ඇමෙරිකානු ජනාධිපති ඩොනල්ඩ් ට්‍රම්ප් සහ ව්‍යාපාරික ඉලෝන් මස්ක් අතර මේ දිනවල ඇතිව තිබෙන මතභේදාත්මක තත්ත්වය හමුවේ, රට තුළ ටෙස්ලා වාහන නිෂ්පාදනය තහනම් කිරීම පිළිබඳව ජනපතිවරයා සිදු කරන ප්‍රකාශයක් සහිත වීඩියෝවක් සමාජ මාධ්‍යයේ පුළුල් ලෙස සංසරණය වෙමින් පවතී.

එම වීඩියෝව මෙතැනින්.

“ජනපති ට්‍රම්ප් ටෙස්ලා තහනම් කරයි” යන මූලපද(Keyword) ඔස්සේ මේ පිළිබඳ වැඩිදුර තොරතුරු සොයා බැලීමේදී විදෙස් නිල ප්‍රවෘත්ති මූලාශ්‍රයන් තුළින් ජනාධිපතිවරයා එවැනි ක්‍රියාමාර්ගයක් ගත් බවට සඳහන් නිල ප්‍රකාශ/වාර්තා කිසිවක් නිකුත් කර නොමැති බව අපට නිරීක්ෂණය විය.

නමුත් අදාළ වීඩියෝවේ ඡායාරූප(Screenshots) Google Lens හරහා පරීක්ෂා කිරීමේදී, ධවල මන්දිරයේ නිල යූටියුබ් නාලිකාවේ, මෙම වසරේ මැයි 30 වන දින ජනපති ට්‍රම්ප් සහ ඉලොන් මස්ක් අතර මාධ්‍ය හමුවක වීඩියෝවක් අපට හමු විය.

එම වීඩියෝව මෙතැනින්.

එම වීඩියෝවේ ජනාධිපතිවරයාගේ ඇඳුම සහ සංසරණය වන වීඩියෝවේ ඔහු ඇඳ සිටින ඇඳුම සමාන බවත්, ඒ අනුව සංසරණය වන වීඩියෝව, මුල් වීඩියෝවේ පැති මාරු කර පෙරළා(Flip) සකස් කර ඇති බවත් තහවුරු විය.

එසේම සංසරණය වන වීඩියෝවේ ජනපති ට්‍රම්ප් වචන හැසිරවීමේදී මුහුණේ ඉරියව් සහ චලනයන්හි අසාමාන්‍ය ස්වභාවයක් නිරීක්ෂණය කළ හැක. ඒ අනුව අදාළ වීඩියෝව AI භාවිතයෙන් නිර්මාණය කර ඇති බව අපට පැහැදිලි විය. අදාළ වීඩියෝව Deepware වෙබ් අඩවිය හරහා විශ්ලේෂණය කිරීමේදී එම වීඩියෝව AI භාවිතයෙන් නිර්මාණය කරන ලද එකක් බව තවදුරටත් තහවුරු විය.

මේ අතර, සංසරණය වන ඇතැම් වීඩියෝවල මෙය AI භාවිතයෙන් නිර්මාණය කරන ලද බවට සඳහන් කර තිබුණ නමුත් බොහෝ පරිශීලකයින් මෙය සත්‍ය වීඩියෝවක් ලෙස තේරුම්ගනිමින් හුවමාරු කරගෙන කර ඇති බව අපට පැහැදිලි විය.

මේ අනුව ඇමෙරිකානු ජනාධිපති ඩොනල්ඩ් ට්‍රම්ප් විසින් ඇමෙරිකාවේ ටෙස්ලා නිෂ්පාදනය තහනම් කළ බවට ප්‍රකාශ කරන වීඩියෝව AI නිර්මාණයක් බවට FactSeeker තහවුරු කරයි.