හිටපු ජනාධිපතිනි චන්ද්‍රිකා බණ්ඩාරනායක කුමාරතුංගගේ කුඩා කල නර්තනයක් ඉදිරිපත් කෙරෙන අවස්ථාවක් ලෙස සඳහන් වීඩියෝවක් සමාජ මාධ්‍ය තුළ සංසරණය වන ආකාරය FactSeeker නිරීක්ෂණය කළේය.

මෙම වීඩියෝවෙන් ලබා ගත් ඡායාරූප(Screenshots) Google Lens තුළින් පරීක්ෂා කළ විට මෙම වීඩියෝව සම්බන්ධ පිළිගත හැකි මූලාශ්‍රයක් සඳහන් වී නොතිබිණි.

තවදුරටත් අප කළ පරීක්ෂාවේදී මෙම වීඩියෝව සකස් කිරීමට යොදාගත් සත්‍ය ඡායාරූපය පිළිබඳ හිටපු ජනාධිපතිනි චන්ද්‍රිකා බණ්ඩාරනායක කුමාරතුංග තම නිල ෆේස්බුක් ගිණුමේ පළ කරන ලද සටහනක් අපට හමු විය. එහි සඳහන් වන පරිදි, මේ ඡායාරූපය 1969 ප්‍රංශයේ පැවති ශ්‍රී ලංකා ශිෂ්‍ය සංගමය විසින් සංවිධානය කළ සංස්කෘතික උත්සවයක ඇය විසින් මයුරා වන්නම ඉදිරිපත් කරන ලද අවස්ථාවේ ගන්නා ලද්දකි.

නමුත් මෙම වීඩියෝවේ අදහස් පළකිරීම් නිරීක්ෂණය කිරීමේදී එය සත්‍ය වීඩියෝවක් බව පිළිගත් බොහෝ පරිශීලකයින් ප්‍රමාණයක් සිටින බව ද අපට නිරීක්ෂණය විය.

එසේම අදාළ වීඩියෝව පළ කරන ලද පළමු මූලාශ්‍රය අපට හමු වූ අතර එම වීඩියෝව කෘත්‍රිම බුද්ධිය යොදාගනිමින් නිර්මාණය කර ඇති බව දක්වන “AI Info” ලේබලය සහිතව හුවමාරු කර තිබුණි.

මේ අනුව, හිටපු ජනාධිපතිනි චන්ද්‍රිකා බණ්ඩාරනායකගේ නර්තනයක් යැයි සඳහන් වීඩියෝව ඡායාරූපයක් යොදාගනිමින් AI හරහා සකස් කළ ව්‍යාජ නිර්මාණයක් බව FactSeeker තහවුරු කරයි.