ඉන්දීය සුපිරි නළු ශාරුක් ඛාන් මෙරට දැවැන්ත ආයෝජනයකින් ඇරඹෙන City of Dreams හි අවසන් අදියර විවෘත කිරීමේ අවස්ථාව සඳහා සහභාගී වීමට නියමිතය. එය City of Dreams ‌‌‌‌ෆේස් බුක් පිටුව මගින් නිල වශයෙන් දැනුම් දී ඇත.

ඒ සඳහා සහභාගි වන බොලිවුඩ් නළු ශාරුක් ඛාන් දැක ගැනීමට ප්‍රවේශ පත්‍ර නිකුත් කර ඇති බව දක්වන පෝස්ටුවක් සමාජ මාධ්‍ය හරහා සංසරණය වන බව Factseeker නිරීක්ෂණය කළේ ය.

මෙම පෝස්ටුවල දැක්වෙන ආකාරයට ශාරුක් ඛාන්ගේ රුව ද ඇතුළත් මෙම ප්‍රවේශපත් රු.20 000ක මුදලකට ලබාගත හැකි බව දක්වා ඇත. කෙසේ වෙතත් මෙම ඡායාරූපය හොඳින් නිරීක්ෂණය කිරීමේදී ඇතැම් අක්ෂරයන් හා වචන නිවැරදි නොවන බව පෙනෙන්නට තිබුණි. එසේම එහි ඇතුළත් ශාරුක් ඛාන්ගේ රුවෙහි ද පැහැදිලි බවක් නොපෙනුනි. මෙම හේතූන් නිසා මේ පිළිබදව නිල වශයෙන් කළ පළකිරීමක් ඇත් ද? යන්න FactSeeker සොයා බැලීය.

ඒ අනුව City of Dreams ජාලය විසින් ඒ පිළිබදව පළ කර තිබූ නිල නිවේදනයක් Fact Seeker ට හමුවිය. එහි සඳහන් කර තිබුණේ, හුවමාරු වන මෙම පෝස්ටුව ව්‍යාජ ලෙසින් සකස් කරන ලද්දක් බවයි.

එම විවෘත කිරීමේ උත්සවයට සීමිත ආරාධිතයින් පිරිසක් පමණක් සහභාගී වන බවත් තෙවන පාර්ශවයකට ඒ සඳහා සම්බන්ධ වීමට අවස්ථාවක් නොමැති බවත් එම නිවේදනය මගින් දැනුම් දී ඇත. එමෙන්ම මෙවැනි පළකිරීම්වලට හසුනොවන ලෙස ද වැඩිදුරටත් දක්වා තිබුණි.

ඒ අනුව සුපිරි බොලිවුඩ් නළු ශාරුක් ඛාන් දැක ගැනීමට රුපියල් 20 000 ක මුදලකට අලෙවි කෙරෙන බව සඳහන් ප්‍රවේශපත ව්‍යාජ එකක් බව FactSeeker තහවුරු කරයි.