̒මව්බිම පුවත්පතේ ප්‍රවාත්තියේ යම්කිසි වරදක් සිදු වී ඇති බව Factseeker ට නිරීක්ෂණය වීම නිසා ඒ පිළිබඳ සොයා බැලීය.

මෙම ප්‍රවෘත්තිය මව්බිම පුවත්පතේ මුල් පිටුවේ පළ කර තිබුණේ, “අනුරට, 57 40 179 – 55.89%  සජිත්ට, 45 30 982 – සියයට 44.11%” ලෙසයි.

එහෙත් මෙම ප්‍රවෘත්තියේ ඇතුල් පිටුවේ වැඩි විස්තර වශයෙන් පළ කර තිබුණේ,

“පළමු වටයේදී ඡන්ද 5,634,915 ක් ලබා ගෙන 42.31ක ඡන්ද ප්‍රතිශතයක් හිමිකරගෙන සිටි අනුර කුමාර දිසානායක මහතා දෙවන වටයේදී තවත් මනාප 105,264ක් ලබා ගනිමින් සමස්ත ඡන්ද අගය 5,740,179ක් (55.89) ලෙස ඉහළ නංවාගෙන මෙම ජයග්‍රහණය සනිටුහන් කළේය.” යනුවෙනි.

සජිත් ප්‍රේමදාස මහතාගේ සමස්ථ ප්‍රතිඵලය ලෙස දක්වා ඇත්තේ “පළමු වටයේ දී සමගි ජන බලවේගයේ අපේක්ෂක සජිත් ප්‍රේමදාස මහතා ඡන්ද 4,363,035ක් ලබාගෙන 32.76%ක ප්‍රතිශතයක් හිමිකරගෙන දෙවැනි තැනට පත්විය. දෙවැනි වටයේ මනාප ගණනයෙන් පසුව ද සජිත් ප්‍රේමදාස මහතාගේ මනාප ඡන්ද සංඛ්‍යාව වූයේ 4,530,902කි. එහි ප්‍රතිශතය 44.11%කි.” යනුවෙනි.

මේ සම්බන්ධයෙන් ප්‍රථමයෙන් මැතිවරණ කොමිෂන් සභාව විසින් ඉදිරිපත් කළ ඡන්ද ප්‍රතිඵල සටහන නිරීක්ෂණය කළ අතර එහි අවසන් ප්‍රතිඵලය සටහන් කර තිබුණ ද ප්‍රතිශතය දක්වා නොමැති බව දක්නට ලැබුණි.

අන්තර්ජාලය පිරික්සීමේදී විකිපීඩියා තුළද මෙම වැරදි  ප්‍රතිශතයන් ඇතුළත් වී ඇති බව නිරීක්ෂණය කළ හැකි විය.

දෙවනි මනාපය සම්බන්ධව වෙබ් අඩවිවල සමස්ථ ප්‍රතිඵලයේ ප්‍රතිශතය ලෙස වාර්තා කර තිබූ අතර එහි  එය ඉතා කුඩා ප්‍රමාණයක් බව දක්වා ඇත.

අනුර කුමාර දිසානායක – 0.79%

සජිත් ප්‍රේමදාස – 1.26%

https://manthri.lk/en/presidential-election-result-2024

කෙසේ වෙතත් මැතිවරණ කොමිෂන් සභාවේ නිල වෙබ් අඩවියේ අවසන් වරට ඉදිරිපත් කරන ලද ප්‍රතිඵල සටහනේ ප්‍රතිශතයන් දක්වා ඇත්තේ, දෙවන හා තුන වන මනාප ගණන් කිරීමට පෙර පැවැති ප්‍රතිඵල සටහන ය. ඒ අනුර කුමාර දිසානායක – 42.31%සජිත් ප්‍රේමදාස – 32.76% ලෙසය.

මෙයින් කිසිවෙක් 50%ක සීමාව පසුකර නැති බව පැහැදිලි වේ.

ඒ අනුව ̒මව්බිම පුවත්පතේ මුල් පිටුවේ සඳහන් මෙම පුවත නිවැරදි නොවන බව Factseeker තහවුරු කරයි.