ශ්‍රී ලංකාවේ විශාල විද්‍යුත් වාණිජ්‍ය වෙළඳපලක් වන Darazහි රු.680ක දීමනාවක් යටතේ Samsung Galaxy S24 Ultra වර්ගයේ ජංගම දුරකථන ලබා දෙන බව සඳහන් කරමින්, වීඩියෝ කිහිපයක් සමාජ මාධ්‍යයේ විශාල වශයෙන් හුවමාරු වෙමින් තිබේ.

මෙම වීඪියෝව සඳහා මෙරට ජනප්‍රිය ක්‍රිකට් ක්‍රීඩකයින් දෙදෙනෙකු වන කුමාර සංගක්කාර සහ ලසිත් මාලිංග මෙන්ම හිටපු ජනාධිපති ගෝඨාභය රාජපක්ෂ පෙනී සිටියි.

මේ පිළිබඳව FactSeeker විසින් පුළුල් විශ්ලේෂණයක් සිදු කරනු ලැබුවේ,  කුමාර සංගක්කාර තම නිල ෆේස්බුක් පිටුවේ පළ කළ පණිවුඩයක් හේතුවෙනි. ඒ ‘DARAZ / Samsung සමඟ සහයෝගයෙන් ඔහු ගැන සඳහන් ඕනෑම වෙළඳ දැන්වීමක් නොසලකා හරින ලෙසත් ඉහත වෙළඳ නාම සමඟ ඔහුට කිසිදු සම්බන්ධයක් නොමැති බවත් හෙතෙම එම පණිවුඩයේ සඳහන් කර ඇත. එමෙන්ම  සහ මෙම වීඩියෝ AI තාක්ෂණයෙන් නිර්මාණය කර ඇති බව ඔහු එහිදී වැඩිදුරටත් අනාවරණය කර ඇත.

කුමාර සංගක්කාරගේ එම වෙළඳ ප්‍රචාරණ වීඩියෝව පළ කර ඇති Promotion Daraz ෆේස්බුක් ගිණුම පරීක්ෂා කිරීමේදී මේ ආකාරයෙන් ම ක්‍රිකට් ක්‍රීඩක ලසිත් මාලිංග සහ හිටපු ජනාධිපති ගෝඨාභය රාජපක්ෂගේ මුහුණ සහිත ප්‍රචාරණ වීඩියෝ කිහිපයක් ද පළ කර තිබෙන ආකාරය FactSeeker ට නිරීක්ෂණය විය.

නමුත් මෙය Daraz ආයතනය සතු නිල ෆේස්බුක් පිටුවක් හෝ තහවුරු කරන ලද ගිණුමක් (Verified Account) නොවන බවත් පැහැදිලිවම දැකගත හැකිය. එසේම Daraz හි නිල ෆේස්බුක් පිටුව නිරීක්ෂණය කිරීමේදී,  Promotion Daraz මගින් පළ කර ඇති මෙම දැන්වීම් කිසිවක් නිල ෆේස්බුක් පිටුවේ හුවමාරු වී නොතිබීමෙන්, Promotion Daraz යනු ව්‍යාජ ලෙස නිර්මාණය කරන ලද ෆේස්බුක් පිටුවක් බවට තහවුරු විය.

මේ අනුව අදාළ වෙළඳ ප්‍රචාරණ වීඩියෝ ව්‍යාජ ලෙස සකසන ලද ඒවා ද යන්න සත්‍යාපනය කර ගැනීමට වීඩියෝවලින් ලබාගත් ඡායාරූප භාවිතයෙන්  Google AI Image checker වෙබ් අඩවිය හරහා දත්ත විශ්ලේෂණය කළේය. එහිදී ලැබූ ප්‍රතිඵල අනුව එම ප්‍රචාරණ වීඩියෝ සියල්ලක්ම 90%කට වඩා කෘත්‍රීම බුද්ධිය (AI) යොදාගනිමින් නිර්මාණය කරන ඇති බවට කරුණු සනාථ විය.

මීට අමතරව ක්‍රිකට් ක්‍රීඩක ලසිත් මාලිංග ගේ නිල ෆේස්බුක් ගිණුම පරීක්ෂා කිරීමේදී Promotion Daraz මඟින් පළ කර ඇති වීඩියෝව නිර්මාණය කිරීමට යොදාගත් සත්‍ය වීඩියෝව සොයා ගැනීමට FactSeeker ට හැකි විය. එය ක්‍රිකට් ක්‍රීඩාව සම්බන්ධයෙන් ඔහු ලද අත්දැකීම් පිළිබඳ රචිත කිලර් (Killer) නම් කෘතිය පිළිබඳ පළ කර ඇති සජිවී වීඩියෝව යොදාගනිමින් සකස් කර ඇති බව තහවුරු විය.

එම වීඩියෝව මෙතැනින්:  https://www.facebook.com/share/v/1AZ4G5dYwN/

මේ අනුව  Promotion Daraz යනු ව්‍යාජ ෆේස්බුක් ගිණුමක් බවත් ඒ ඔස්සේ  රු.680ක දීමනාවක් යටතේ Samsung Galaxy S24 Ultra වර්ගයේ ජංගම දුරකථන ලබා දෙන බව සඳහන් කරමින් ප්‍රසිද්ධ පුද්ගලයින් යොදාගනිමින් පළ කරන  ප්‍රචාරණ වීඩියෝ සියල්ලක් ම  කෘත්‍රීම බුද්ධිය (AI) ඇසුරෙන් ව්‍යාජ ලෙස නිර්මාණය කරන ලද  වීඩියෝ  බව  FactSeeker තහවුරු කරයි.