සුන්බුන් අතර සිරවී සිටින දැරියගේ වීඩියෝව තායිලන්ත භූ කම්පන සිදුවීමට අදාළ නොවේ.
තායිලන්තය සහ මියෙන්මාරය මූලික කොටගනිමින් පසුගිය සිකුරාදා (28) දින ඇති වූ ප්‍රබල භූ කම්පනය හේතුවෙන් ජීවිත හානි රැසක් සහ දේපල හානි විශාල සංඛ්‍යාවක් සිදු වූ බව විදෙස් මාධ්‍ය වාර්තා කළේ ය.
by Anonymous |
අප්‍රේල් 2, 2025
එසේම එම ප්‍රදේශවල තවමත් දිවි ගලවා ගැනීමේ කටයුතු සිදු කෙරෙමින් පවතින බැවින් මෙම සිදුවීම සම්බන්ධයෙන් ගෝලිය වශයෙන් මාධ්‍ය අවධානය යොමු වී පවතී.
මෙවැනි තත්ත්වයක් මත සමාජ මාධ්‍යයේ අසත්‍ය තොරතුරු බහුලව පැතිරයාම පිළිබඳ FactSeeker අවධානය යොමු කර සිටින අවස්ථාවක සුන්බුන් අතර සිරවී සිටින දරියකගේ වීඩියෝවක් ෆේස්බුක් සමාජ මාධ්‍ය හරහා සංසරණය වන ආකාරය නිරීක්ෂණය විය.
එම වීඩියෝව මෙතැනින්:
https://www.facebook.com/share/v/195B7Xcj9m/
https://www.facebook.com/share/p/1AN1PdiBQU/
එම වීඩියෝ සංසරණය වන්නේ “භූමිකම්පාවේදී සිදු වූ හදවත කම්පාවන දසුනක්” ලෙස සඳහන් කරමින් ය.
එම වීඩියෝව සංසරණය වීමේදී මෙය මියෙන්මාර භූකම්පනයට අදාළ බව බොහෝ දෙනෙකු විශ්වාස කරන බවක් දක්නට ලැබුණි. නමුත් එක් අදහස් පළ කිරීමක මෙය සිරියානු යුද්ධයට අදාළ සිදුවීමක් බව දක්වා තිබුණි.
ඒ අනුව යමින් මෙම වීඩියෝව සම්බන්ධයෙන් වැඩිදුර කරුණු සොයා බැලීමට FactSeeker කටයුතු කළේය.
මෙම වීඩියෝවට අදාළ ඡායාරූප Google Reverse Image හරහා සොයා බැලීමේදී ලැබූ ප්‍රතිඵල අනුව දල වශයෙන් ලෝකයේ විවිධ සිදුවීම් හා සම්බන්ධ කරමින් අවස්ථා දහ දහසකට ආසන්න ප්‍රමාණයක් මෙම වීඩියෝව බෙදාගෙන ඇති බව තහවුරු විය. එහි මුල් වීඩියෝව “userftdvvrl92i” නම් Tiktok ගිණුම හරහා 2024 ඔක්තෝබර් 24 දින පළ වූවක් බවට සොයා ගැනීමට හැකි විය.
එම සම්පූර්ණ වීඩියෝව මෙතැනින්: https://www.tiktok.com/@userftdvvrl92i/video/7429798627142356231
මීට අමතරව මෙම වීඩියෝව සම්බන්ධයෙන් විදෙස් කරුණු පරීක්ෂා කිරීමේ වෙබ් අඩවි විසින් පල කරන ලද ලිපි කිහිපයක් සොයා ගැනිමට ද FactSeeker ට හැකි විය.
ගාසා තීරයේ ඇති වූ යුද්ධයේ දී සුන්බුන් අතර සිරවී සිටින දැරියකගේ වීඩියෝවක් බවට තොරතුරු හුවමාරු වීම නිසා ඔවුන් මෙම කරුණු පරීක්ෂා කිරීම කර ඇත.ඒ 2024 වසරේදී ය. මෙම දැරිය පලස්තීනයේ ගාසා තීරයේ කඩා වැටුණු නිවසක සුන්බුන් අතර සිරවී සිටින දැරියක් නොවන බවත්, සිරියානු යුද්ධයේ දී සිදු වූ කඩාවැටීමක සුන්බුන් අතර සිරවී සිටින දැරියක් හෝ නොවන බවත් මෙම ලිපිවල සඳහන් වෙයි. එසේම මුල් වීඩියෝවේ සඳහන් පරිදි දැරිය බිත්තියක සිදුරක් දෙස බලා සෙල්ලම් කරමින් සිටින බවත්, එය සිරියාවේ රූගත කිරීමක් බවත් කරුණු පරීක්ෂා කිරීම්වලින් තහවුරු කර ඇත.
එබැවින් මෙම කරුණු පරීක්ෂා කිරීමේ ලිපිවල කරුණු විශ්ලේෂණය අනුව සුන්බුන් අතර සිරවී සිටින දරුවාගේ වීඩියෝව තායිලන්ත, මියෙන්මාර භූකම්පනයට අදාල වීඩියෝවක් හෝ පලස්තීන, සිරියානු යුද්ධයට අදාළ සිදුවීමක් හෝ නොවන බව FactSeeker තහවුරු කරයි.
