වත්මන් රජයේ ක්‍රියාකලාපයට විරෝධය පළ කරමින් ශ්‍රී ලංකා පොදුජන පෙරමුණ ප්‍රධාන විපක්ෂයේ පක්ෂ කිහිපයක එකතුවෙන් පසුගිය 21 වනදා නුගේගොඩදී ජනරැළියක් පැවැත්වීය.
එම ජන රැළියට සහභාගි වූවන්ට ලබා දීමට රැගෙන ආ බව දක්වමින් මත්පැන් බෝතල් යනුවෙන් සඳහන් කරමින් මත්පැන් ඇසුරෑ පෙට්ටි සහිත ඡායාරූප කිහිපයක් සමාජ මාධ්‍ය ඔස්සේ සංසරණය වන බව FactSeeker ට නිරීක්ෂණය විය. 21 වනදා රැළියට ඒකාබද්ධ විපක්ෂයෙන් සහය ලබාදුන් ආකාරය ලෙස දක්වමින් සමාජ මාධ්‍ය ඔස්සේ මෙම ඡායාරූප හුවමාරු වී තිබුණි.

කෙසේ වෙතත් මේ සම්බන්ධයෙන් FactSeeker කළ සොයාබැලීම් වලදී අනාවරණය වූයේ එම ඡායාරූප මෑතකදී ගත් ඒවා නොවන බවයි.

2022 වසරේදී රටෙහි ඇතිවූ අරගල‍යේදී රටේ ඇතිවූ කලබලකාරී වාතාවරණයේදී ගිනි තැබීම් සහ පහරදීම් හේතුවෙන් මැති ඇමතිවරුන්ගේ නිවාස සහ දේපළවලට බරපතල හානි සිදුවිය. එහිදී හිටපු පාර්ලිමේන්තු මන්ත්‍රී ජොන්ස්ටන් ප්‍රනාන්දුට අයත් ප්‍රාඩෝ වර්ගයේ රථයකට ද හානි වී තිබුණි. එම අවස්ථාවේ අදාළ රථය තුළ තිබී හමුවූ ද්‍රව්‍යන් හි ඡායාරූප කිහිපයක් මේ ලෙසින් සංසරණය වී ඇති බව ඒ අනුව අනාවරණය විය.

ඒ සම්බන්ධයෙන් මාධ්‍ය වාර්තා කර තිබූ තොරතුරු අනුව තවදුරටත් එය තහවුරු විය.

https://x.com/Dailymirror_SL/status/1523632768608919553

මෙම කරුණු අනුව පෙනී යන්නේ, පසුගිය 21 ‍වෙනිදා නුගේගොඩ රැළියට රැගෙන ආ මත්පැන් බව පවසමින් සමාජ මාධ්‍ය ඔස්සේ සංසරණය වන ඡායාරූප මීට වසර කිහිපයකට පෙරදී ගන්නා ලද ඡායාරූප වන බවයි.