මෙම ප්‍රවෘත්තිය A5 News Sri Lanka අඩවිය විසින් පළකර ඇති බව සඳහන් කර ඇත.

මේ පිළිබඳව විවිධ මත ප්‍රකාශ වී තිබු බැවින් එහි සත්‍ය අසත්‍යතාවය පිළිබඳ සොයා බැලීමට factseeker කටයුතු කළේය.

මේ සම්බන්ධයෙන් ප්‍රධාන මාධ්‍යයේ පළවීමක් සිදුව ඇති දැයි මුලින්ම සොයා බැලු අතර එවැනි පළකිරීමක් සිදුව නොමැති බව factseeker තහවුරු කරගත්තේය.

මෙවර ජනාධිපතිවරණයේ දී සජිත් ප්‍රේමදාස ජයග්‍රහණය කළහොත් 2019 අප්‍රේල් 21 වෙනිදා පාස්කු දින එල්ල වූ ත්‍රස්ත ප්‍රහාරය පිළිබඳව යුක්තිය ඉටුවේදැයි විමසමින් ජනාධිපති නීතීඥ රියෙන්සි අර්සකුලරත්න අගරදගුරු මැල්කම් රංජිත් හිමි වෙත ලිපියක් යොමුකර ඇත.

පොලිස්පති ධුරය දැරීමට දේශබන්දු තෙන්නකෝන් නුසුදුස්සෙකු ලෙස කරුණු දක්වමින් අගරදගුරු හිමි ශ්‍රේෂ්ඨාධිකරණයට ඉදිරිපත් කළ පෙත්සමේ සඳහන් කර තිබූ බවත් ඊට අදාළ කරුණු අතර දේශබන්දු තෙන්නකෝන් යන අය පාස්කු ඉරුදින බෝම්බ ප්‍රහාරයට සම්බන්ධ පුද්ගලයෙකු වීම යන කරුණාද ඇතුළත් වූ බවද පවසා ඔහු සිය ලිපිය කාදිනල් හිමියන්ට යොමුකර ඇත.

කෙසේවෙතත් මෙම ලිපිය සම්බන්ධයෙන් ප්‍රවෘත්ති වාර්තා කිරීමේදී එහි අන්තර්ගත කරුණුවල අදහස  වෙනස් කර වාර්තා කර ඇති බව පැහැදිළි වෙයි.

factseeker මේ සම්බන්ධයෙන් කාදිනල් හිමියන්ගේ පාර්ශවයෙන් විමසා බැලූ අතර කාදිනල් හිමියෝ මෙවැනි ප්‍රකාශයක් කර නැති බවත් එය කාදිනල් හිමියන් වෙත එවූ ලිපියක් පමණක් බවත් අගරදගුරු පදවි ජනසන්නිවේදන අධ්‍යක්ෂක ජූඩ් ක්‍රිශාන්ත පියතුමන් පැවසීය.

ඒ අනුව මෙවර ජනාධිපතිවරණයේ දී සජිත් ප්‍රේමදාස ජයග්‍රහණය කළහොත් 2019 අප්‍රේල් 21 වෙනිදා පාස්කු දින එල්ල වූ ත්‍රස්ත ප්‍රහාරය පිළිබඳව යුක්තිය ඉටුවේදැයි සැකසහිත බවට ප්‍රකාශයක්  කාදිනල් හිමියෝ කර නැති බව factseeker තහවුරු කරයි.