මිද්දෙණිය ප්‍රදේශයේ පස් හැවිරිදි දරුවෙකු රඹුටන් ඇටයක් සිරවීම හේතුවෙන් මරණයට පත් වූ බව කියන ඛේදජනක පුවතක් ඊයේ (08) සමාජ මාධ්‍ය ඔස්සේ සංසරණය විය. නිවසේදී රඹුටන් කමින් සිටියදී එහි ඇටයක් උගුරේ සිරවීම හේතුවෙන් මෙම මරණය සිදුවී ඇති බව එහි දක්වා තිබුණි. එමෙන්ම මෙම දරුවාගේ මරණය සම්බන්ධයෙන් ප්‍රධාන ධාරාවේ මාධ්‍යයන් හරහා ද විකාශය කර තිබුණි.

නමුත් අද (09) උදෑසන වන විට එම ප්‍රවෘත්තිය සමාජ මාධ්‍ය හරහා හුවමාරු වූයේ එම දරුවා මියගොස් ඇත්තේ රඹුටන් ඇටයක් සිරවීමෙන් නොව හදිසි හෘදයාබාධයක් ඇතිවීමෙන් බව ය.

මෙම පළකිරීම්හි ඇති පරස්පරතාවන් හේතුවෙන් FactSeeker එහි සත්‍ය අසත්‍යතාවය පිළිබඳ සොයා බැලීය.

ඒ අනුව මෙම මරණය සම්බන්ධයෙන් විමර්ශන කටයුතු කෙරෙන මිද්දෙණිය පොලිස් ස්ථානයෙන් අපි මේ පිළිබඳ කරුණු විමසුවෙමු. එහිදී මිද්දෙණිය පොලීසිය සඳහන් කළේ, හෘදයාබාධයකට සමාන හඳුනා නොගත් රෝගයක් හේතුවෙන් මෙම මරණය සිදුවී ඇති බවට අධිකරණ වෛද්‍යවරයා විවෘත තීන්දුවක් ලබා දී ඇති බවයි. දරුවා රෝහල් ගත කිරීමෙන් පසුව මිය ගිය බව රෝහලෙන් පොලීසියට දැනුම් දුන් බව ද ඔවුහු අනාවරණය කළහ. එමෙන්ම රඹුටන් ඇටයක් සිරවීමෙන් මෙම මරණය සිදු වූ බවට රෝහලෙන් දුන් ප්‍රකාශයේ සඳහන් කර නැති බවද ඔවුහු පැවසූහ.

එමෙන්ම දරුවා රෝහල්ගත කරන අවස්ථාවේ ඔහුගේ භාරකරුවන් විසින් දරුවා අසනීප වන අවස්ථාවේදී රඹුටන් ආහාරයට ගනිමින් සිටියේ යැයි වෛද්‍යවරුන්ට පවසා ඇති බව මිද්දෙණිය පොලිස් ස්ථානයෙන් වැඩිදුරටත් සඳහන් කළේය.

ඇතැම් පෝස්ටුවල එම දරුවාගේ පියා ද ඒ අයුරින්ම මියගිය බව දක්වා තිබූ අතර පොලිස් ස්ථානයෙන් ඒ පිළිබඳ විමසීමේදී පවසා සිටියේ පියා මීට වසර 3කට පෙරදී මියගොස් ඇති බවයි.

මෙම තොරතුරු අනුව මිද්දෙණිය ප්‍රදේශයේ මිය ගිය මෙම පස් හැවිරිදි දරුවා මිය ගියේ, රඹුටන් ඇටයක් සිරවීමෙන් නොවන බවත්, හඳුනා නොගත් රෝගයක් හේතුවෙන් මෙම මරණය සිදුවී ඇති බවත් FactSeeker තහවුරු කරගන්නා ලදී.