දෙහිවල සත්තු වත්තේ දිනුම් ඇදීමක් සිදු වෙනවාද?
දෙහිවල ජාතික සත්වෝද්‍යානයෙන් ජීවිත කාලයටම ප්‍රවේශපත් ලබා දෙන බව පවසමින් ප්‍රචාරය කරන "ශ්‍රී ලංකා ජාතික සත්වෝද්‍යානය/Dehiwala Zoo" යන ෆේස්බුක් ගිණුම ව්‍යාජ බවත් එවැනි ප්‍රවේශපත් ලබා දීමක් සිදු නොවන බවත් FactSeeker කරුණු පරීක්ෂා කර තහවුරු කරයි.
by Anonymous |
ජූනි 25, 2025
දෙහිවල ජාතික සත්වෝද්‍යානයෙන් ජීවිත කාලයටම ප්‍රවේශපතක් ලබා දෙන බව සඳහන් කරමින් සමාජ මාධ්‍ය හරහා සංසරණය වන සටහනක් FactSeeker නිරීක්ෂණය කළේ ය.
මෙම පෝස්ටුව “ශ්‍රී ලංකා ජාතික සත්වෝද්‍යානය/Dehiwala Zoo” යන නමින් පවත්වාගෙන යනු ලබන ෆේස්බුක් ගිණුමක් හරහා සමාජගත කොට තිබුණි.
එහි සඳහන් අන්දමට පුද්ගලයින් පස්දෙනෙකු සඳහා මෙම ප්‍රවේශපත් පිරිනැමෙන අතර එම දිනුම් ඇදීම සඳහා එම පෝස්ටුවට “සුභ උපන්දිනයක්” යනුවෙන් අදහස් තීරුවේ සටහන් කළ යුතුය. බොහෝදෙනෙක් මීට එලෙසින්ම සටහන් තබා තිබුණි.
මේ සම්බන්ධයෙන් ජාතික සත්වෝද්‍යාන දෙපාර්තමේන්තුවේ සත්ව සෞඛ්‍ය සහ පෝෂණය පිළිබඳ ක්‍රියාකාරි අධ්‍යක්ෂ දුෂාන්ති ධම්මිකා දසනායකගෙන් FactSeeker කළ විම්සීමේදී එවැනි ප්‍රවේශපත්‍ර ලබාදීමක් සිදු නොවන බව සඳහන් කළාය.
එසේම මේ සමබන්ධයෙන් ජාතික සත්වෝද්‍යාන දෙපාර්තමේන්තුවේ හා දෙහිවල සත්වෝද්‍යානයේ නිල ෆේස්බුක් පිටුව හරහා දැනුම් දීමක් කර ඇති බව ද සඳහන් කළා ය. තවදුරටත් අදහස් දක්වමින් ඇය ප්‍රකාශ කළේ, මේ හරහා මූල්‍යමය වංචාවන් ද සිදුවන බැවින් මේ පිළිබඳව අපරාධ පරීක්ෂණ දෙපාර්තමේන්තුවට ද පැමිණිල්ලක් ඉදිරිපත් කළ බවයි.
ඒ අනුව දෙහිවල ජාතික සත්වෝද්‍යානයෙන් ජීවිත කාලයටම ප්‍රවේශපත් ලබා දෙන බව පවසමින් “ශ්‍රී ලංකා ජාතික සත්වෝද්‍යානය/Dehiwala Zoo” යන ෆේස්බුක් ගිණුම ව්‍යාජ බවත් එවැනි ප්‍රවේශපත් ලබා දීමක් සිදු නොවන බවත් FactSeeker තහවුරු කළේය.
