මහාචාර්ය මෙත්තිකා විතානගේ සජිත් ප්‍රේමදාසට සහය දෙනවාද?
ශ්‍රී ජයවර්ධනපුර විශ්වවිද්‍යාලයේ ව්‍යවහාරික විද්‍යා පීඨයේ ජ්‍යේෂ්ඨ කථිකාචාර්ය මහාචාර්ය මෙත්තිකා විතානගේ මෙවර ජනාධිපතිවරණයේදී සමගි ජන සන්ධානය ජනාධිපති ධුර අපේක්ෂක සජිත් ප්‍රේමදාසට සහයෝගය පළ කරන බව දැක්වෙන සමාජ මාධ්‍ය සටහනක් FactSeeker අපගේ අවධානයට යොමු විය.
by Anonymous |
සැප්තැම්බර් 4, 2024
ඒ බව සඳහන් පෝස්ටුවේ දැක්වුණේ “ශ්‍රී ජයවර්ධනපුර විශ්වවිද්‍යාලයේ ව්‍යවහාරික විද්‍යා පීඨයේ ජ්‍යේෂ්ඨ කථිකාචාර්ය මහාචාර්ය මෙත්තිකා විතානගේ සමගි ජන බලවේගයේ ජනාධිපති අපේක්ෂකයාට සහාය පළ කිරීමට තීරණය කර තිබේ.“ යනුවෙනි.
මෙහි සත්‍ය අසත්‍යතාව සනාථ කරගැනීම සඳහා FactSeeker මහාචාර්ය මෙත්තිකා විතානගේගෙන් මේ පිළිබඳව විමසීමක් කළෙමු. එහිදී ඇය සඳහන් කළේ ජීවිතයේ කිසිදිනක තමා සජිත් ප්‍රේමදාස මුණගැසී නොමැති බවයි. මෙම පෝස්ටුවේ ඇතුළත් ඡායාරූපය ව්‍යාජ ලෙස සැකසූ එකක් බව ඇය තහවුරු කළාය.
තවද සංස්කරණය සඳහා යොදාගනු ලැබූ ඇය පෙනී සිටි මුල් ඡායාරූපය ද සොයා ගත හැකි විය. එය 2024.03.28 දින ජාතික මූලික අධ්‍යයන ආයතනයේ වාර්ෂික පර්යේෂණ සමුළුවේදී ඇය ලබාගත් ඡායාරූපයක් වූ අතර එය ජාතික මූලික අධ්‍යයන ආයතනයේ නිල ෆේස්බුක් පිටුවේද පළ කර තිබිණි.
මේ සම්බන්ධයෙන් සමගි ජන බලවේගයේ මාධ්‍ය ඒකකයෙන් අප කළ විමසීමේදී එම පුවතේ කිසිදු සත්‍යතාවක් නොමැති බව එම පාර්ශ්වය විසින්ද තහවුරු කරනු ලැබීය.
ඒ අනුව, මහාචාර්ය මෙත්තිකා විතානගේ මෙවර ජනාධිපතිවරණයේදී සජිත් ප්‍රේමදාසට සහයෝගය ලබාදීමට තීරණය කර තිබේ යනුවෙන් සංසරණය වන පෝස්ටුව අසත්‍ය බව FactSeeker තහවුරු කරයි.
