කුමාර් සංගක්කාර විසින් “අලුත් ආදායම් ක්‍රමයක්” ලෙස හැඳින්වෙන පද්ධතියක් පිළිබඳව සමාජ මාධ්‍ය ප්‍රචාරයක වීඩියෝවක් FactSeeker ට හමු විය.
එම වීඩියෝව මෙතැනින්: https://www.facebook.com/share/1CnWN5YhYN/
මෙම වීඩියෝව ඩේලිමිරර් ලාංඡනය යටතේ ඔවුන් විසින් සමාජ මාධ්‍යයේ පළ කළ වීඩියෝවක් බව හැඟවෙන පරිදි හුවමාරු කර ගෙන තිබිණි.

මෙම වීඩියෝවට අනුව කුමාර් සංගක්කාර කියා සිටින අයුරින්, අදාළ විද්‍යුත් මුදල් පද්ධතිය සාම්ප්‍රදායික බැංකු ක්‍රමයට අභියෝගයක් වන අතර, දහස් ගණනක් ශ්‍රී ලාංකිකයන් එකතු වී රුපියල් 100 සිට රුපියල් 1,000 දක්වා මේ මගින් උපයමින් සිටින බවයි. සංගක්කාර වැඩිදුරටත් පෙන්වා දෙනුයේ, පළපුරුද්දක් අවශ්‍ය නොවන මේ වේදිකාව සෑම කෙනෙකුටම විවෘත වන අතර, එය විනිවිදභාවය සහ සාධාරණත්වය පදනම් කරගෙන ක්‍රියා කරන බවයි.

එසේම මෙම වීඩියෝවේ පෙනී සිටිමින් ඔහු සමාජ මාධ්‍ය පරිශීලකයින්ට උපදෙස් දෙනුයේ, අඩුම ගෙවීමක් ලෙස රු. 75,000ක් තැන්පත් කර මෙම ඇල්ගොරිතමය මගින් ලාබ උපයා ගන්නා ලෙසයි. එම ලාබ ඕනෑම මොහොතක ආපසු ලබා ගත හැකි බවද ඔහු කියයි.
මෙම වීඩියෝව අනුව, මේ මගින් ජනතාවට රු. 415,000 සිට රු. 1.5 මිලියන දක්වා මාසිකව නිවසේ සිටම උපයා ගත හැකි බව පෙන්වයි. මේ වැඩසටහන ශ්‍රී ලංකා ෆවුන්ඩේෂන් මගින් අනුග්‍රහය ලැබූ “නිලලත් හා සම්පූර්ණයෙන් නීති සම්මත” වැඩසටහනක් බවද දක්වා ඇත.

නමුත් මේ පිළිබඳ වැඩි දුර නිරීක්ෂණය කිරීමේදී කුමාර් සංගක්කාරගේ හඬ වෙනස් කර ඇති බව පැහැදිළිව ම දැක ගත හැකි වේ. එසේම මෙවැනි වීඩියෝවක් Dailymirror Online හි පළ වී තිබෙදැයි නිරීක්ෂණය කළ විට එවැනි වීඩියෝවක් ඩේලිමිරර් සමාජ මාධ්‍යවල පළ වී නොතිබුණ බවට ද කරුණු තහවුරු විය.

ඒ අනුව මෙම වීඩියෝවේ ව්‍යාජ ලෙස නිර්මාණය කරනු ලැබූවක් ද යන්න නිරීක්ෂණය කළ විට එය කෘත්‍රීම බුද්ධිය යොදාගනිමින් නිර්මාණය කරන ලද්දක් බවට තහවුරු කරගැනීමට FactSeeker ට හැකි විය.

වැඩි දුර නිරීක්ෂණයේදී මෙම ප්‍රවර්ධන වීඩියෝව නිර්මාණය කිරීමට යොදාගත් සත්‍ය වීඩියෝව ද අපට හමු විය. එය පසුගිය වසරේදී Star Sports යූටියුබ් නාලිකාවේ පළ වූ වීඩියෝවක් අනුසාරයෙන් නිර්මාණය කර ඇති බව මෙහිදී තහවුරු විය.
එම වීඩියෝව මෙතැනින්: https://www.youtube.com/watch?v=HJFSMxUy66g

මේ අනුව කුමාර් සංගක්කාර විසින් “අලුත් ආදායම් ක්‍රමයක්” ලෙස හඳුන්වමින් සිදු කරන ප්‍රවර්ධන වීඩියෝව AI නිර්මාණයක් බවට FactSeeker තහවුරු කරයි.