ශ්‍රී ලාංකිකයෙකු විදේශීය සංචාරකයෙකුට පහර දෙන වීඩියෝවක් ආසන්න දින කිහිප‌යේ සමාජ මාධ්‍යවල හුවමාරු ව බව FactSeeker නිරීක්ෂණය කළේය. වැලිගම ප්‍රදේශයේ සර්ෆින් පුහුණුකරුවෙකු මෙම ප්‍රහාරය සිදු කළ බව කියන අතර, සිද්ධිය සිදුවූයේ කවදාද සහ එහි සත්‍යතාව පිළිබඳ තොරතුරු ලබා දෙන ලෙස FactSeeker වෙතින් කරන ලද ඉල්ලීමකට ප්‍රතිචාර වශයෙන් FactSeeker එහි කරුණු විමර්ශනය කළේය.

හුවමාරු වන වීඩියෝව විමර්ශනය කිරීමේදී, ප්‍රහාරයට ගොදුරු වූ පුද්ගලයා පිලිපීනයේ ජනප්‍රිය යූ ටියුබ්කරුවෙකු වන ‘The Lost Joey’ නමැත්තෙක් බවත්, ඔහු පසුගිය 24 වන දින ඔහුගේ යූ ටියුබ් නාලිකාවේ එම සිද්ධියේ සම්පූර්ණ වීඩියෝව පළ කර ඇති බවත් නිරීක්ෂණය විය.

මෙම වීඩියෝව ඔහුගේ යූ ටියුබ් නාලිකාවේ පළ කිරීමෙන් පසුව සමාජ මාධ්‍ය පරිශීලකයින් එම සිද්ධියට විවිධ අර්ථකථන ලබාදෙමින් නොමගයවනසුලු ලෙස එහි කොටස් සමාජ මාධ්‍ය ඔස්සේ බෙදා ගන්නා බව අපට නිරීක්ෂණය විය.

කෙසේ වෙතත්, ‘The Lost Joey’ විසින් පළ කරන ලද වීඩියෝව හොඳින් පරීක්ෂා කිරීමේදී, එම සංචාරකයා වැලිගම පොලිස් ස්ථානයට පැමිණිල්ලක් ගොනු කරන දර්ශන ද එහි ඇතුළත් වන බව අනාවරණය කර ගැනීමට හැකි වූ අතර, වීඩියෝවේ පෙනෙන දින දර්ශනය පිරික්සීමේදී, මෙම සිදුවීම 2024 පෙබරවාරි මාසයේදී සිදු වූවක් බව තහවුරු විය.

මෙම අතරවාරයේ, ශ්‍රී ලංකා පොලිසිය නිවේදනයක් නිකුත් කරමින් කියා සිටියේ, මෙම සිදුවීම 2024 පෙබරවාරි මාසයේදී සිදු වූ බවත්, ප්‍රහාරයට ලක් වූ සංචාරකයා එදිනම වැලිගම පොලිස් ස්ථානයට පැමිණිල්ලක් ගොනු කර ඇති බවත්ය. මෑතකදී සිදු වූවක් මෙන්, සමාජ මාධ්‍යවල සංසරණය වන වීඩියෝ මගින් ජනතාව නොමඟයවන බවද නිවේදනයේ සඳහන් වේ.

තවද, ශ්‍රී ලංකාවේ සංචාරක නියෝජ්‍ය අමාත්‍ය රුවන් රණසිංහ මහතා මාධ්‍ය හමුවකදී සිද්ධිය පිළිබඳව අදහස් දැක්වීය. සමාජ මාධ්‍ය ඔස්සේ වැරදි ලෙස ප්‍රචාරය වන එවැනි වීඩියෝ හේතුවෙන් ශ්‍රී ලංකාවේ සංචාරක කර්මාන්තයට සිදුවන බලපෑම පිළිබඳව ඔහු කනස්සල්ල පළ කළේය.

ඒ අනුව, සමාජ මාධ්‍යවල හුවමාරු වන ශ්‍රී ලාංකිකයෙකු විදේශීය සංචාරකයෙකුට පහර දෙන වීඩියෝව පසුගිය වසරේ (2024) වූ සිදුවීමකට අදාළ බවත්, මෑත කාලීන සිදුවීමක් නොවන බවත් FactSeeker තහවුරු කරයි.