මෙය ප්‍රධාන ධාරාවේ මාධ්‍යවල පමණක් නොව සමාජ මාධ්‍ය හරහා ද වේගයෙන් සංසරණය වූ පුවතක් විය.

සමථ මණ්ඩල තීන්දුවකට අනුව සුනඛයෙකු ඝාතනය කිරීමට හැකිද? යන්න පිළිබඳව FactSeeker ට ඇති වූ සැකය හේතුවෙන් ඒ පිළිබඳ සත්‍ය අසත්‍යතාවය සොයා බැලීය.

මාන්කුලම් ප්‍රදේශයේ සුරතලයට ඇති කරන සුනඛයෙකු අසල්වැසි නිවසක එළුවන් සපා කෑමේ සිද්ධියක් මෙයට හේතු වී ඇත. මේ හේතුවෙන් මෙම නිවැසියන් අතර නිතර අඩ දබර ඇති වී ඇති අතර එළුවන් ඇති කරන කාන්තාව මාන්කුලම් පොලීසියට පැමිණිලි කර ඇත. පොලීසිය මෙය විසඳීම සඳහා මාන්කුලම් නගර සභාවට අයත් සමථ මණ්ඩලයට යොමු කර ඇත.

මෙම සමථ මණ්ඩල තීරණය සම්බන්ධයෙන් විවිධ සත්ව හිංසනය පිටුදැකීමේ සංවිධාන විසින්  ලිපි මඟින් ඊට අප්‍රසාදය පලකර ඇති ආකාරය ද FactSeeker ට නිරීක්ෂණය විය.

එම ලිපිවල ද සඳහන් වූයේ ද  සමථ මණ්ඩලය විසින් මෙම සුනඛයා එල්ලා මැරීමට තීරණයක් දී ඇති බවයි.

ඒ පිළිබඳ විද්‍යුත් මාධ්‍ය හි සටහන් වූ අයුරු –

https://www.facebook.com/share/v/1GeSFKbxKk/

එසේම මේ සම්බන්ධව පසුගිය 28 වන දින අරුණ පුවත්පත ද වාර්තා කර තිබුණි.

එහි සඳහන් කර තිබුණේ, මේ සම්බන්ධව සමථ මණ්ඩලයට යොමු කෙරුණු නමුත් එහිදී විසඳුමක් ලැබී නොමැති බවයි.

පසුව ඉකුත් 29 වන දින අරුණ පුවත්පතේ මේ සමබන්ධව නැවත ප්‍රවෘත්තියක් පල කර  තිබූ අතර එහි දක්වා තිබුණේ වගඋත්තරකාරියට සමථ මණ්ඩලය නියෝග කළ වන්දි මුදල ගෙවීමට නොහැකි නිසා සුනඛයාව පැමිණිලිකාර කාන්තාවට ලබා දෙන ලෙස නියෝග කර ඇති බවත් ඒ අනුව සුනඛයා රැගෙන ගොස් ඇති බවත් ය .

මෙම සිදුවීම සම්බන්ධයෙන් පොලිස් මාධ්‍ය ප්‍රකාශක බුද්ධික මනතුංග ප්‍රකාශයක් ද  නිකුත් කර තිබුණි.

සුනඛයෙකු ඝාතනය කිරීමේ සිදුවීමට අදාළ ව කාන්තාවක් අත්අඩංගුවට ගෙන ඇති බව ඔහු සඳහන් කරයි.

එය මෙතැනින් – https://www.facebook.com/share/v/1AAWEXvhwr/

මේ සම්බන්ධයෙන් FactSeeker මාන්කුලම් පොලීසියෙන් කළ විම්සීමේදී ප්‍රකාශ කළේ ,මෙම සිද්ධිය සම්බන්ධයෙන් සමථ මණ්ඩල නියෝගයක් ඇති නමුත් එහිදී නියෝග කර ඇත්තේ වන්දි මුදලක් ගෙවීමට බවයි. එය නොහැකි බව සුනඛයාගේ හිමිකාරිය පවසා ඇති අතර එසේ නම් සුනඛයා එළුවන් හිමි කාන්තාවට භාර දෙන ලෙස නියෝග කර ඇත.

ඒ අනුව එළුවන් හිමි කාන්තාව විසින් සුනඛයා රැගෙන ගොස් ඝාතනය කර ඇත. මේ පිළිබඳ තවදුරටත් මාන්කුලම් පොලීසිය විසින් විමර්ෂන කෙරෙන බවත් වැඩිදුරටත් අනාවරණය විය .

මේ අනුව මෙම පෝස්ටුවල සඳහන් පරිදි මෙය සමථ මණ්ඩලයකින් ලබා දුන් නියෝගයක් අනුව සිදුකරන ලද ඝාතනයක් නොවන බව FactSeeker තහවුරු කරයි.