தற்போது சமூக வலைதளங்களிலும் பிரதான ஊடகங்களிலும் ‘எல் நினோ’ காலநிலை குறித்துப் பல அதிரடித் தலைப்புகளும், “சூப்பர் எல்- நினோ” எச்சரிக்கைகளும், உலகம் அழியப்போவது போன்ற அச்சமூட்டும் செய்திகளும் பரவி வருகின்றன. தற்போதைய காலநிலை மாறிவருவது உண்மைதான் என்றாலும், பரப்பப்படும் போலிச் செய்திகளில் இருந்து அறிவியல் உண்மைகளைப் பிரித்தறிவது மிக அவசியம்.

சர்வதேச வானிலை ஆய்வு மையங்களின் அதிகாரப்பூர்வ தரவுகளின் அடிப்படையில் தொகுக்கப்பட்ட உண்மையான தகவல்கள் இதோ:

1. காலநிலை மாற்றம் (Climate Change) குறித்த தெளிவு
தற்போதைய வானிலை மாற்றங்களைப் புரிந்துகொள்ள, நாம் இரண்டு வெவ்வேறு விஷயங்களை வேறுபடுத்திப் பார்க்க வேண்டும்:

காலநிலை மாற்றம் (நீண்ட காலப் பாதிப்பு): இது மனிதர்களின் செயல்பாடுகளால் (எரிபொருட்களை எரித்தல், காடழிப்பு) பூமியின் சராசரி வெப்பநிலை பல தசாப்தங்களாகத் தொடர்ந்து அதிகரித்து வருவதைக் குறிப்பதாகும்.

காலநிலை மாறுபாடு (குறுகிய காலச் சுழற்சி): இது சில மாதங்கள் அல்லது ஆண்டுகள் மட்டுமே நீடிக்கும் ஒரு இயற்கையான வானிலைச் சுழற்சி ஆகும்.

‘எல் நினோ’ என்பது காலநிலை மாற்றத்தால் உருவாக்கப்பட்டது அல்ல; அது ஒரு இயற்கையான சுழற்சி. ஆனால், மனிதர்களால் ஏற்பட்டுள்ள உலக வெப்பமயமாதலானது, இந்த ‘எல் நினோ’ வின் தாக்கத்தை வழக்கத்தை விட அதிக தீவிரமாகவும், கணிக்க முடியாதவாறும் மாற்றுகிறது.

2. எல் நினோ (El Niño) என்றால் என்ன? (எல் நினோ – லா நினியா)
எல் நினோ-தென்னக அலைவு (ENSO) என்பது பசிபிக் பெருங்கடலில் ஏற்படும் ஒரு இயற்கையான காலநிலைச் சுழற்சி ஆகும். இது உலகளாவிய வானிலையை மாற்றியமைக்கும் திறன் கொண்டது. இது மூன்று நிலைகளைக் கொண்டுள்ளது:

ENSO-வின் மூன்று நிலைகள்

•  லா நினியா (La Niña) – மத்திய மற்றும் கிழக்கு பசிபிக் பெருங்கடலின் மேற்பரப்பு நீர் வழக்கத்தை விட குளிர்ச்சியாக மாறும். பலத்த காற்றானது வெப்பமான நீரை ஆசியாவை நோக்கித் தள்ளுவதால், ஆசியாவில் அதிக மழையும் அமெரிக்காவில் வறட்சியும் ஏற்படும்.
• சமநிலை (ENSO-Neutral) கடலின் வெப்பநிலையும் காற்றும் வழக்கமான சராசரி அளவில் இருக்கும். உலகெங்கும் வழக்கமான பருவகால வானிலை நிலவும்.
•  எல் நினோ (El Niño)பசிபிக் கடலின் காற்று பலவீனமடைந்து, வெப்பமான நீர் மீண்டும் தென் அமெரிக்காவை நோக்கி நகரும்.மேகக் கூட்டங்கள் ஆசியா/ஆஸ்திரேலியாவை விட்டு நகர்வதால், இங்கு வறட்சியும் அமெரிக்கப் பகுதிகளில் அதிக மழையும் ஏற்படும்.

வரலாற்றுத் தரவுகள்: கடந்த கால எல் நினோ நிகழ்வுகளும் அதன் பாதிப்புகளும்

‘எல் நினோ’ 2 முதல் 7 ஆண்டுகளுக்கு ஒருமுறை நிகழ்கிறது. வரலாற்றில் பதிவான மிகத் தீவிரமான ‘எல் நினோ’ நிகழ்வுகள் (கடல் வெப்பநிலை சராசரியை விட 2^C உயர்தல் ஏற்படுத்திய பாதிப்புகள்:

1876–1878: வரலாற்றின் மிக மோசமான எல் நினோ. இது இந்தியா, சீனா மற்றும் ஆப்பிரிக்காவின் சில பகுதிகளில் பல ஆண்டுகள் நீடித்த கடுமையான வறட்சியையும், பெரும் பஞ்சத்தையும் ஏற்படுத்தியது.

1997–1998: மலேசியா, இந்தோனேசியா மற்றும் ஆஸ்திரேலியாவில் கடுமையான வறட்சியை ஏற்படுத்தி, பெரும் காட்டுத்தீக்கு வழிவகுத்தது. அதே நேரத்தில் பெரு மற்றும் ஈக்வடார் நாடுகளில் பெரும் வெள்ளத்தை ஏற்படுத்தியது.

2015–2016: உலகளாவிய வெப்பநிலையை அதுவரை இல்லாத அளவுக்கு உயர்த்தியது. ஆசியாவில் கடுமையான வெப்ப அலைகளையும், ஆஸ்திரேலியாவின் பவளப்பாறைகள் அழிவதற்கும் இது காரணமானது.

தற்போதைய நிலை: எல் நினோ எப்போது ஏற்படும்? (2026 தரவுகள்)
2026 ஆம் ஆண்டின் தொடக்கத்தில் ‘லா நினியா’ நிலை முடிவுக்கு வந்து, தற்போது ஒரு சமநிலை (Neutral) நிலவுகிறது. இருப்பினும், சர்வதேச வானிலை மையங்களின் தரவுகளின்படி, பசிபிக் பெருங்கடல் மிக வேகமாக வெப்பமடைந்து வருகிறது.

உலக வானிலை அமைப்பு (WMO) மற்றும் அமெரிக்காவின் NOAA அமைப்பின் மே 2026 தற்போதைய அறிவிப்பின்படி 2026 மே முதல் ஜூலை மாதங்களுக்குள் எல் நினோ அதிகாரப்பூர்வமாகத் தொடங்குவதற்கு 82% வாய்ப்பு உள்ளது.

நீடிக்கும் காலம்: இந்த ‘எல் நினோ’ நிலை 2026 டிசம்பர் முதல் 2027 பிப்ரவரி வரையிலான குளிர்காலம் வரை நீடிப்பதற்கு 96% முதல் 98% வரை வாய்ப்பு உள்ளது.

தீவிரம்: கடலின் உட்பகுதி மிக வேகமாக வெப்பமடைந்து வருவதால், இது ஒரு தீவிரமான எல் நினோவாக மாறக்கூடும் என்று கணிக்கப்பட்டுள்ளது. எனினும், இதன் உச்சக்கட்ட பாதிப்பு எவ்வளவு இருக்கும் என்பது குறித்த ஆய்வுகள் தொடர்ந்து நடந்து வருகின்றன.

பரப்பப்படும் போலிச் செய்திகளும் – அதற்கான அறிவியல் விளக்கங்களும்

ஒரு சில பிரதான ஊடகங்களிலும், youtube அலைவரிசைகளிலும் ‘எல் நினோ’ காலநிலையே தற்போது நிலவுவதாகவும், அதேபோல் “எல் நினோ என்பது அடுத்த வாரம் நம் நாட்டைத் தாக்கப்போகும் ஒரு பயங்கரமான புயல்.” எனவும், “உலகில் உள்ள அனைத்து நாடுகளிலும் கடுமையான வெப்பமும் வறட்சியும் ஏற்படும்.” என்ற செய்திகள் படுகின்றன.

உண்மை விளக்கம்:

தற்போது நிலவுவது ‘எல் நினோ’ காலநிலை அல்ல, அதேபோல் ‘எல் நினோ’ என்பது ஒரு வாரத்தில் வந்து செல்லும் புயலோ அல்லது சூறாவளியோ அல்ல. இது பல மாதங்கள் நீடிக்கும் ஒரு உலகளாவிய கடல் மற்றும் வளிமண்டல மாற்றமாகும். இது வானிலை தீவிரமடைவதற்கான சாத்தியக்கூறுகளை அதிகரிக்குமே தவிர, ரேடாரில் பார்த்து கணிக்கக்கூடிய ஒரு தனித்த புயல் அல்ல.

‘எல் நினோ’ பயிர் விளைச்சலுக்குச் சவாலாக இருந்தாலும், தற்போதைய 2026 ஆம் ஆண்டில் உலகளாவிய கண்காணிப்பு அமைப்புகள் மிகவும் நவீனமடைந்துள்ளன. FAO மற்றும் WHO போன்ற அமைப்புகள் இதனைத் தொடர்ந்து கண்காணித்து வருவதால், அரசாங்கங்கள் முன்கூட்டியே நீர்ப்பாசன முறைகளை மாற்றவும், மாற்றுப் பயிர்களை நடவும் விவசாயிகளுக்கு வழிகாட்டுகின்றன.

எனவே, முழுமையான அழிவு என்பது வதந்தியே. மேலும், ‘எல் நினோ’ வெவ்வேறு நாடுகளில் வெவ்வேறு தாக்கங்களை ஏற்படுத்தும். இது தென்கிழக்கு ஆசியாவில் வறட்சியை ஏற்படுத்தினாலும், தென் அமெரிக்கா மற்றும் கிழக்கு ஆப்பிரிக்காவின் சில பகுதிகளில் அதிகப்படியான மழை மற்றும் வெள்ளப் பெருக்கை ஏற்படுத்தும். ஆகவே, முன்கூட்டிய எச்சரிக்கை என்ற பெயரில் போலியான செய்திகளை பகிர்வது நாம் தவிர்க்க வேண்டும்.

உலகளாவிய ரீதியில் ‘எல் நினோ’ வின் பொதுவான விளைவுகள்

வெப்பமான பசிபிக் பெருங்கடல் தனது வெப்பத்தை வளிமண்டலத்தில் வெளியிடுவதால் ஏற்படும் விளைவுகள்:

• வெப்பநிலை அதிகரிப்பு: ஏற்கனவே உள்ள காலநிலை மாற்றத்துடன் ‘எல் நினோ’ வும் இணைவதால், 2026 இன் பிற்பகுதியும் 2027 ஆம் ஆண்டும் உலக வரலாற்றில் மிக வெப்பமான ஆண்டுகளாகப் பதிவாக வாய்ப்புள்ளது.
• புயல்களின் மாற்றம்: இது அட்லாண்டிக் பெருங்கடலில் புயல்கள் உருவாவதைக் கட்டுப்படுத்தும், ஆனால் பசிபிக் பெருங்கடல் பகுதியில் தீவிர புயல்களை உருவாக்கும்.
• கடலோர வெள்ளம்: கடல் நீர்மட்ட உயர்வு மற்றும் ‘எல் நினோ’ வின் வெப்ப விரிவாக்கம் காரணமாக, அமெரிக்காவின் கடலோரப் பகுதிகளில் அடிக்கடி வெள்ளப்பெருக்கு ஏற்பட வாய்ப்புள்ளது.

தெற்காசியா (இந்தியா, இலங்கை உள்ளிட்ட பகுதிகள்) எதிர்கொள்ளும் தாக்கங்கள்
தெற்காசியாவின் பருவமழைக் காலம் (Monsoon) எல் நினோ சுழற்சியால் பெரிதும் பாதிக்கப்படக்கூடியது.

• பலவீனமடையும் பருவமழை: எல் நினோ காலத்தில் தெற்காசியாவின் கோடைகாலப் பருவமழை (Southwest Monsoon) வழக்கத்தை விடக் குறையவோ அல்லது சீரற்றதாக மாறவோ அதிக வாய்ப்புள்ளது.
• கடுமையான வெப்ப அலைகள் (Heatwaves): கோடை காலங்களில் வழக்கத்தை விட நீண்ட மற்றும் கடுமையான வெப்ப அலைகள் வீசக்கூடும். இது பொதுமக்களின் சுகாதாரம் மற்றும் மின்சாரத் தேவையைப் பாதிக்கும்.
• விவசாயப் பாதிப்பு: மழை பற்றாக்குறையால் நெல், கரும்பு மற்றும் சோளம் போன்ற பயிர்களின் விளைச்சல் பாதிக்கப்படலாம். இதனால் தண்ணீரைச் சேமிக்கும் பாசன முறைகளைப் பின்பற்றுமாறு விவசாயிகளுக்கு அரசு அறிவுறுத்தி வருகிறது.
• சீரற்ற குளிர்கால மழை: ஆண்டின் இறுதியில், இந்தியாவின் தென்பகுதிகள் மற்றும் இலங்கையில் வடகீழ் பருவமழை (Northeast Monsoon) காரணமாக வழக்கத்திற்கு மாறாக அதிக மழை பெய்து, சில இடங்களில் திடீர் வெள்ள அபாயத்தையும் ஏற்படுத்தலாம்.

ஆகவே காலநிலை குறித்து பொதுமக்கள் எப்போதும் விழிப்புணர்வுடன் இருக்க வேண்டியது அவசியம் என்பதை factseeker வாகர்களுக்கு வலியுறுத்துகின்றது.