මෙම සැකකරුවන් අතර වින්දිතයාගේ පෙම්වතා යැයි කියන පාසල් සිසුවා සහ තවත් පාසල් සිසුන් හය දෙනෙකු ඇතුළත් වූ අතර ඒ පිළිබඳ සමාජ මාධ්‍ය තුළ විශාල කතාබහක් ඇති වූයේ සැකකරුවන් සියළු දෙනාම පාසල් සිසුන් වූ බැවිනි.

මෙම සිදුවීම සම්බන්ධයෙන් බොහෝ සමාජ මාධ්‍ය පරිශීලකයින් විවිධ අදහස් පළ කර තිබූ අතර ඒත් සමඟම අදාළ සැකකාර පාසල් සිසුන්ගේ ඡායාරූප  සහ එම දැරියගේ ඡායාරුපයක් යැයි දැක්වෙන ආකාරයේ ඡායාරූප සමඟ එම  පළ කිරීම් කර තිබෙන ආකාරය FactSeeker නිරීක්ෂණය කළේය.

නමුත් බැලූ බැල්මට එම ඡායාරූපයේ සිටින පුද්ගලයින් සියළු දෙනාගේ මුහුණු එක හා සමාන බව නිරීක්ෂණය කළ හැකි අතර එම පුද්ගලයින් සුදු පැහැති නිළ ඇදුමට කළු පැහැති බඳ පටි පැළද සිටී. ශ්‍රී ලංකාවේ රජයේ පාසල් නිල ඇඳුමට කළු පැහැති බඳ පටි නොපළඳින බැවින් මෙම ඡායාරූප අදාළ සැකකරුවන්ගේ සත්‍ය ඡායාරූප ද යන්න සැක මතු විය.

එසේම අනෙක් ඡායාරූපයේ ද සුදු පැහැති ගවුමකින් සැරසී සිටින දැරියක් වටා මිනිසුන් එක්‍ රැස්  වී සිටින ආකාරය නිරූපණය කරයි. එම ඡායාරූපයේ සිටින කිසිවෙකුත් ඇස් සබඳතා පවත්වාගෙනෙ නොසිටින ආකාරයෙන් එය සාමාන්‍ය මිනිස් හැසිරීම්වලට වඩා වෙනස් බව පැහැදිලි කරයි.

ඒ අනුව මෙම ඡායාරූප නිවැරදි සහ සත්‍ය ඡායාරූප ද යන්න වැඩිදුර සොයා බැලීමේදී ප්‍රධාන ධාරාවේ කිසිදු මාධ්‍යයක මෙම සිදුවීමට අදාළ සැකකරුවන්ගේ හෝ වින්දිත දැරියගේ ඡායාරූප කිසිවක් පළ කර නැති බව තහවුරු විය. මේ අනුව අදාළ ඡායාරූප AI මෙවලම් භාවිතයෙන් සකසන ලද ඒවා ද යන්න නිරීක්ෂණය කිරිම සඳහා Sightengine වෙබ් අඩවිය සහ තවත් මෙවලම් යොදාගනිමින් FactSeeker විසින් කරුණු නිරීක්ෂණය කළේය.

එහිදී ලැබූ ප්‍රතිඵල අනුව මෙම ඡායාරූප කෘත්‍රීම බුද්ධිය යොදාගනිමින් නිර්මාණය කරනලද ඒවා බවට 90%කට වඩා වැඩි ප්‍රතිශතයකින් තහවුරු කර ගැනීමට හැකි විය.

මෙම පළ කිරීම් සම්බන්ධයෙන් පරිශීලකයින්ගේ අදහස් දැක්වීම් (Comments) නිරීක්ෂණය කිරීමේදී ඇතැම් පුද්ගලයින් මෙම ඡායාරූප සිදුවීමට අදාළ සත්‍ය පුද්ගලයින්ගේ බව විශ්වාස කිරීමට පෙළඹී තිබෙන බව පැහැදිලි විය.

නමුත් FactSeeker තහවුරු කරන්නේ ඉහත ඡායාරූප කිසිවක් හෝමාගම පාසල් දැරිය දූෂණය හා සම්බන්ධ සත්‍ය ඡායාරූප නොවන බවත් ඒවා AI භාවිතයෙන් සකසන ලද ඒවා බවත් ය.