මෙම රැළිය ජනාධිපති අනුර කුමාර දිසානායකගේ වත්මන් රජය මෑතකදී මෙය සංවිධානය කළ බවත්, ඒ සඳහා පොලිස් ආරක්ෂාව ද ලබා දුන් බවත් කියමින් මෙම වීඩියෝව ප‍්‍රචාරය කර ඇති බව FactSeeker නිරීක්ෂණය කළේ ය.

මෙම වීඩියෝවේ දක්වා තිබුණේ, “මුස්ලිම් ජනගහනය වැඩි මඩකලපුව නගරයේදී  ඊශ්‍රායලයට සහය පළ කරන විශාල රැළියක් පවත්වා තිබේ. අනුර රජය මෙවැනි රැළියකට අවසර ලබාදීමෙන් හා පොලිස් ආරක්ෂාවද සපයමින් මෙරට මුස්ලිම් ජනතාවට යවන පණිවිඩය කුමක්ද? මුස්ලිම් ජනතාව දැන් තේරුම් ගනියිද? අවදි වෙයිද?” යනුවෙනි.

මෙම වීඩියෝව මෙතැනින් – https://web.facebook.com/watch/?mibextid=wwXIfr&v=1253131142673116

මෙම වීඩියෝව කුමක්ද? යන්න පිළිබඳව FactSeeker සොයා බැලී ය

මෙම වීඩියෝව වැඩිදුරටත් නිරීක්ෂණය කිරීමේදී මෙම රැළියේ ඊශ්‍රායල් ජාතික කොඩිය රැගෙන සිටින පුද්ගලයින් දැකිය හැකි අතර එය ශ්‍රී ලංකාවේ පැවැත්වුණු රැළියක් බව පෙනේ.

නමුත් FactSeeker විසින් පරීක්ෂා කළ විට මෙය මෑතකදී සිදු වූවක් නොව, 2015 මැයි මාසයේදී, ජනාධිපති මෛත්‍රිපාල සිරිසේන සහ අගමැති රනිල් වික්‍රමසිංහ පාලන සමයේදී සිදු වූවක් බව Google reverse image search හරහා කළ සොයා බැලීමේදී හෙළි විය.

එම වීඩියෝව මෙතැනින් – https://www.youtube.com/watch?v=n26JX4PKoSA

ඒ අනුව ජනාධිපති අනුර කුමාර දිසානායක ප්‍රමුඛ රජයේ සහයෝගය හෝ ආරක්ෂාව ඇතිව මඩකලපුවේදී ඊශ්‍රායල හිතවාදී රැළියක් මෑතකදී පැවැත්වූ බවට කරන ප්‍රකාශය අසත්‍යය බව FactSeeker තහවුරු කරයි.

හුවමාරු වන මෙම වීඩියෝව 2015 සිට දශකයකට ආසන්න කාලයක් පැරණි වන අතර, විශේෂයෙන් මුස්ලිම් ප්‍රජාව ඉලක්ක කර ගනිමින් මහජනතාව නොමග යැවීම සඳහා  සමාජ මාධ්‍යවල අනිසි ලෙස භාවිතා කරන බව ද FactSeeker තහවුරු කරයි.