මෙම වසරේදී විසිදහසක් පොලිස් සේවයෙන් විශ්‍රාම යන බව බදුල්ල දිස්ත්‍රික් පාර්ලිමේන්තු මන්ත්‍රී චාමර සම්පත් දසනායක ඉකුත් 18 වෙනිදා පාර්ලිමේන්තුවේදී ප්‍රකාශ කළේ ය.
1987,88,89,90,91 සහ 1992 වසරවලදී පොලිස් සේවයට බැඳුනු විසිදහසක් පොලිස් සේවයෙන් විශ්‍රාම යන බවත් ඊට සාපේක්ෂව පොලිස් සේවයට බඳවා ගැනීමක් සිදු නොවන බවත් මන්ත්‍රීවරයා එහිදී පැවැසීය.

මහජන ආරක්ෂාව සහ පාර්ලිමේන්තු කටයුතු අමාත්‍යංශයේ සහ ආරක්ෂක අමාත්‍යංශයේ වැය ශීර්ෂ පිළිබඳව ඉකුත් 18 දා පාර්ලිමේන්තුවේ පැවැති විවාදයේදී අදහස් දක්වමින් ඇමැතිවරයා මේ පිළිබඳ ප්‍රකාශ කළේ ය.

https://www.youtube.com/live/DvPz9mhKRtk?si=Az9Q2Vf-JI52tmN2&t=25423
චාමර සම්පත් දසනායක මන්ත්‍රීවරයා පොලිස් සේවයේ බඳවා ගැනීම් සහ විශ්‍රාම යාම් පිළිබඳව කළ අනාවරණය පිළිබඳව Factseeker කරුණු පරීක්ෂා කළේ ය.
ඒ අනුව මහජන ආරක්ෂාව සහ පාර්ලිමේන්තු කටයුතු නියෝජ්‍ය ඇමැතිවරයාගේ මාධ්‍ය ඒකකයෙන් මේ සම්බන්ධයෙන් තොරතුරු විමසුවෙමු.

එහිදී 2025 වසරේ සිට 2030 වසර දක්වා වූ ඉදිරි වසර පහ තුළ පොලිස් සේවයෙන් සහ විශේෂ කාර්ය බලක‍ායෙන් විශ්‍රාම යාම් පිළිබඳ සංඛ්‍යාලේඛන ලබා ගත හැකි විය.
එම සංඛ්‍යාලේඛනවලට අනුව ඉදිරි වසර පහ තුළ පොලිස් සේවයෙන් විශ්‍රාම යන මුළු සංඛ්‍යාව 15 223 ක් වන අතර විශේෂ කාර්ය බලකායෙන් විශ්‍රාම යන සංඛ්‍යාව 463 ක් බව සටහන් වී තිබිණි.

පොලිස් ආරක්ෂක සහායක සිට පොලිස්පති, ජ්‍යෙෂ්ඨ නියෝජ්‍ය පොලිස්පති, නියෝජ්‍ය පොලිස්පති, කාන්තා නියෝජ්‍ය පොලිස්පති, ජ්‍යෙෂ්ඨ පොලිස් අධිකාරී දක්වා විශ්‍රාම යන සංඛ්‍යාව එම ලේඛනයේ සඳහන් වේ. ඒ අනුව 2025 වසරේදී 2635 ක් ද 2026 වසරේදී 2098 ක් ද පොලිස් සේවයෙන් විශ්‍රාම යාමට නියමිත ය.

එමෙන්ම පොලිස් විශේෂ කාර්ය බලකායේ 2025 වසරේදී 72 ක් විශ්‍රාම යන අතර 2026 වසරේදී එම සංඛ්‍යාව 45 කි.
ඒ අනුව මේ වසරේ සහ ලබන වසරේ 20 000 ක් පොලිස් සේවයෙන් විශ්‍රාම යන බව චාමර සම්පත් දසනායක මන්ත්‍රීවරයා කළ ප්‍රකාශය සාවද්‍ය බව Factseeker තහවුරු කරයි.