ආපදාවට ලක්වූ දරුවෙකුගේයැයි දක්වමින් සංසරණය වන වීඩියෝව නිර්මාණාත්මක රංගනයක කොටසකි.
පසුගියදා ඇතිවූ ආපදා තත්වය හේතුවෙන් ආපදාවට ලක්වූ දරුවෙකු පාසලේ දී අනෙකුත් දරුවන් ඉදිරියේ අපහසුතාවට පත්වන ආකාරයේ නොමගයවන සුලු වීඩියෝවක් සමාජ මාධ්ය ඔස්සේ සංසරණය වන බව FactSeeker නිරීක්ෂණය කළේය.
by Anonymous |
දෙසැම්බර් 18, 2025
දිට්වා සුළිකුණාටුවත් සමග මෙරට පසුගියදා ඇතිවූ ආපදා තත්ත්වයේදී විපතට පත්වූ දරුවෙකු, තමා මුහුණ දුන් අත්දැකීම රැස්වීමක දී හඩා වැටෙමින් දුක්මුසුව ඉදිරිපත් කරන ආකාරය දැක්වෙන වීඩියෝවක් සමාජ මාධ්ය ඔස්සේ සංසරණය වන බව FactSeeker හට නිරීක්ෂණය විය.
පාසැල් නිල ඇඳුමෙන් සැරසී සිටි මෙම දරුවා යම් කිසි උත්සවයකදී තමා මුහුණ දුන් දුක්බර සිදු වීම සභාවකදී පෙන්වන ආකාරය ඇතුළත් වීඩියෝවක් සමාජ මාධ්ය ඔස්සේ මෙලෙස වේගයෙන් සංසරණය වන බව අපට නිරීක්ෂණය විය.ගුරුවරු දෙදෙනෙකු විසින් මෙම පාසල් සිසුවාට එම අත්දැකීම විස්තර කිරීමට පොළඹවන ස්වභාවයක් ද එහි දක්නට ලැබුණි.
මෙම වීඩියෝවට අදහස් දක්වා තිබූ සමාජ මාධ්ය පරිශීලකයින් එය ඉතා වැරදි ක්රියාවක් බව දක්වමින් ගුරුවරුන්ට චෝදනා කරමින් අදහස් පළ කර තිබුණි. එවන් තත්ත්වයකට පත්වූ දරුවෙකු අනෙක් දරුවන් ඉදිරියේ අපහසුතාවට පත්කිරීම නොමනා ක්රියාවක් බව ද එම අදහස් දැක්වීම් වල ඇතුළත් විය.
කෙසේ නමුත් මෙම සිදුවීම සම්බන්ධයෙන් පැහැදිලි කිරීමක් සිදුවිය යුතු බවට අදාළ පාසල විසින් FactSeeekr වෙත කරනු ලැබූ ඉල්ලීමක් අනුව පාසලේ අනන්යතාවය හෙළි නොකරමින් මෙම සිදුවීම සම්බන්ධයෙන් විමර්ශනය කිරීම් සිදු කෙරිණී.
මෙම සිදුවීම සිදුවී ඇති පාසල පසුගිය දා ඇතිවූ ආපදා තත්වයට හසු නොවූ පාසලක් වන අතර මෙවැනි ක්රියාවක් සත්ය ලෙසම සිදුවී ඇත්ද? යන්න සම්බන්ධයෙන් අප කළ විමසීමේදී පාසලේ විදුහල්පතිනිය පවසා සිටියේ, එය උදෑසන රැස්වීමේ නාට්යානුසාරයෙන් කරන ලද රංගනයක් බවයි.
2025.12.16 වන දින උදෑසන රැස්වීමේදී පාසලේ වීදි නාට්ය කණ්ඩායම සහ පාසලේ ශිෂ්ය උපදේශනය භාර ගුරුවරිය හා තවත් ගුරුවරයෙකු එක්ව මෙම ඉදිරිපත් කිරීම සංවිධානය කර ඇති අතර ඊට යොදාගෙන ඇත්තේ පාසලේ වීදි නාට්ය කණ්ඩායමේ සිසුවෙකි. අදාළ සිසුවා කිසිදු ආපදා තත්ත්වයකට මුහුණ නොදුන් සිසුවෙකු බවද විදුහල්පතිවරිය කරුණු දක්වමින් සඳහන් කළාය.
පාසලේ ආපදා තත්වයකට මුහුණ දුන් සිසුන් සිටින්නේද ? යන්න සම්බන්ධයෙන් අප කළ විමසීමේදී ඇය සඳහන් කර සිටියේ සිය පාසලේ කිසිදු සිසුවෙකු මෙම ආපදා තත්ත්වයට මුහුණ නොදුන් බවත් මෙය ආපදා තත්වයට මුහුණ දුන් දරුවන්ගේ තත්ත්වය පිළිබදව සහ ආපදා තත්වය පිළිබදව දරුවන් තුළ සහකම්පනය ඇති කිරීම සදහා කරනු ලැබූවක් පමණක් බවයි .
එම උදෑසන රැස්වීම පැවැත්වීමේ දී අනුගමනය කරන ලද න්යාය පත්රයද අපට සොයා ගැනීමට හැකිවිය.
ඒ අනුව ආපදා තත්ත්වයට මුහුණ දුන් සිසුවෙකු ගුරුවරුන් විසින් අපහසුතාවයට පත්කරමින් උදෑසන රැස්වීමේ දී ඒ අවස්ථාව පැහැදිළි කරන වීඩියෝවක් බව නොවන අතර සමාජ මාධ්ය ඔස්සේ සංසරණය වු වීඩියෝව උදෑසන රැස්වීමේදී ඉදිරිපත් කළ රංගනයක කොටසක් පමණක් බවත් FactSeeker අනාවරණය කරගන්නා ලදී.
