ප්‍රවීණ රංගන ශිල්පිනියක වන අයිරාංගනී සේරසිංහ මහත්මිය මිය ගොස් ඇති බවත් ඇයට නිවන් සුව පතමිනුත් මෙම පෝස්ටු සංසරණය වී තිබුණි.
එමෙන්ම ඇය මෙරට කලා ක්ෂේත්‍රයට කළ අනුපමේය සේවය අගයමින් බොහෝ දෙනෙකු මේ සම්බන්ධයෙන් සමාජ මාධ්‍ය ඔස්සේ සිය සංවේගය පළ කර තිබූ අතරම ඇතැම් පිරිස් ඇය මිය ගිය බව කියන පුවත අසත්‍ය බව දක්වා තිබුණි.

ඇත්තෙන්ම ඇය මිය ගියේද? යන්න පිළිබදව FactSeeker සොයා බැලීය.
ඒ අනුව අයිරාංගනී සේරසිංහ මහත්මිය මිය යාම සම්බන්ධයෙන් නිල වශයෙන් හෝ විශ්වාසදායක ලෙස තහවුරු කළ හැකි පළ කිරීමක් ඇත්ද යන්න සොයා බැලූ නමුත් එවැන්නක් නිරීක්ෂණය නොවුණි. එමෙන්ම එම පුවත සමාජ මාධ්‍ය ඔස්සේ සංසරණය වී පැය කිහිපයක් ගත වන විටම එම පුවත සාවද්‍ය බවත් ඇය නිරෝගී සුවයෙන් සිටින බවටත් බොහෝ රංගන ශිල්පීන් විසින් තහවුරු කොට තිබුණි. එමෙන්ම දැනට 98 වියෙහි පසුවන ඇයට දීර්ඝායුෂ ද පතා තිබුණි.

මේ සම්බන්ධයෙන් ඇගේ සමීපතමයෙකු හා ලේඛකයෙකු ද වන කුමාර් ද සිල්වාගෙන් කළ විමසීමේදී එම පුවත සාවද්‍ය බවත් ඇය සුවෙන් සිටින බවත් සදහන් කලේය. එමෙන්ම ඇය සම්බන්ධයෙන් ඔහුගේ Facebook ගිණුමේද සටහනක් තබා තිබුණි.

https://www.facebook.com/share/p/17MbCGUztX/

එසේම ඇය සුවෙන් සිටින බවට ලබාගත් වීඩියෝපටයක් ද සමාජ මාධ්‍ය ඔස්සේ මුදාහැර තිබුණි.
https://www.facebook.com/share/v/1Cmttx9kzE/

එමෙන්ම මෙවැනිම පළකිරිම් මීට පෙරදීද සිදුකර ඇති බවත් එවැනි අවස්ථාවන් වලද මෙවැනිම වූ නිවැරදිකිරීම් පළකර ඇති බවත් සමාජ මාධ්‍ය ඔස්සේ විමර්ෂණය කිරීමේදී අනාවරණය විය.

මේ අනුව මෙරට ජ්‍යෙෂ්ඨ රංගන ශිල්පිනී අයිරාංගනී සේරසිංහ මහත්මිය මියගොස් ඇති බවට සමාජ මාධ්‍ය ඔස්සේ සංසරණය වන පුවත් සාවද්‍ය බවත් ඇය නිරෝගී සුවයෙන් පසුවන බවත් FactSeeker තහවුරු කරයි.