මෙය කිසියම් නාම ලේඛයකින් උපුටා දක්වමින් හුවමාරු වී තිබිණි. මෙහි සත්‍ය අසත්‍යතාවය සොයාබැලීමට factseeker කටයුතු කළේය.

2024 වර්ෂය සඳහා නිකුත් කරන ලද සුරාබදු බලපත්‍රවල සියලුම තොරතුරු අමාත්‍ය බිමල් රත්නායක විසින් පසුගිය  දෙසැම්බර් 04 දා පාර්ලිමේන්තුවේ සභාගත කළේය. එය පසුගිය රජය විසින් ලබා දුන් බලපත්‍ර වන අතර එහි සම්පුර්ණ ලයිස්තුව පහතින් දැක්වේ.

මෙම ලයිස්තුවේ කොටසක් උපුටා ගනිමින් අදාළ පෝස්ටුව නිර්මාණය කර ඇති අතර එහි අන්තර්ගත වී ඇති ආකාරයට සබරගමුව පළාතේ රත්නපුර දිස්ත්‍රික්කයට අදාළව අබේසිංහගේ දොන් රුවන් චතුරංග අබේසිංහ වෙත සුරාබදු බලපත්‍ර ලබාදී ඇති බවට සටහනක් ඇතුළත් කර තිබේ.

“බාර් ලයිසන් ලැයිස්තුව එළියට එන්න පරක්කු වුණේ ඒකයි එහෙමනම්” ලෙස සදහන් කරමින් චතුරංග අබේසිංහ නියෝජ්‍ය අමාත්‍යවරයාගේ ඡායාරූපයක් ද සහිතව මෙම පෝස්ටු හුවාමරු වෙයි.

බිමල් රත්නායක විසින් සභාගත කරන ලද සුරාබදු බලපත්‍රවල සම්පුර්ණ ලැයිස්තුව  factseeker  පිරික්සු අතර එහි සබරගමුව පළාතේ රත්නපුර දිස්ත්‍රික්කය යටෙත් අදාළ නම සඳහන්ව ඇති බව නිරීක්ෂණය විය. මෙය නියෝජ්‍ය අමාත්‍ය චතුරංග අබේසිංහගේ නමද නැතිනම් වෙනත් අයෙකුගේද යන්න පිළිඳව තහවුරු කරගැනීමට factseeker පියවර ගත්තේ ය.

වර්තමානයේ නියෝජ්‍ය අමාත්‍ය ධුරයක් දරණ චතුරංග අබේසිංහ, ජාතික ජන බලවේගයේ කොළඹ දිස්ත්‍රික්කය නියෝජනය කරමින් පසුගිය පාර්ලිමේන්තු මැතිවරණයට ඉදිරිපත් වු අතර මැතිවරණ කොමිෂන් සභාව නිකුත් කළ ගැසට් නිවේදනය පරීක්ෂාකර බැලීමේදී ඔහුගේ නම සඳහන් වන්නේ චතුරංග අබේසිංහ යනුවෙනි. එහි අබේසිංහගේ දොන් රුවන් චතුරංග අබේසිංහ යනුවෙන් සඳහන් නොවේ. චතුරංග අබේසිංහගේ පියා කළුතර දිස්ත්‍රික්කය නියෝජනය කරමින් මැතිවරණයට ඉදිරිපත් වු අතර ඔහුගේ නම අදාළ ගැසට් නිවේදනයේ සඳහන් වන්නේ, නිහාල් අබේසිංහ යනුවෙනි.

එම ගැසට් නිවේදනය

http://documents.gov.lk/files/egz/2024/11/2410-07_S.pdf

ජාතික ජන බලවේගයේ ලේකම් ධුරය ද නිහාල් අබේසිංහ හොබවන අතර ජනාධිපතිවරණයේදී ඇපමුදල් තැන්පත් කළ නාමලේඛනයේ සහ පක්ෂයේ නිලධාරී මණ්ඩල නාමලේඛනයේ  ඔහුගේ නම සඳහන් වන්නේ මුදියන්සේලාගේ රාජා නිහාල් අබේසිංහ නමිනි.

https://elections.gov.lk/web/wp-content/uploads/media-release/MR_18_E.pdf

https://elections.gov.lk/web/wp

http://content/uploads/pdf/pol_party_list/Officers/31_13.pdf

මේ සම්බන්ධයෙන් නියෝජ්‍ය අමාත්‍ය චතුරංග අබේසිංහගෙන් factseeker කළ විමසීමේදී හෙතෙම පැවසුයේ අදාළ ලැයිස්තුවේ චතුරංග අබේසිංහ නම සහිත පුද්ගලයෙක් සිටින බවත් එය තමා නොවන බවත්ය. එලෙස සඳහන්ව ඇත්තේ වෙනත් පුද්ගලයෙකු වන අතර පැතිරයන පුවත අසත්‍ය පුවතක් බවත් චතුරංග අබේසිංහ ප්‍රකාශ කළේය.

එමෙන්ම පසුගිය පළාත් පාළන මැතිවරණය සඳහා කෝට්ටේ නගර සභාවට තරඟ කරන ලැයිස්තුව සිය ෆේස්බුක් ගිණූමේ සඳහන් කර තිබු අතර එහිදී ඔහුගේ නම මුදියන්සේලාගේ චතුරංග අබේසිංහ ලෙස සඳහන් කර තිබේ.

මෙම සියලු කරුණු නිරික්ෂණය කිරිමේදී සුරාබදු බලපත්‍ර ලබාදී ඇති බව සඳහන් කරමින් පැතිර යන  පොස්ට්වල සඳහන් වන්නේ නියෝජ්‍ය අමාත්‍ය චතුරංග අබේසිංහගේ නම නොවන බව පැහැදිලි වේ.

එමෙන්ම අදාළ ලයිස්තුවේ සඳහන් වන දොන් රුවන් චතුරංග අබේසිංහ යන පුද්ගලයා කවුරුන්ද යන්න පිළිබඳව සොයා බැලීමේදී එහු රත්නපුර පුදේශයේ මත්පැන් අලෙවිසැලක් පවත්වාගෙන යන ව්‍යාපාරිකයෙක් බව තහවුරු විය.

ඒ අනුව මත්පැන් බලපත් ලබාගත් පුද්ගලයා නියෝජ්‍ය අමාත්‍ය චතුරංග අබේසිංහ බව සඳහන් කරමින් හුවමාරු වන පෝස්ට් අසත්‍ය බව factseeker තහවුරු කරයි.