මෙම අපේක්ෂකයින් සම්බන්ධයෙන් ප්‍රධාන ධාරා‌වේ මාධ්‍යවල පමණක් නොව සමාජ මාධ්‍යවල කතා බහට ලක් විය. එමෙන්ම ඔවුන් දෙදෙනාගේ නම ඡන්ද දායකයින් නොමග යන ආකාරයට පවතින නිසා මේ පිළිබද පැහැදිළි කරන ලෙස Factseeker පාඨකයින්ගෙන් ඉල්ලීම් ද ඉදිරිපත් වී තිබිණි. පාඨකයින්ගේ කාරුණික ඉල්ලීම මත මෙය පැහැදිළි කිරීමට Factseeker අදහස් කළෙමු.

නාමල් රාජපක්ෂ –

දේශපාලන පක්ෂය – ශ්‍රී ලංකා පොදුජන පෙරමුණ

ඡන්ද ලකුණ – පොහොට්ටුව

මෙවර ජනාධිපතිවරණයට ඉදිරිපත් වන එක් නාමල් රාජපක්ෂ කෙනෙකු වන්නේ, ලක්ෂ්මන් නාමල් රාජපක්ෂයි. ඔහු ̒පොහොට්ටුව̕ ලකුණ යටතේ ශ්‍රී ලංකා පොදුජන පෙරමුණෙන් තරග කරයි.  නාමල් රාජපක්ෂ යන නමින් ප්‍රචලිත ඔහු හිටපු ජනාධිපති මහින්ද රාජපක්ෂගේ පුත්‍රයායි. එමෙන්ම ඔහු 2010 පාර්ලිමේන්තු මැතිවරණයේදී එක්සත් ජනතා නිදහස් සන්ධානයේ හම්බන්තොට දිස්ත්‍රික්කයෙන් තරග කර පාර්ලිමේන්තුවට තේරී පත් විය. ඔහු වත්මන් පාර්ලිමේන්තුවේ ද මන්ත්‍රීවරයෙක් වන අතර අමාත්‍යංශ කිහිපයක ම කැබිනට් අමාත්‍ය ධූර දැරූ අයෙකි.

මැතිවරණ කොමිෂන් සභාව ප්‍රකාශයට පත් කළ ජනාධිපතිවරණය සදහා ඇප තැන්පත් කළ අපේක්ෂකයින්ගේ නාමලේඛනයේ ලක්ෂ්මන් නාමල් රාජපක්ෂ ලෙස සදහන් වෙයි. https://elections.gov.lk/web/wp-content/uploads/media-release/2024/PRE_2024_37_S.pdf නමුත් මැතිවරණ කොමිෂන් සභාව නිකුත් කළ නාමයෝජනා භාර දුන් අයගේ නාමලේඛනයේ සදහන් වන්නේ නාමල් රාජපක්ෂ යනුවෙනි. https://elections.gov.lk/web/wp-content/uploads/media-release/2024/PRE_2024_32_S.pdf

නාමල් රාජපක්‍ෂ

දේශපාලන පක්ෂය – සමබිම පක්ෂය

ඡන්ද ලකුණ – ලියුම් කවරය

මෙවර ජනාධිපතිවරණයේ අනෙක් නාමල් රාජපක්ෂ වන්නේ, සමබිම පක්ෂයේ ජනාධිපති අපේකෂක ලෙස තරග කරන රාජපක්ෂ ආරච්චිලාගේ නාමල් අජිත් රාජපක්‍ෂ ය. ඔහු වෘත්තියෙන් නීතීඥවරයෙකි. ඔහුගේ ඡන්ද ලකුණ වන්නේ ලියුම් කවරයයි.

මැතිවරණ කොමිෂන් සභාව විසින් ප්‍රකාශයට පත් කළ අපේක්ෂකයින්ගේ ඇප මුදල් තැන්පත් කිරීමේ නාමලේඛනයේ සදහන් වන්නේ නාමල් රාජපක්ෂ නමිනි. නමුත් නාමයෝජනා භාර දීමෙන් පසුව මැතිවරණ කොමිෂන් සභාව ඉදිරිපත් කළ නාමලේඛනයේ ඔහුගේ නම සදහන් වන්නේ “නාමල් රාජපක්‍ෂ” ලෙස බැදි අකුරෙනි.

නමුත් මොවුන් දෙදෙනා එකම නමකින් පෙනී සිටිය ද නම්  ලියන ආකාරය වෙනස් ය. ඒ හිටපු අමාත්‍ය නාමල් රාජපක්ෂ “නාමල් රාජපක්ෂ” යනුවෙන් මේ ආකාරයට නම ලියන අතර නීතීඥ නාමල් රාජපක්ෂ “නාමල් රාජපක්‍ෂ” ලෙස බැදි අකුරුවලින් සිය නම ලියයි.නාම යෝජනා ලැයිස්තුවේ සදහන් වන්නේ ඒ ආකාරයෙනි.