“මාලනී ළඟ අඩපු අය නේද මේ. අලු වෙන්නත් කලින් අමතක වුණා, සුමානෙකට කලින්” යනුවෙන් එම වීඩියෝවේ සටහනක් ද තිබෙනු දක්නට ලැබිණි.

මේ අතර එම වීඩියෝව තවත් අය විසින් හුවමාරු කර ගෙන තිබූ අතර බොහෝ දෙනෙක් ඒ සඳහා අදහස් පළ කර තිබිණි. ඇතැමුන් මෙය පැරණි වීඩියෝවක් බව දක්වා තිබුණි.

සැබවින්ම මෙය මාලිනී ෆොන්සේකාගේ අවමංගල්‍ය උත්සවයෙන් පසු පැවැති සාදයක් ද? යන්න පිළිබඳව factseeker කරුණු පරීක්ෂා කළේ ය.
සමාජ මාධ්‍ය හරහා මේ සම්බන්ධයෙන් දක්වා තිබූ අදහස් අතර දෙරණ නාලිකාවේ විකාශය වූ ” සිකුරු ඇවිත් ” ටෙලිනාට්‍යයට රංගනයෙන් දායක වූ රංගන ශිල්පීන් සඳහා එහි නිෂ්පාදකවරයා විසින් සංවිධානය කළ සාදයක් බව සඳහන් කොට තිබුණි. එම ප්‍රකාශය උපුටා දක්වා තිබුණේ ජනප්‍රිය රංගන ශිල්පිනි නිල්මිණි තෙන්නකෝන් විසින් සිදුකරනු ලැබූවක් ලෙසටය.

පසුව අප නිල්මිණි තෙන්නකෝන් රංගන ශිල්පිනියගේ සමාජ මාධ්‍ය ගිණුම් පිරික්සීමේදී මේ හා සම්බන්ධ වීඩියෝවක් සොයා ගැනීමට හැකිවිය. එහි සංසරණය වන වීඩියෝවේ සිටි පුද්ගලයන් සහ ස්ථානය සමාන බව පෙනී ගියේය.

නිල්මිණි තෙන්නකෝන් එය මැයි මස 12 වනදා උඩුගත කොට තිබූ අතර එදිනම ඇය “සිත නිදි නෑ” සහ “සිකුරු ඇවිත්” ටෙලිනාට්‍ය වල රංගන ශිල්පීන් හා එක්ව දන්සැලක් සංවිධානය කර ඇති අයුරු ද උඩුගත කොට තිබුණි.

ඒ අනුව අදාල වීඩියෝව ජනප්‍රිය රංගන ශිල්පිනී මාලිනී ෆොන්සේකාගේ අවමංගල්‍යයට සහභාගිවීමෙන් අනතුරුව පැවැති සාදයක් නොවන බවත් එය මැයි 12 වෙනිදා පැවැති දන්සැලකින් පසු රංගන ශිල්පීන් පැවැත්වූ සාදයක අවස්ථාවක් බව Factseeker තහවුරු කරයි.