මිනිසුන් කිහිපදෙනෙකු එක්ව පරපෝෂිත සත්ත්වයින්ගෙන් පීඩා විදින යෝධ තල්මසෙකු බේරාගෙන එම සත්ත්වයාට උපකාර කරන ආකාරය දැක්වෙන වීඩියෝවක් ෆේස්බුක් සමාජ මාධ්‍ය තුළ වෛරස වන ආකාරය FactSeeker නිරීක්ෂණය කළේ ය.

මෙම වීඩියෝව විදෙස් රටවල සමාජ මාධ්‍ය ගිණුම් හරහා ද හුවමාරු කරගෙන තිබූ අතර තල්මසා බේරගන්නා ආකාරය සම්බන්ධයෙන් හඬපටයක් ද එහි අන්තර්ගත වී තිබුණි.

එම වීඩියෝව මෙතැනින්:

නමුත් වීඩියෝව ගැඹුරින් නිරීක්ෂණය කිරීමේදී එහි මිනිසුන්ගේ හැසිරීම්වල අස්වාභාවික ලක්ෂණ නිරීක්ෂණය වූ අතර, වීඩියෝවේ  ඇතැම් අවස්ථාවල ගුණාත්මකභාවය අවම වීම, ඇතැම් දර්ශන කැමරා දසුන්වලට සාපේක්ෂව ඉහළ ගුණාත්මක තත්ත්වයක් නිරූපණය කිරීම තුළ මෙය සත්‍ය වීඩියෝවක් ද යන්න තහවුරු කර ගැනීමට  FactSeeker කටයුතු කළේය.

ඒ අනුව වීඩියෝවෙන් ලබාගත් ඇතැම් රූපරාමු භාවිතයෙන් Google AI  Ditector මෙවලම හරහා පරීක්ෂා කිරීමේදී ලැබුණු ප්‍රතිඵල අනුව අදාළ වීඩියෝව 95%කට වැඩි ප්‍රමාණයක් කෘත්‍රීම බුද්ධිය යොදාගෙන නිර්මාණය කර ඇති බවට තහවුරු විය.

මීට අමතරව Hive Moderation මෙවලම හරහා වීඩියෝවේ සත්වයා බේරා ගැනීම පිළිබඳව විස්තර කරන හඬ පටයද නිරීක්ෂණය කළේ ය. එහිදී ලැබූ ප්‍රතිඵල අනුව ද වීඩියෝවේ හඬ පටය (Audio Track) ද 63.3%ක ප්‍රතිශතයක් ම AI තාක්ෂණය භාවිතයෙන් කරන ලද්දක් බවට කරුණු තහවුරු විය.

නමුත් එම වීඩියෝවේ අදහස් පළ කිරීම් තීරයේ මෙය සත්‍ය වීඩියෝවක් බවට විශ්වාස කරන පරිශීලකයින් දැක්වූ අදහස් කිහිපයක් ද FactSeeker නිරීක්ෂණය කළේ ය.

කෙසේ නමුත්, පුද්ගලයින් පිරිසක් විසින් තල්මසෙකු බේරාගෙන ප්‍රතිකාර කරන ආකාරය දැක්වෙන මෙම වීඩියෝව කෘත්‍රීම බුද්ධිය යොදා ගනිමින් ව්‍යාජ ලෙස සකස් කරන ලද වීඩියෝවක් බව FactSeeker තහවුරු කරයි.