අලුත්කඩේ ඝාතනයේ තුවක්කුකරු හිටපු කමාන්ඩෝ සෙබලෙකු නොවේ
විශේෂ ගණයේ සැකකරුවෙකු වූ සංජීව කුමාර සමරරත්න හෙවත් ගණේමුල්ලේ සංජීව නමැත්තා ඊයේ (19) අලුත්කඩේ මහේස්ත්‍රාත් අධිකරණය තුළදී වෙඩි තැබීමකින් ජීවිතක්ෂයට පත් විය. මෙම ඝාතනයේ සැකකරු පුත්තලම පාලවිය ප්‍රදේශයේදී ඊයේ (19) සවස අත්අඩංගුවට ගැනිණි.
by Anonymous |
පෙබරවාරි 20, 2025
මෙම සැකකරු හිටපු කමාන්ඩෝ සෙබලෙකු ලෙස ප්‍රධාන ධාරාවේ මාධ්‍ය කිහිපයක සහ සමාජ මාධ්‍යවල හඳුන්වා තිබූ අතර ඇතැම් මාධ්‍ය වාර්තා කර තිබුණේ ඔහු හිටපු විශේෂ බලකා සෙබලෙකු ලෙසයි.
මේ පිළිබඳව සමාජ මාධ්‍ය ඔස්සේ පළ කර තිබූ ඊට පරස්පර වාර්තා නිරීක්ෂණය කිරීමෙන් පසුව FactSeeker එහි කරුණු පරීක්ෂා කළේය.
ඒ අනුව, FactSeeker මේ සම්බන්ධව ශ්‍රී ලංකා යුද්ධ හමුදාවෙන් විමසීමක් කළෙමු.
එහිදී යුද්ධ හමුදාව පාර්ශ්වයෙන් ප්‍රකාශ කළේ, මෙම පුද්ගලයා කමාන්ඩෝ රෙජිමේන්තුවේ සෙබලෙකු ලෙස පුහුණුවට එක් වී සිටි අයෙකු බවයි. පසුව ඔහු එම පුහුණුව අතරතුර පලාගොස් ඇත. හමුදා සෙබලුන් සඳහා ලබාදුන් පොදු සමා කාලයක් තුළදී ඔහු නැවත අදාළ රෙජිමේන්තුවට භාර වී ඇති අතර පසුව නීත්‍යනුකුලව ඉන් ඉවත් වී ඇත.
ඒ අනුව, මෙම සැකකාර තැනැත්තා කමාන්ඩෝ පුහුණුව සඳහා සම්බන්ධ වී සිට ඉන් පලාගොස් පසුව නීත්‍යනුකුලව යුද්ධ හමුදා සේවයෙන් ඉවත් කරනු ලැබූවෙකු බව FactSeeker වෙත තහවුරු විය.
ඒ අනුව, සමාජ මාධ්‍ය හා ප්‍රධාන මාධ්‍ය හරහා දක්වා ඇති ආකාරයට මෙම සැකකරු හිටපු කමාන්ඩෝ සෙබලෙකු නොවන බවත් අදාළ මාධ්‍ය වාර්තා නොමගයවනසුලු බවත් FactSeeker තහවුරු කරයි.
