හිටපු ජනපති රනිල් වික්‍රමසිංහ සහ විපක්ෂ නායක සජිත් ප්‍රේමදාස එකිනෙකා වැළඳගන්නා ආකාරය දැක්වෙන වීඩියෝවක් සමාජ මාධ්‍ය තුළ සංසරණය වෙමින් පවතී. ඒ ‘යථාර්ථය තේරුම් ගත්ත යාළු, දැන් ඉතින් ලේසි වෙන් නෑ’ යනුවෙන් සඳහනක් ද සහිතව ය.
එම වීඩියෝව මෙතැනින්.

ඇතැම් සමාජ මාධ්‍ය පරිශීලකයින් මෙය සත්‍ය වීඩියෝවක් බව විශ්වාස කිරීමට පෙළඹී ඇති බව වීඩියෝවේ අදහස් පළ කිරීම් තීරය තුළ අපට නිරීක්ෂණය විය.

නමුත් මෙම වීඩියෝවෙන් ලබාගත් ඡායාරූප කිහිපයක් රූප මූලාශ්‍ර සෙවුම(Reverse Image Search) හරහා පරීක්ෂාවේදී විවිධ පුවත්පත් වෙබ් අඩවි විසින් විවිධ පුවත් සඳහා භාවිත කරන ලද, එම වීඩියෝවට අදාළ ඡායාරූප කිහිපයක් හමු වුවද, එවැනි වැළඳගැනීමක් සහිත අවස්ථාවක වීඩියෝවක් අන්තර්ජාලයෙන් හමු නොවුණි.

එසේම මෙම වීඩියෝව වැඩිදුර පරීක්ෂාවේදී රනිල් වික්‍රමසිංහගේ මුහුණේ ඉරියව් අසාමාන්‍ය ලෙස වෙනස් වන ආකාරය දක්නට ලැබුණු අතර ශරීරය චලනය වීමේදී මුහුණේ පැහැයන්ද අස්වාභාවික ලෙස වෙනස් වන ආකාරය නීරීක්ෂණය කළ හැකි විය.

ඒ අනුව අදාළ වීඩියෝව කෘත්‍රිම බුද්ධිය යොදා ගනිමින් සකසන ලද්දක් ද යන්න පරීක්ෂා කිරීමට FactSeeker කටයුතු කරන ලද අතර එම වීඩියෝවෙන් ලබාගත් රූප කිහිපයක් AI Image Detector මෙවලම් හරහා පරීක්ෂා කිරීමේදී ලැබූ ප්‍රතිඵල අනුව 90% කට වඩා වැඩි ප්‍රතිශතයකින් මෙය AI ඔස්සේ නිර්මාණය කරන ලද්දක් බවට තහවුරු විය.

මේ අනුව FactSeeker සිදු කළ කරුණු පරීක්ෂාවෙන් තහවුරු කරන්නේ, සජිත් ප්‍රේමදාස සහ රනිල් වික්‍රමසිංහ වැළඳගැනීමක් ලෙස දැක්වෙන වීඩියෝව AI නිර්මාණයක් බවයි.