අග්‍රාමාත්‍ය හරිනි අමරසූරිය , ජනප්‍රිය ක්‍රිකට් ක්‍රීඩක කුමාර් සංගක්කාර ආදී ජනප්‍රිය පුද්ගලයින්ගේ ලෙසින් සකස් කළ ව්‍යාජ වීඩියෝ සමාජ මාධ්‍ය පුරා සංසරණය වන බව FactSeeker හට නිරීක්ෂණය විය. ඒ පිළිබදව කරුණු විමර්ෂණය කර ඒවා AI තාක්ෂණය ඔස්සේ නිර්මාණය කර ඇති බව අප අනාවරණය කළේය.

නව ආදායම් මාර්ගයකින් මුදල් උපයා ගත හැකි බව අගමැතිනි හරිනි ප්‍රකාශ කරන වීඩියෝ සියල්ල අසත්‍යයි!

අලුත් ආදායම් ක්‍රමයක් පිළිබඳ කුමාර් සංගක්කාර කරන ප්‍රවර්ධන වීඩියෝව AI නිර්මාණයක්.

අදාළ වීඩියෝ හි ඩේලි මිර(ර්) ආයතනයේ නිල ලාංජනය යොදාගෙන ඇති බව විමර්ෂණ වලදී පෙනී ගිය අතර ඒ සම්බන්ධයෙන් ද විමර්ෂණය කළේය. ඒ අනුව නිල වෙබ් අඩවිය නිරික්ෂණය කිරීමේදී එහි එවැනි වීඩියෝ ඇතුළත් නොවන බවද අනාවරණය විය. කෙසේ වෙතත් තවදුරටත් මේ සම්බන්ධයෙන් සොයාබැලීමේදී සමාජ ජාල හරහා සංසරණය වන ඩේලි මිර(ර්) වෙබ් අඩවියේ යැයි දක්වන සබැදියක් (Link) නිරීක්ෂණය විය.ඒ අනුව අදාළ වෙබ් අඩවිය පරික්ෂා කෙරිණි.

මෙම වෙබ් අඩවිය ඩේලි මිර(ර්) නිල වෙබ් අඩවියට සමාන ආකාරයෙන් සකසා ඇති බව නිරීක්ෂණය විය. මෙහි ඇතුළත් පුවත් සියල්ලක්ම මුදල් ඉපයීමේ ක්‍රමයක් ප්‍රවර්ධනය වන ආකාරයට වංචනිකව ඉදිරිපත් කර තිබුණි. එහි පුවත් පළකරන්නන් ලෙසද යොදාගෙන තිබුණේ සත්‍ය ලෙසම ඩේලිමිර(ර්) ආයතනයේ සේවය කරන මාධ්‍යවේදීන්ගේ අනන්‍යතාවයන්ය. මේ නිසා අප මේ සම්බන්ධයෙන් ඩේලිමිර(ර්) ආයතනයෙන් විමසීමක් කළේය. ඒ අනුව ඩේලි මිර(ර්) නිල වෙබ් අඩවියේ ප්‍රධාන සංස්කාරක හා එම පුවත්පතේ නියේජ්‍ය කර්තෘ සුනිල් ජයසිරි පවසා සිටියේ ඔවුන්ගේ නිල වෙබ් අඩවිය https://www.dailymirror.lk/ වන බවත් අදාළ වෙබ් අඩවිය ව්‍යාජ වූවක් බවත්ය. එමෙන්ම මේ සම්බන්ධයෙන් සයිබර් අපරාධ කොට්ඨාශයට සහ අපරාධ පරීක්ෂණ දෙපාර්තමේන්තුවට පැමිණිල්ලක් ද ඉදිරිපත් කර ඇති බවද වැඩිදුරටත් සදහන් කළේය.

මේ අනුව පහසුවෙන් මුදල් ඉපයීමේ ක්‍රම සහ එවැනි වීඩියෝ ඇතුලත් කර ඇති වෙබ් අඩවිය ඩේලි මිර(ර්) වෙබ් අඩවියට සමාන ලෙසින් නිර්මාණය වූ ව්‍යාජ වෙබ් අඩවියක් බව FactSeeker තහවුරු කරගන්නා ලදී.