සංවිධානාත්මක අපරාධකරුවෙකු බව කියන සංජීව කුමාර සමරරත්න හෙවත් ගණේමුල්ලේ සංජීව නමැත්තා බූස්ස බන්ධනාගාරයේ සිට ඊයේ (19) අලුත්කඩේ මහේස්ත්‍රාත් අධිකරණය වෙත රැගෙන ගොස් අධිකරණ කටයුතු සිදු වන අවස්ථාවේ නීතීඥවරයෙකු ලෙස සැරසී පැමිණි තුවක්කුකරුවෙකු විසින් වෙඩි තබා ඝාතනය කරන ලදී. මෙම ඝාතනයේ සැකකරු පුත්තලම පාලවිය ප්‍රදේශයේදී ඊයේ (19) සවස අත්අඩංගුවට පත් විය.

මෙම සිද්ධියට සම්බන්ධ සැකකරු අත්අඩංගුවට ගෙන රැගෙන එන අවස්ථාව ලෙස හැඟවෙන වීඩියෝවක් සමාජ මාධ්‍යයේ සංසරණය වෙමින් පවතියි.

එම වීඩියෝව මෙතැනින්:

https://www.facebook.com/share/1ACmXTSXCJ/

https://www.facebook.com/share/v/184Fu7eSgy/

අත්අඩංගුවට පත් අවස්ථාවේ ඔහු සිනාමුසු මුහුණින්, හමුදා නිලධාරීන් සමග කතාබහ කරන ආකාරය එම වීඩියෝවේ පෙන්නුම් කරයි. කෙසේ වෙතත් මෙම වීඩියෝව පරීක්ෂා කිරීමේදී කිරීමේදී එහි සිටින පුද්ගලයාගේ අසාමාන්‍ය හැසිරීමක් පවතින බව FactSeeker හඳුනාගන්නා ලදී.

එහිදී, අත්අඩංගුවට පත්වන පුද්ගලයා නිලධාරියෙකුගේ අතින් අල්ලා සිටින අවස්ථාවේ අතේ ඇඟිලි අපැහැදිලිව නිරූපණය වීම, සැකකරු වෑන් රථය තුළ හිඳ සිටින අතරතුර පසුබිමේ ඇති ජනේලයෙන් අදාළ වෑන් රථය ධාවනය කරමින් තිබෙන බව නිරූපණය වීම සහ සැකකරුගේ මුහුණේ ඉරියව් සහ භාවයන් එකිනෙකට අසමාන සහ අපැහැදිලි වීම වැනි සැකසහිත අවස්ථා කිහිපයක් හඳුනාගැනීමට හැකි විය.

මේ අනුව අදාළ වීඩියෝව කෘත්‍රිම බුද්ධියෙන් සංස්කරණය කරන ලද නිර්මාණයක් ද යන්න FactSeeker විමසා බැලීය.

Deepware වෙබ් අඩවිය යොදා ගනිමින් අප සිදු කළ විශ්ලේෂණයෙන් තහවුරු වූයේ මෙම වීඩියෝව කෘත්‍රිම බුද්ධිය පාදක කර ගනිමින් නිර්මාණය කරන ලද්දක් බවයි.

ඡායාරූපයක් භාවිත කරමින් ඊට අදාළව වීඩියෝවක් සකසාගත හැකි ආකාරයේ කෘත්‍රිම බුද්ධි මෙවලම් මේ වන විට සුලබය. ඉහත වීඩියෝව නිරීක්ෂණය කිරීමේදී පෙනී යන්නේ ප්‍රධාන ධාරාවේ මාධ්‍යවල පළ කරන ලද පහත ඡායාරූප මූලාශ්‍ර කරගනිමින් එම වීඩියෝව නිර්මාණය කර ඇති බවයි.

ඒ අනුව, ගණේමුල්ලේ සංජීව ඝාතන සිද්ධිය සම්බන්ධයෙන් අත්අඩංගුවට පත් සැකකරු සම්බන්ධයෙන් හුවමාරු වන වීඩියෝව කෘත්‍රිම බුද්ධිය යොදාගෙන ව්‍යාජ ලෙස නිර්මාණය කරන ලද වීඩියෝවක් බව FactSeeker තහවුරු කරයි.