දකුණු ආසියානු ජ්‍යෙෂ්ඨ මලල ක්‍රීඩා ශූරතාවලිය පසුගිය 26 වනදා අවසන් විය. වසර 17 කට පසුව පැවැත්වුණු මෙය ඉන්දියාවේ රාන්චි (Ranchi) හි බිර්සා මුණ්ඩා ක්‍රීඩාංගනයේදී දින 3ක් පුරා පැවැත්විණි. ඉන්දියාව, භූතානය, ශ්‍රී ලංකාව, නේපාලය, බංග්ලාදේශය සහ මාලදිවයින යන රටවල ක්‍රීඩකයන් මීට සහභාගී විය. එය අවසන් වූයේ පදක්කම් 58 ක් දිනා ඉන්දියාව ශූරතාවයටත් පදක්කම් 40ක් දිනා ශ්‍රී ලංකාව අනුශූරතාවයටත් පත්වෙමිණි. මෙහි කැපී පෙනෙන තරග ඉසව් වූ 100m කාන්තා සහ පිරිමි ධාවන ඉසව් වලින් රන්පදක්කම් දිනා ශ්‍රී ලංකාවේ චමෝද් යෝධසිංහ සහ සෆියා යාමික් දකුණු ආසියාවේ වේගවත්ම මිනිසා සහ කාන්තාව ලෙස වාර්තා අතරට එක්විය.

මේ අතර සමාජ මාධ්‍ය ඔස්සේ මේ පිළිබදව විවිධ අදහස් පළකිරීම් දක්නට තිබුණි. ඇතැම් තැන්හි ආසියාවේ වේගවත්ම මිනිසා සහ කාන්තාව ලෙසත් දක්වා තිබුණි. මේ අනුව මෙම තරගාවලියේ වාර්තා සහ බිඳහෙලා ඇති වාර්තා සම්බන්ධයෙන් FactSeeker විමර්ශනය කර බැලීය.

මෙම තරගාවලියේ ඉතිහාසය සහ එහි තරග වාර්තා පිළිබදව සොයා බැලීමේදී මෙම මළල ක්‍රීඩා තරඟවලිය අවසන වරට පැවැතියේ 2008 වසරේදී ය. 2025 වසරේදී මෙම තරගාවලිය පැවැත්වුණේ වසර 17 කට පසුව වීම විශේෂත්වයකි.
දකුණු ආසියාවේ වේගවත්ම මිනිසා සහ කාන්තාව ලෙස මෙම නම්කිරීම සිදුවන්නේ තරගාවලියේ අදාළ තරග ඉසව් ද්විත්වයේ ජයග්‍රාහකයින් දෙදෙනාටය. ඒ අනුව 2025 දකුණු ආසියානු ජ්‍යෙෂ්ඨ මලල ක්‍රීඩා ශූරතාවලියේ වේගවත්ම කාන්තාව සහ මිනිසා ලෙස වාර්තා පිහිටුවා ඇත. එම වාර්තා අනුව තත්පර 10.30 කින් තරගය අවසන් කර චමෝද් යෝධසිංහ දකුණු ආසියාවේ වේගවත්ම මිනිසා ලෙසත් තත්පර 11.53 ක් වාර්තා කරමින් සෆියා යාමික් දකුණු ආසියාවේ වේගවත්ම කාන්තාව ලෙසත් වාර්තා තබා ඇති බව එම උළෙලේදී නිවේදනය කරනු ලැබීය.
මීට පෙර එම වාර්තා තබා ඇත්තේ 2008 වසරේදී ඉන්දියාවේ පෝල් බාසී – තත්පර 10.51(100m පිරිමි ) සහ ශ්‍රී ලංකාවේ එච්.එම්.ජයසිංහ – තත්පර 11.66 (100m කාන්තා ) යන දෙදෙනායි. එම තරග වාර්තා බිදදමමින් 2025 වසරේ වාර්තා පිහිටුවා ඇත.
කෙසේ වෙතත් මෙම තරගාවලියට අමතරව අඩුම කාලයක් වාර්තා කළ තවත් වාර්තා හමුවිය.
හිමාෂ ඊෂාන් -2016 – දකුණු ආසියානු ක්‍රීඩා උළෙල – කාලය තත්පර 10.28
යුපුන් අබේකෝන් – 2022 – ස්විට්සර්ලන්තයේ චෝ-දෙ-ෆොන්ඩ්ස් හි පැවති Resisprint International තරගාවලිය – කාලය තත්පර 9.96
යුපුන් අබේකෝන්ගේ මෙම වාර්තාව ජාත්‍යන්තර තරගයකදී තැබූ ඉහළම දකුණු ආසියානු වාර්තාව වන අතර එය දකුණු ආසියානු කලාපයේ වේගවත්ම මිනිසා ලෙස පිළිගැනෙන නිල වාර්තාවයි.

එමෙන්ම සුසන්තිකා ජයසිංහ ද 2002 වසරේ ආසියානු ක්‍රීඩා උළෙලේදී තත්පර 11.15ක වේගයක් වාර්තා කරමින් ආසියානු ක්‍රීඩා උළෙලේ වාර්තාව පිහිටුවා ඇත. මෙම තොරතුරු ලබාගැනීමට අප කළ සොයාබැලීම් වලදී 2025.10.21 දිනට ඇති වාර්තා උපයෝගී කරගැනිණි.

ආසියාවේ වේගවත්ම මිනිසා ලෙස සු බින්ටියන් (Su Bintian) නම් චීන ජාතිකයා සැළකේ. ඔහු මෙම වාර්තාව තබා ඇත්තේ 2021 වසරේ ජපානයේ පැවති ටෝකියේ ඔලිම්පික් ක්‍රීඩා උළෙලේදීය.ආසියාවේ වේගවත්ම කාන්තාව ලෙස වාර්තා වී ඇත්තේ ලී ක්සුමේයි (Li Xuemei) නැමැති චීන ජාතික කාන්තාවයි. ඇයට එම වාර්තාව හිමි වී ඇත්තේ ෂැංහයි හි පැවති තරගයකදී තත්පර 10.79ක් වාර්තා කිරීමෙන්ය.
https://en.wikipedia.org/wiki/List_of_Asian_records_in_athletics

https://worldathletics.org/records/by-category/asian-records

මෙම තොරතුරු අනුව ආසියාවේ වේගවත්ම මිනිසා සහ කාන්තාව ලෙස සදහන් කරමින් චමෝද් යෝධසිංහගේ සහ සෆියා යාමික්ගේ වාර්තා ඇතුළත් කර සමාජ මාධ්‍ය ඔස්සේ සංසරණය වන පෝස්ටු සාවද්‍ය බව තහවුරු විය.
ඔවුන් දකුණු ආසියාවේ වේගවත්ම මිනිසා සහ කාන්තාව ලෙස වාර්තා අතරට එක්වන්නේ 2025 වසරේ දකුණු ආසියානු ජ්‍යෙෂ්ඨ මලල ක්‍රීඩා ශූරතාවලියේ 100m කාන්තා සහ පිරිමි ධාවන තරග ඉසව් ජයග්‍රහණය කිරීමෙන් සහ පැවති වාර්තා බිද දමමින් නව වාර්තා පිහිටුවීමෙන් බවත් FactSeeker තහවුරු කරගන්නා ලදී.