අපගේ කරුණු විමර්ශනයේදී තලපති විජේ හෝ තමිල්ගා වෙට්‍රි කසාගම් පක්ෂය වෙතින් මෙවැනි හමුවීමක් පිළිබඳ කිසිදු නිල නිවේදනයක් හෝ තහවුරු කළ හැකි සමාජ මාධ්‍ය පළකිරීම් කිසිවක් හමු නොවීය. මීට අමතරව, ජෝන් සීනා තමිල්නාඩු වික්ටරි කසාගම් හා සම්බන්ධ වීම පිළිබඳව විශ්වාසදායක පුවත් මූලාශ්‍ර කිසිවක වාර්තා වී නොතිබිණි.

මෙම නිරීක්ෂණ තුළින් ඡායාරූපයේ විශ්වසනීයත්වය පිළිබඳ සැකයක් මතු කළ අතර ඒ ඔස්සේ මෙම ඡායාරූපය පිළිබඳ තවදුරටත් සොයා බැලීමට FactSeeker කටයුතු කළේය.

ඒ අනුව, Google Reverse Image භාවිතයෙන් මීට සමාන ඡායාරූප සෙවීමකින් කරුණු කිහිපයක් තහවුරු කර ගැනීමට හැකි විය. එනම්, පසුගිය වසරේ සැප්තැම්බර් 23 වන දින ගන්නා ලද මෙහි මුල් ඡායාරූපයෙහි, හයිද්‍රාබාද්හි පැවති WWE සුපර්ස්ටාර් ස්පෙක්ටකල් (Superstar Spectacle) උත්සවයේදී ජෝන් සීනා සමඟ දමිළ නළු කාර්ති පෙනී සිටින අයුරු දැක්වේ. කාර්ති ඒ වන විට ඔහුගේ සමාජ මාධ්‍ය ගිණුම්වල මීට අදාළ ඡායාරූප පළ කර තිබුණි.

ඒ අනුව මහජනයා නොමඟ යවමින් කාර්ති වෙනුවට තලපති විජේගේ රුව සහිතව එම ඡායාරූප සංස්කරණය  තිබෙන බව පැහැදිලි වේ.

ඒ අනුව ඉහත ඡායාරූපය, මුල් ඡායාරූපය සංස්කරණය කරමින් සකස් කර ඇති ව්‍යාජ එකක් බවත්, ජෝන් සීනා තමිලග වෙට්‍රි කසාගම් (TVK – Tamilaga Vettri Kazhagam) පක්ෂය සමඟ සම්බන්ධ වී ඇති බවට වන ප්‍රකාශය සම්පූර්ණයෙන්ම අසත්‍යයක් බවත් FactSeeker තහවුරු කරයි.