පවතින අධික උණුසුම් කාලගුණය ක්‍රමයෙන් වැඩිවෙමින් පවතින අතර උණුසුම් කාලගුණයෙන් හානියක් නොවී ආරක්ෂා සහිතව සිටීමට සෞඛ්‍ය අමාත්‍යංශය උපදෙස් ලබාදී තිබේ. මේ අතර උණුසුම් කාලගුණය සම්බන්ධ විවිධ පණිවිඩ ඇතුළත් කරමින් සමාජ මාධ්‍ය පෝස්ට් හුවමාරු වන බව factseeker නිරීක්ෂණය කළ අතර සිංහල ඉංග්‍රීසි දෙමල භාෂාවලින් හුවමාරු වන මෙම පණිවිඩවල සත්‍යතාවය තහවුරු කරගැනීමට factseeker කටයුතු කළේය .

උෂ්ණත්වය සෙල්සියස් අංශක 50 දක්වා වැඩිවෙලාද?

කාලගුණ විද්‍යා දෙපාර්තමේන්තුවේ කාලගුණික දත්ත උපයෝගී කර ගනිමින් වසර ගණනාවක ලංකාවේ විවිධ නගරවල වාර්ෂිකව වැඩිම උෂ්ණත්වය වාර්තා වන මාස සහ උෂ්ණත්ව පරාස පිළිබඳව නිරීක්ෂණය කළ අතර ඒ තුළ එවැන්නක් වාර්තා වී නැත.
මේ දිනවල වාර්තා වන උෂ්ණත්වයට සමාන අගයට වඩා වැඩී වී ඇති අතර එය සෙල්සියස් අංශක 40 ඉක්මවා ගොස් නැත.
උදාහරණයක් ලෙස කොළඹ වැඩිම උෂ්ණත්වය වාර්තා වන්නේ මාර්තු මාසයේ වන අතර එය සෙල්සියස් අංශක 32 කි. නමුත් පසුගිය බදාදා (28) බ්‍රහස්පතින්දා (29) සිකුරාදා (30) යන දින තුන තුළ ශ්‍රී ලංකාවේ වැඩිම උෂ්ණත්වය කොළඹින් වාර්තා වූ අතර එම උෂ්ණත්වය සෙල්සියස් අංශක 36.8 කි . මාර්තු 02 සෙනසුරාදා වැඩිම උෂ්ණත්වය කුරුණෑගලින් වාර්තා වූ අතර එය සෙල්සියස් අංශක 36.8 කි. උෂ්ණත්වය සෙල්සියස් අංශක 40 ට වඩා වැඩිව ඇති බව පැවසීම ඒ අනුව අසත්‍යකි.
පසුගිය වසර 30 තුළ ලංකාවේ විවිධ ප්‍රදේශවල වැඩිම උෂ්ණත්වය වාර්තා වී ඇති මාස සහ එම අගයන් සදහන් කර ඇති දත්ත දෙස අවධානය යොමු කිරීමෙන් මෙය වඩාත් පැහැදිලි වේ.

ප්‍රදේශය                     මාසය                             උෂ්ණත්වය

බණ්ඩාරවෙල               මැයි                                     27
යාපනය                    අප්‍රේල්                                   38.8
මන්නාරම                  අප්‍රේල්                                   33.1
වව්නියාව                  අප්‍රේල්                                   34.9
ත්‍රිකුණාමලය               ජුනි                                      35.4
අනුරාධපුරය               මාර්තු                                    34.8
මහඉලුප්පල්ලම           අප්‍රේල්                                   34.0
පුත්තලම                  මාර්තු                                    33.5
මඩකලපුව                ජුනි                                      34.5
කුරුණෑගල               මාර්තු                                    35.0
කටුනායක                මාර්තු                                    32.7
කොළඹ                   මාර්තු                                    32.0
නුවර එළිය               අප්‍රේල්                                   22.5
බදුල්ල                   අගෝස්තු                                 31.2
රත්නපුර                 මාර්තු                                    34.2
ගාල්ල                   මාර්තු                                    31.6
හම්බන්තොට           අප්‍රේල්                                   31.9
පොතුවිල්               ජුනී                                      35.0
මාතර                   ජුලි                                      34.1
මොනරාගල            ජූලි                                      35.0
පොලොන්නරුව       අගෝස්තු                                35.7

එමෙන්ම ඉදිරි දින කිහිපය තුළ ද වයඹ බස්නාහිර දකුණු පළාත් සහ රත්නපුර දිස්ත්‍රික්කයේ ඉහළ උෂ්ණත්වයක් අපේක්ෂා කරන බව ද කාලගුණ විද්‍යා දෙපාර්තමේන්තුව සදහන් කර තිබේ.

මේ සම්බන්ධයෙන් කාලගුණ විද්‍යා දෙපාර්තමේන්තුවේ අධ්‍යක්ෂ ජනරාල් අතුල කරුණානායක මහතාගේන් විමසීමේදී ඔහු පැවැසුවේ, පසුගිය වසර කිහිපය සමග සන්සන්ධනය කළහොත් මේ වසරේ අධික උණුසුම් කාලගුණයේ වැඩිවීමක් තිබෙන බවය. එයට ප්‍රධාන හේතු කිහිපයක් පවතින බව පැවැසූ ඔහු මීට පෙර වසරවල සිටම කතා කරපු “එල්නිනෝ” තත්ත්වය එයට ප්‍රධානතම හේතුවක් බව ද පැවැසීය.

අධික උෂ්ණත්වය නිසා ඇතිවන සෞඛ්‍ය ගැටලු මගහරවා ගැනීමට ජනතාව කටයුතු කළ යුතු ආකාරය සම්බන්ධයෙන් සෞඛ්‍යය ප්‍රවර්ධන කාර්යංශය විසින් මාර්ගෝපදේශ නිකුත් කර ඇති අතර ඒවා මෙසේය

1. පිපාසය දැනෙන තෙක් නොසිට නිතර නිතර හැකිතාක් ජලය පානය කිරීම (වැඩිහිටි කෙනෙකුට අවම වශයෙන් දිනකට ලීටර 2.5ක් වත්)

2. පිපාසයට, ජලය වෙනුවට පැණි බීම පානය කිරීමෙන් වැළකීම

3. පෙරවරු 11 සිට පස්වරු 3 දක්වා අධික හිරු රශ්මියට නිරාවරණය වෙමින් ගත කරන කාලය අවම කිරීම

4. හැකි පමණ ලා පැහැති සැහැල්ලු කපු ඇඳුම්වලට යොමු වීම

5. එළිමහනෙහි ගැවසීමේදී කුඩ සහ තොප්පි භාවිතයට (hats) හැකිතාක් යොමුවීම

6. වයෝවෘද්ධ හෝ රෝගී පුද්ගලයන් මෙන්ම කුඩා දරුවන් මේ තත්ත්වය යටතේ පීඩාවට ලක්වීමේ අවධානම වැඩි බැවින් ඔවුන් පිළිබඳ විශේෂයෙන් විමසිලිමත් වීම

බස්නාහිර, වයඹ, උතුරු, උතුරු මැද සහ නැගෙනහිර පළාත්වලට සහ මොණරාගල මෙන්ම හම්බන්තොට දිස්ත්‍රික්ක සඳහා මෙම තත්වය වඩාත් දරුණු ලෙස බලපා තිබෙනවා.
මෙම උෂ්ණත්වය අධික වකවානුවේ තමන්ගේ මෙන්ම අන් අයගේ ද යහ පැවැත්ම උදෙසා ඉහත කරුණු පිළිබඳව සැලකිලිමත් වන ලෙස ඔබට අප යළිත් සිහිපත් කරමු.

මේ අනුව සමාජ මාධ්‍ය හරහා කාලගුණය සම්බන්ධයෙන් වැරදි තොරතුරු මෙන්ම සහ නිවැරදි තොරතුරු ද හුවමාරු වන බැවින් ඒ පිළිබඳ අවධානයෙන් පසුවන ලෙස factseeker ජනතාවට දැනුම් දෙයි