මේ අතර  අද (20) ‘දිනමිණ පුවත්පතේ මුල් පිටුවේ ජාතික ජන බලවේයේ ජාතික විධායක සභික සුනිල් හදුන්නෙත්ති කළ ප්‍රකාශයක් පිළිබදව පළ වූ ප්‍රවෘත්තියක් Fact seeker නිරීක්ෂණය කළේ ය.

‘දිනමිණ පුවත්පතේ මුල් පිටුවේ පළ වූ ප්‍රවෘත්තියට අනුව “ආර්ථික අර්බුදයට තියෙන්නේ විසදුම් තුනයි.රාජ්‍ය ආයතන විකුණන්න, සල්ලි අච්චු ගහන්න.පෞද්ගලික තැන්පතු ගන්න” යනුවෙනි.

මෙය සුනිල් හදුන්නෙත්ති කළ ප්‍රකාශයක් ද? යන්න පිළිබදව Fact seeker සොයා බැලීය.

එහිදී ‘දිනමිණ පුවත්පතේ 06 වෙනි පිටුවේ තිබූ එම ප්‍රවෘත්තියේ වැඩි විස්තරවල තිබුණේ, අපිට අනිවාර්යයෙන් සිද්ධ වෙන දේ තමයි, මේ තියෙන රාජ්‍ය ව්‍යාපාර ආයතන දැන් ඔය වෙන්දේසි කරලා වගේ විකුණන්න දාලා තියෙන ඒවා විකුණන්න දාන්න. ඒක එක උත්තරයක්. නැත්නම් සල්ලි අච්චු ගහන්න වෙනවා. ඒ තව උත්තරයක්.බැංකුවල තියෙන තැන්පත්කරුවන්ගේ සල්ලි, ඒවා ගන්න වෙනවා ආණ්ඩුවට වියදම් කරන්න. ඔය උත්තර තුන තමයි මම ඉගෙන ගත්ත දේ” යනුවෙනි.

‘දිනමිණ පුවත්පත මෙය වාර්තා කර තිබුණේ, ජාතික රූපවාහිනියේ විකාශය වූ ප්‍රවෘත්තියක් උපුටා දක්වමින් බව සදහන් කර තිබිණි.

පසුගිය 18 වෙනිදා ජාතික රූපවාහිනී ප්‍රවෘත්ති විකාශයේ එය විකාශය වූයේ මෙලෙසිනි. https://www.youtube.com/live/nJkYeW21K2I?si=K-a8GswfCvLtfG0v

අපි මේ සම්බන්ධයෙන් ජාතික ජන බලවේගයේ මාධ්‍ය ඒකකයෙන් කළ විමසීමකදී ඔවුන් ප්‍රකාශ කළේ සුනිල් හදුන්නෙත්ති කළ ප්‍රකාශයක් විකෘති කර හුවමාරු වූ වීඩියෝවක් ‘දිනමිණ  පුවත්පතේ පළ කර ඇති බව යි. එසේම මෙය පසුගිය වසරේ නෙත්  FM ගුවන් විදුලි නාලිකාව සමග කළ සම්මුඛ සාකච්ඡාවකින් උපුටා ගන්නා ලද කොටසක් විකෘති කර බව ද මාධ්‍ය ඒකකය අනාවරණය ක‌ළේ ය.

මේ අතර තමාගේ ප්‍රකාශයක කොටසක් උපුටා දක්වමින් නොමග යවන ලෙස පළ කර ඇතැයි සුනිල් හදුන්නෙත්ති විසින් සිය මුහුණු පොතේ හුවමාරු කර ගත් වීඩියෝවක් ද අපිට සොයා ගැනීමට හැකි විය. https://www.facebook.com/share/v/kvcKCL2eL9Ccwb2R/

ඒ අනුව අපි අන්තර්ජාලය ඔස්සේ නෙත්  FM යූ ටියුබ් නාලිකාවට ගොස් සෙවීමේදී මෙය 2023 වසරේ දෙසැම්බර් 21 වෙනි දින සුනිල් හදුන්නෙත්ති සහභාගි වූ නෙත්  FM  Unlimited දේශපාලන සංවාදයෙන් උපුටා ගන්නා ලද බව අනාවරණය විය.

එම දේශපාලන සංවාදය https://youtu.be/9LVu4n2B3-0?si=HpkC1dS2kUTgAjiz

අදාළ සම්මුඛ සාකච්ඡාව පැවැත්වූ දින වකවානුව වන විට රජය විසින් වැට් බදු ප්‍රතිශතය ඉහළ නැංවීමට සූදනම් වෙමින් පැවැතිණි. මෙවන් ආර්ථික අර්බුද පවතින අවස්ථාවක වැට් බදු ප්‍රතිශතය ඉහළ නැංවීම හැර රජයට වෙනත් විකල්ප පවතින්නේ ද? යන්න පිළිබදව නිවේදක විසින් එහිදී ප්‍රශ්නයක් මතු කළේ ය.

මෙහිදී සුනිල්හු හදුන්නෙත්ති විසින් පෙන්වා දෙන්නේ, රජයට පවතින විසදුම නම්,වියදම් කළමණාකරණය කිරීම බවයි. එහිදී වැඩිදුරටත් අදහස් දක්වන සුනිල් හදුන්නෙත්ති මෙසේ ද පවසයි.

“රටේ ආදායම රුපියල් බිලියන 4164 ක් වන විට වියදම රුපියල් බිලියන 11000 ක් වෙනවා. ලබන වසර වන විට (2024) world Bank එක IMF එක ආසියානු සංවර්ධන බැංකුව ඔක්කොම ණය වශයෙන් අපිට ඩොලර් බිලියන 1.5 ක ණය ගෙවන්න වෙනවා. මේවා ගෙවා ගන්න බැරි වුණොත් අපිට අනිවාර්යයෙන් සිද්ධ වෙන දේ තමයි, ඔය තියෙන රාජ්‍ය ව්‍යාපාර ආයතන වෙන්දේසි කරලා වගේ විකුණන්න දාලා තියෙන ඒවා විකුණන්න දාන්න. ඒක එක උත්තරයක්. නැත්නම් සල්ලි අච්චු ගහන්න වෙනවා. ඒ තව උත්තරයක්.බැංකුවල තියෙන තැන්පත්කරුවන්ගේ සල්ලි, ඒවා ගන්න වෙනවා ආණ්ඩුවට වියදම් කරන්න. ඔය උත්තර තුන තමයි මම ඉගෙන ගත්ත දේ” යනුවෙනි

ඒ අනුුව දිණමිණ පුවත්පත හා ජාතික රූපවාහිනිය වාර්තා කර තිබුණේ සුනිල් හදුන්නෙත්ති 2023 වසරේ දෙසැම්බර් 21 වෙනි දින නෙත්  FM  Unlimited දේශපාලන සංවාදයේදී  පළ කළ අදහස්වලින් කොටසක් පමණක් උපුටා දක්වමින් නොමග යවන ලෙස පළ කර ඇති බව  Fact seeker තහවුරු කරයි.