඇති ද? යන්න පිළිබඳව Factseeker කරුණු පරීක්ෂා කළේ ය.
හිටපු ජනාධිපති රණසිංහ ප්‍රේමදාසගේ වැන්ඳඹු බිරිඳ වශයෙන් හේමා ප්‍රේමදාසට රජයෙන් දී තිබූ නිවස 2023.03.31 වන දින රජයට නැවත පවරා දී ඇති බව කළ සොයා බැලීමේදී අනාවරණය විය. ඒ අනුව ඇය මේ විට රජයේ නිවසක පදිංචි වී නොසිටින බව තහවුරු විය.
https://www.facebook.com/share/p/17CiJpdqW8/

එසේ නම් මේ ලිපියේ සදහන් වන්නේ කිනම් නිවසක්ද ? යන්න සම්බන්ධයෙන් FactSeeker සොයා බැලීය.
ඒ අනුව අපි විපක්ෂ නායක සජිත් ප්‍රේමදාස ගේ කාර්යාලයෙන් කළ විමසීමකදී ඔහුගේ මාධ්‍ය ලේකම්වරයෙක් ප්‍රකාශ කළේ, මෙම ලිපිය සාවද්‍ය බවත් ඇය ර‍ජයේ නිල නිවසක පදිංචි වී නොසිටින බවත් ය.එමෙන්ම ඇය මේ වන විට කොළඹ විජේරාම මාවතේ පිහිටි ඇගේ පෞද්ගලික නිවසේ පදිංචිව සිටින බවත් ඔහු සදහන් කළේය.

මේ සම්බන්ධයෙන් ජනාධිපති මාධ්‍ය අංශයෙන් කළ විමසීමේදී ජනාධිපති මාධ්‍ය අංශයේ අධ්‍යක්ෂක ජනරාල්වරයා පවසා සිටියේ හේමා ප්‍රේමදාස සදහා එවැනි නිල නිවසක් මේ වන විට නොමැති බවත් ඇයට හිමිව තිබූ මෝටර් රථය ද මේ වන විට භාර දී ඇති බවත්ය.

ඒ අනුව හේමා ප්‍රේමදාසගේ නම සඳහන් ලිපි ශීර්ෂයක තමාට කොළඹ අවටින් නිවසක් ලබාදෙන මෙන් වත්මන් ජනාධිපතිවරයා වෙත යොමු කර ඇති බව සදහන් ලිපිය ව්‍යාජ ලිපියක් බව FactSeeker තහවුරු කරයි.