ශ්‍රී ලංකාවේ වලංගු මුදල්වල ස්වරූපයට සමානකම් සහිත මෙම මුදල් නෝට්ටු  සමාජ මාධ්‍ය හරහා බහුලව සංසරණය වීම නිසා එහි සත්‍ය අසත්‍යතාව පරීක්ෂා කිරීමට FactSeeker කටයුතු කළේය.

මෙම ඡායාරූප Google Lens යොදාගනිමින් Reverse Image Search කිරීමේදී එම ඡායාරූපවලට සමාන ඡායාරූප ගණනාවක් විවිධ වෙබ් අඩවි සහ YouTube නාලිකා ඔස්සේ පළ කර තිබෙන ආකාරය අපට නිරීක්ෂණය කළ හැකි විය.

එසේ පළ කර තිබූ ස්ථාන කිහිපයකම ඒවා “මුදල් නෝට්ටු ගොනු/බහාලුම්” නමින් සඳහන් කර තිබුණි.

FactSeeker අපි මේ පිළිබඳව ශ්‍රී ලංකා මහ බැංකුවේ ව්‍යවහාර මුදල් දෙපාර්තමේන්තුවෙන් විමසීමක් කළෙමු.

එහිදී ඔවුන් තහවුරු කළේ, මෙසේ සංසරණය වන මුදල් නෝට්ටු නව මුදල් නෝට්ටු නොව, 2011 නිකුතුවේ “මුදල් නෝට්ටු ගොනු (currency folders)” කිහිපයක් බවයි.

මෙවැනි මුදල් නෝට්ටු ගොනු කොළඹ 01 චැතම් වීදියේ පිහිටි ශ්‍රී ලංකා මහ බැංකුවේ ශ්‍රී ලංකා ආර්ථික ඉතිහාස කෞතුකාගාරයෙන් මිලදී ගත හැකි බව ද එම දෙපාර්තමේන්තුව පෙන්වා දුන්නේය.

තවද ඒවා නැවත විකිණීම(re-sell) සිදු විය හැකි බව ද සඳහන් කළේය.

2011 පෙබරවාරි මස 04 වන දින නිකුත් කළ ශ්‍රී ලංකාවේ 11 වන ව්‍යවහාර මුදල් කාණ්ඩයට අයත් මුදල් නෝට්ටුවල ගොනු මෙසේ හුවමාරු වේ.

ඒ අනුව, මෙසේ “නව මුදල් නෝට්ටු” ලෙස දක්වමින් සමාජ මාධ්‍ය ඔස්සේ සංසරණය වන ඡායාරූප නව මුදල් නෝට්ටුවල ඡායාරූප නොවන අතර, ඒවා ශ්‍රී ලංකා මහ බැංකුව 2011 දී නිකුත් කළ මුදල් නෝට්ටු කාණ්ඩයට අයත් මුදල් නෝට්ටු ගොනු බවත්, අදාළ සමාජ මාධ්‍ය සටහන් සාවද්‍ය බවත් FactSeeker තහවුරු කරයි.