අගමැතිනි හරිනි අමරසූරිය සහ අමාත්‍ය විජිත හේරත්ගේ සමරු මුද්දර
ජාත්‍යන්තර තැපැල් දිනයට සමගාමීව අග්‍රාමාත්‍ය හරිනි අමරසූරිය සහ අමාත්‍ය විජිත හේරත්ගේ මුහුණු සහිතව නිකුත් කළ මුද්දර බව දැක්වෙන ඡායාරූප පෙළක් සමාජ මාධ්‍ය පුරා සංසරණය වෙමින් පැවතුණි.
by Anonymous |
ඔක්තෝබර් 10, 2024
ඔක්තෝබර් 09 වෙනි දිනට යෙදී තිබූ ජාත්‍යන්තර තැපැල් දිනය නිමිත්තෙන් සමරු මුද්දර තුනක් සහ QR කේතය සහිත මතක සැමරුම් මුද්දර දෙකක් ඊයේ (09) නිකුත් කළ බවට වන ප්‍රවෘත්ති වාර්තා කර තිබිණි.
එවැනි පෝස්ට් කිහිපයක් මෙතැනින්.
https://www.facebook.com/share/p/gd86jJdpZBA45dht/
https://www.facebook.com/share/p/foT5kdG9mcrZS95Z/
https://www.facebook.com/share/p/Xd1h3WDWA2FER7tX/
මෙම සිදුවීම පිළිබඳ ප්‍රධාන ධාරාවේ මාධ්‍ය කිහිමයකම පුවත් පළ වී තිබුණ ද සමාජ මාධ්‍ය තුළ මෙය මහත් ආන්දෝලනයක් ඇති කළ සිදුවීමක් විය.
මේ පිළිබඳව වැඩිදුර තොරතුරු නිරීක්ෂණය කිරීමේදී අග්‍රාමාත්‍ය කාර්යාලයේ නිල වෙබ් අඩවියේ මේ සම්බන්ධයෙන් ප්‍රවෘත්තියක් පළ කර තිබූ අතර එහි අගමැතිවරිය විසින් මෙම සමරු මුද්දර ලබා ගන්නා අවස්ථාව දැක්වෙන ඡායාරූපයක් ද පළ කර තිබිණි.
එම සබැඳිය –
ආන්දෝලනයට ලක් ව ඇති මෙම සමරු මුද්දර නිකුත් කිරීම සම්බන්ධයෙන් තැපැල් දෙපාර්තමේන්තුව නිවේදනයක් ද නිකුත් කර ඇත.
2024 ලෝක තැපැල් දින සමරු මුද්දරය සහ විශ්ව තැපැල් සංගමයේ 150 වෙනි සංවත්සරය වෙනුවෙන් නිකුත් කරන ලද මුද්දරය සමරු මුද්දර උත්සවයේ ආරාධිතයින් දෙපළට තිළිණ කළ මුද්දර පුද්ගලකාරක මුද්දර කාණ්ඩයටත් , අයත් වන බව එම නිවේදනයේ සඳහන් වෙයි. එමෙන්ම එදිනෙදා තැපැල් කටයුතු සඳහා නිකුත් කරන මුද්දර නිත්‍ය කාණ්ඩයට අයත් වෙයි.
පුද්ගලකාරක මුද්දර ඕනෑම පුද්ගලයෙකුට තමා කැමති රුවක් මුද්‍රණය කර ලබා ගැනීමට හැකියාව පවතින අතර තැපැල් දෙපාර්තමේන්තුව සම්ප්‍රදායක් ලෙස විශේෂ අවස්ථාවන්හිදී පුද්ගලකාරක මුද්දර, සිහිවටන ලෙස ලබා දෙන බව ද එම නිවේදනයේ සඳහන් වෙයි.
එසේම මෙම මුද්දර අගමැතිනි හරිනි අමරසූරියගේ හෝ ඇමැති විජිත හේරත්ගේ ඉල්ලීම පරිදි නිකුත් නොකළ බවත් තැපැල් දෙපාර්තමේන්තුවේ තිළිණයක් ලෙස ඔවුන්ට ප්‍රදානය කළ බවත් එම නිවේදනයේ වැඩිදුරටත් සඳහන් කර තිබේ.
මේ අනුව ඊයේ දිනට යෙදී තිබූ ජාත්‍යන්තර තැපැල් දිනයට සමගාමීව, විශ්ව තැපැල් සංගමයට වසර 150ක් පිරීම නිමිත්තෙන් වත්මන් අග්‍රාමාත්‍ය හරිනි අමරසූරිය සහ අමාත්‍ය විජිත හේරත්ගේ මුහුණු සහිතව සිහිවටන මුද්දර නිකුත් කර ඇති බව FactSeekers තහවුරු කරයි.
