ජර්මානු ෆෙඩරල් ජනරජයේ නිල සංචාරයක නිරතව සිටින ජනාධිපති අනුර කුමාර දිසානායක පිළිගැනීමේ උත්සවය, ජර්මානු ජනාධිපති ෆ්‍රෑන්ක්-වෝල්ටර් ස්ටයින්මියර්ගේ (Frank-Walter Steinmeier) ප්‍රධානත්වයෙන් ඊයේ (11) පස්වරුවේ බර්ලිනයේ බෙල්වීව් මන්දිරයේ (Bellevue Palace) දී පැවැත්විණි.
එහිදී ජර්මානු ත්‍රිවිධ හමුදා උත්තමාචාර සහිතව පිළිගනු ලැබූ ජනාධිපතිවරයා, ත්‍රිවිධ හමුදා පෙළපාලිය නිරීක්ෂණයට ද එක්විය.

එම අවස්ථාවේදී ගනු ලැබූ ඡයාරූපයක් ලෙස සඳහන් කරමින් සමාජ මාධ්‍ය ඔස්සේ පළ කර තිබෙන ඡායාරූපයක් FactSeeker වෙත නිරීක්ෂණය වූ අතර එහි ජනාධිපති අනුර කුමාර දිසානායක ජර්මානු ජනාධිපතිවරයාට වඩා සැලකිය යුතු අඩු උසක් සහිතව සිටින බව අපගේ අවධානයට යොමු විය.

එම ඡායාරූපය Reverse Image Search හරහා කළ පරීක්ෂාවේදී මීට සමාන ඡායාරූපයක් Batesville Guard වෙබ් අඩවියේ පළ කර ඇති බව FactSeeker නිරීක්ෂණය කළේය. ජර්මානු ප්‍රවෘත්ති ඒජන්සියේ (DPA) බර්න්ඩ් වොන් ජුට්ර්සෙන්කා (Bernd von Jutrczenka) විසින් අදාළ ඡායාරූපය ලබාගෙන තිබිණි.

මෙරට සමාජ මාධ්‍ය ඔස්සේ සංසරණය වන ඡායාරූපය, එම ඡායාරූපය සමග සැසඳීමේදී සංසරණය වන ඡායාරූපයේ ජනාධිපතිවරයා කුඩාවට පෙනෙන ලෙස සංස්කරණය කර ඇති ආකාරය පැහැදිලිව හඳුනාගත හැකිය.

ශ්‍රී ලංකාවේ ජනාධිපති මාධ්‍ය අංශය නිකුත් කර තිබූ පිළිගැනීමේ උත්සවයට අදාළ වෙනත් ඡායාරූප ද FactSeeker පරීක්ෂා කළ අතර එහිදී සංසරණය වන ඡායාරූපය සංස්කරණය කළ එකක් බව තවදුරටත් තහවුරු විය.

ඒ අනුව, සමාජ මාධ්‍ය ඔස්සේ සංසරණය වන ජනාධිපති අනුර කුමාර දිසානායක, ජර්මානු ජනාධිපතිවරයාට සාපේක්ෂව වඩා කුඩාව පෙනෙන ඡායාරූපය ව්‍යාජ ලෙස සංස්කරණය කළ ඡායාරූපයක් බව FactSeeker තහවුරු කරයි.