ජාතික ජන බලවේගයේ ජාතික විධායක සභික මවුලවි මුනීර් මුලාෆර් කළ ප්‍රකාශයක් ද?
ජාතික ජන බලවේගයේ ප්‍රතිපත්ති ප්‍රකාශනයේ ප්‍රතිපත්තිවලට කිසිදු මුස්ලිම්වරයෙකු බිය විය යුතු නැතැයි එහි ජාතික විධායක සභික මවුලවි මුනීර් මුලාෆර් කළ බව කියන ප්‍රකාශයක් Factseeker නිරීක්ෂණය කළේ ය.
by Anonymous |
සැප්තැම්බර් 2, 2024
මෙම ප්‍රවෘත්තිය හුවමාරු වන්නේ, ‘ShortNews’ වෙබ් අඩවියේ පළ කළ පුවතක් වශයෙනි.
‘ අපේ ප්‍රතිපත්ති ප්‍රකාශයේ ප්‍රධාන කාරණයක් ලෙස සමලිංගිකත්වයට (LGBTQ) ඉඩ දී තිබෙනවා. ඉස්ලාමයේ සමලිංගිකත්වය තහනම් කියලා කොතැනකවත් කියා නෑ. අපගේ ප්‍රතිපත්තියට කිසිදු මුස්ලිම් ජාතිකයෙකු බිය විය යුතු නැතැයි’ මවුලවි මුනීර් මුලාෆර් ප්‍රකාශ කළ බව එම පුවතේ සඳහන් වී ඇත.
කෙසේ වෙතත් මෙම පුවතේ සත්‍යතාව සොයා බලන ලෙස factseeker ට ඉල්ලීම් කිහිපයක් ලැබී තිබීම හේතුවෙන් මේ පිළිබඳව සොයා බැලී ය. එවැනි පුවතක් මවුලවි මුනීර් මුලාෆර් ප්‍රකාශ කර නැති අතර , ‘ShortNews ‘ වෙබ් අඩවිය ද එවැනි පුවතක් පළ කර නැති බව Factseeker ට තහවුරු කර ගැනීමට හැකි විය.
මේ සම්බන්ධයෙන් ShortNews වෙබ් අඩවියේ අධ්‍යක්ෂ මොහොමඩ් රශ්මින්ගෙන් කළ විමසීමකදී ඔහු ප්‍රකාශ කළේ, තම වෙබ් අඩවියේ එවැනි පුවතක් පළ වී නොමැති බව යි. එමෙන්ම තම වෙබ් අඩවියේ ලාංඡනය සහ නම භාවිත කරමින් එවැනි පුවතක් පළ කර ඇති බව ද ඔහු ප්‍රකාශ කළේ ය.
එමෙන්ම ShortNews වෙබ් අඩවිය මෙම ප්‍රවෘත්තිය ප්‍රතික්ෂේප කරමින් සටහනක් ද පල කර ඇත. එම සබැඳිය මෙතැනින්
එසේම ජාතික ජන බලවේගයේ ජාතික විධායක සභික මවුලවි මුනීර් මුලාෆර්ගෙන්ද මේ පිළිබඳව කළ විමසීමේදී , තමන් එවැනි කිසිදු පණිවිඩයක් කිසිදු මාධ්‍යයකට ලබාදී නොමැති බවත් හුවමාරු කර ගෙන තිබෙන ගන්නා මතය තම ස්ථාවරය නොවන බවත් හෙතෙම සඳහන් කළේ ය.
එබැවින් වට්ස්ඇප් සමූහවල හුවමාරු වන මෙම පණිවිඩය ව්‍යාජ ප්‍රවෘත්තියක් බව Factseeker තහවුරු කරයි.
