එම්.එම්. මොහොමඩ් මුනීර් බුද්ධශාසන නියෝජ්ය ඇමති ලෙස දිවුරුම් දුන්නා ද?
වත්මන් ආණ්ඩුවේ අමාත්ය මණ්ඩලය පත්කිරීමෙන් පසුව කළ පළමු අමාත්ය මණ්ඩල සංශෝධනයෙන් පසුව නව අමාත්යාංශ තුනක් සඳහා කැබිනට් අමාත්යවරුන් තිදෙනෙකු සහ නියොජ්ය අමාත්යවරුන් දසදෙනෙකු ජනාධිපති අනුර කුමාර දිසානායක ඉදිරියේ පසුගිය 10 වෙනිදා දිවුරුම් දුන්නේය.
by Anonymous |
ඔක්තෝබර් 13, 2025
මෙහිදී බුද්ධශානසන නියෝජ්ය අමාත්යධුරය සඳහා මොහොමඩ් මුනීර් මහතා පත්කළ බවට සහදහන් කරමින් විවිධ අර්ථදැක්වීම්ද සහිතව සමාජ මාධ්ය තුළ හුවමාරු වන පෝස්ට් කිහිපයක් factseeker නිරීක්ෂණය කළේ ය.
අභිනව බුද්ධශාසන නියෝජ්ය අමාත්ය මොහොමඩ් මුනීර් මැතිතුමාට සුබ පැතුම් යනුවෙන් ඔහුගේ ඡායාරූපයක් සහිතව මෙම පෝස්ට් හුවමාරුවී තිබිණ.
factseeker මේ සම්බන්ධයෙන් කරුණු සොයා බැලීමේදී මුලින්ම ජනාධිපති කාර්යාලය නිකුත් කළ ලේඛන ,ගැසට් නිවේදනය ඇතුළු පිළිගත් මාධ්ය වාර්තා වෙත අවධානය යොමු කළේ ය.
අමාත්ය මණ්ඩල සංශෝධනයක් කරන විට එයට අදාළව සංශෝධනය කරන අමාත්යාංශවල අමාත්යවරුන් ඉල්ලා අස්වන අතර එය ගැසට් නිවේදනයක් මගින් ප්රකාශයට පත් කරයි. ඒ අනුව අමාත්යවරුන් දෙදෙනක් සහ නියෝජ්ය අමාත්යවරුන් හයදෙනෙකු ඉල්ලා අස්වී ඇති බව ගැසට් නිවේදනය මගින් දක්වා ඇත. එසේ වුවද බුද්ධශාසන ආගමික කටයුතු සංස්කෘතික අමාත්යවරයා ඉල්ලා අස්වීමක් එහි සඳහන් කර නොතිබිණ.
ජාතික ඒකාබද්ධතා නියෝජ්ය අමාත්යවරයා ලෙස කටයුතු කළ එම්.එම්. මොහොමඩ් මුනීර් ඉල්ලා අස්වී ඇති එම ගැසට් නිවේදනයේ සඳහන් කර තිබු අතර ඉන් පසුව නිකුත් කළ ගැසට් නිවේදනයේ සඳහන්ව තිබුණේ, ඔහු ආගමික සහ සංස්කෘතික කටයුතු නියෝජ්ය අමාත්ය ධුරයේ දිවුරුම් දුන් බවයි.
ඒ අනුව ආගමික සහ සංස්කෘතික කටයුතු නියෝජ්ය අමාත්යධුර දෙකක් නිර්මාණය වී ඇති අතර එම්.එම්. මොහොමඩ් මුනීර් බුද්ධ ශාසන නියෝජ්ය අමාත්යවරයා ලෙස දිවුරුම් දුන් බවක් එහි සඳහන් වී නොතිබිණි.
එමෙන්ම මේ සම්බන්ධයෙන් ජනාධිපති මාධ්ය අංශ නිකුත් කළ මාධ්ය නිවේදන , රජයේ ප්රවෘත්ති දෙපාර්තමේන්තුව නිකුත් කළ මාධ්ය නිවේදන, ප්රධාන මාධ්ය වේදිකා හරහා පළ කළ ප්රවෘත්ති නිරීක්ෂණය කළ අතර ඒ කිසිවක බුද්ධ ශාසන නියෝජ්ය අමාතවරයකු පත්කර ඇති බවට සඳහන් කර නොතිබිණ.
බුද්ධශාසන, ආගමික හා සංස්කෘතික කටයුතු අමාත්යවරයා ලෙස ආචාර්ය හිනිඳුම සුනිල් සෙනෙවිගෙන් මේ සම්බන්ධයෙන් විමසීමේදී අමාත්යවරයා සඳහන් කළේ නව සංශෝධනයත් සමග අමාත්යාංශයට ආගමික හා සංස්කෘතික කටයුතු විෂය සඳහා නියෝජ්ය අමාත්යවරු දෙදෙනෙකු සිටින බවයි.
මේ අතර එම්.එම්. මොහොමඩ් මුනීර් අද (13) දිනයේදී ආගමික හා සංස්කෘතික කටයුතු නියෝජ්ය ඇමැති ලෙස මුස්ලිම් ආගමික හා සංස්කෘතික කටයුතු දෙපාර්තමේන්තුවේදී වැඩභාර ගෙන තිබිණි.
ඒ අනුව එම්.එම්. මොහොමඩ් මුනීර් බුද්ධශාසන නියෝජ්ය ඇමති ලෙස දිවුරුම් දුන් බවට හුවමාරු වන සමාජ මාධ්ය සටහන් අසත්ය බව Factseeker තහවුරු කරයි.
