මෙහි සත්‍ය අසත්‍යතාව පිළිබඳව  FactSeeker සොයා බැලුවෙමු.

එහිදී අනාවරණය වූයේ, මෙම සිදුවීම ඉකුත් 13 වන දින සමන්තුරෙයිහි දී පැවති ජාතික ජන බලවේග රැළියකදී වූ සිදුවීමක් බවයි.

සමාජ මාධ්‍ය ඔස්සේ හුවමාරු වන වීඩියෝවේ ඉහළ අහසේ යම් සැක කටයුතු යමක් පිළිබඳව සංවිධායකයින් විමසිලිමත් වන ආකාරයක් අපට දැකගත හැකි විය. එමෙන් ම සුළු වේලාවකට අනුර කුමාර දිසානායක ද සිය කතාව නතර කර ආරක්ෂා වන ආකාරයක් ද පෙනෙයි.

අනතුරුව අනුර කුමාර දිසානායක පිරිස සන්සුන් කර සිය කතාව පවත්වා අවසන් කර එම ස්ථානයෙන් බැහැර වන ආකාරයද එම එක් වීඩියෝවක දැක්විණි.

එම වීඩියෝව මෙතැනින් – https://youtu.be/RjwtG9P7kvA?si=cnwpGhUbIGqiXEPc

ජාතික ජනබලවේගයේ සමන්තුරෙයි රැලියේ සංවිධායක මණ්ඩලයේ සාමාජිකයෙකු මෙම සිදුවීම සම්බන්ධයෙන් FactSeeker වෙත අදහස් දැක්වීය. ඔහු ප්‍රකාශ කළේ, ඉහළ අහසේ ගමන් කළ වස්තුව ඩ්‍රෝන යානාවක් බවට ඔවුන් මුලින් සැක පළ කළ ද පසුව ඒ කුරුල්ලෙකු බව හඳුනාගත් බවයි.

මේ පිළිබඳව සමන්තුරෙයි පොලිස් ස්ථානයෙන් අප කළ විමසීමකදී එහි ස්ථානාධිපති ප්‍රධාන පොලිස් පරීක්ෂක කේ.ඩී.එස්. ජයලත් සඳහන් කළේ, ඔහු ඇතුළු නිලධාරීන් මෙම සිදුවීම සිදුවන අවස්ථාවේ එහි රැඳී සිටි බවයි. එහිදී කිසිදු ගල් ප්‍රහාරයක් හෝ මැර ප්‍රහාරයක් සිදු නොවූ බව ඔහු තහවුරු කළේය.

එමෙන්ම කිසිදු ඩ්‍රෝන යානයක් එහි පියාසර නොකළ බවත් කුඩා එළියක් දල්වමින් අහසේ පියාසර කළ පරෙවියෙකු නිසා යම්කිසි නොසන්සුන්තාවක් ඇති වූ බව ත් ඔහු ප්‍රකාශ කළේය.

එම ප්‍රදේශයේ දරුවන් පරෙවියන් යොදාගෙන උන්ගේ කකුල්වල LED පරිපථ ගැට ගසා පියාසර කරවන බවත්, එය එම ප්‍රදේශයේ සාමාන්‍ය විනෝද ක්‍රියාකාරකමක් බවත් පැවසූ ස්ථානාධිපතිවරයා එහි සිටි පරෙවියන් දෙදෙනෙකු අල්ලාගෙන පරීක්ෂා කළ අතර එහිදී සැකකටයුතු කිසිවක් හමු නොවූ බවත් පෙන්වා දුන්නේය.

ඒ අනුව සමාජ මාධ්‍යයේ සංසරණය වන වීඩියෝව එම අනුර කුමාර දිසානායකගේ ජන රැළියට එල්ල වූ ගල් ප්‍රහාරයක් හෝ මැර ප්‍රහාරයක් නොවන බව FactSeeker තහවුරු කරයි.