කොවිඩ් නව දරුණු ප්‍රභේදයක් වාර්තා වී නෑ
කොවිඩ් 19 වෛරසයේ JN.1 ලෙස නම් කළ ප්‍රභේදයක් දකුණු ආසියාතික රටවල ව්‍යාප්ත වෙමින් පවතින බව මේ දිනවල විවිධ මාධ්‍යයන් ඔස්සේ ප්‍රචාරණය වෙමින් පවතී. කෙසේ වෙතත් මෙරට සෞඛ්‍ය බලධාරීන් මේ සම්බන්ධයෙන් කිසිදු නිල නිවේදනයක් මේ වන තෙක් නිකුත් කර නොමැත.
by Anonymous |
මැයි 21, 2025
මේ සම්බන්ධයෙන් දේශීය මෙන්ම විදේශීය මාධ්‍යයන් වලද තොරතුරු අනාවරණය කර තිබුණි.
මෙම වෛරසය ශ්‍රී ලංකාවේද පැතිර තිබෙන බව සමාජ මාධ්‍ය හරහා ප්‍රචාරය වෙමින් පවතින බව Factseeker ට නිරීක්ෂණය විය.
මේ නිසා ශ්‍රී ලංකාවට එවැනි වසංගත අවදානමක් පවතින්නේ ද? යන්න පිළිබඳව Factseeker සොයා බැලීය.
මේ සම්බන්ධයෙන් සෞඛ්‍ය ප්‍රවර්ධන කාර්යාංශයේ අධ්‍යක්ෂ ජෙනරාල් විශේෂඥ වෛද්‍ය රංජිත් බටුවන්තුඩාවගෙන් කළ විමසීමේදී ඔහු ප්‍රකාශ කළේ, මේ දිනවල ඩෙංගු, චිකුන්ගුන්යා, ඉන්ෆ්ලුවන්සා සහ කොවිඩ් යන රෝග අඩු වැඩි වශයෙන් පවතින බවය.
කෙසේ වෙතත් වසංගත තත්ත්වයක පැවතුන රෝගයක් නැවත “නව රෝගයක්” නොවන බව සඳහන් කළ විශේෂඥ වෛද්‍යවරයා කොවිඩ් සමයේ අවසාන වශයෙන් හඳුනාගත් ප්‍රභේදය තවමත් පවතින බවත් ඔහු වැඩිදුරටත් සඳහන් කළේය.
සමාජ මාධ්‍ය පෝස්ටු වල සඳහන් ආකාරයේ නව වෛරසයක් පිළිබඳව අප විමසූ අතර ඒ සම්බන්ධයෙන් වාර්තා වී නැති බව බටුවන්තුඩාව මහතා වැඩිදුරටත් පැවසීය.
ශ්‍රී ලංකාවේ දරුණු කොවිඩ් වෛරසයක් ඇති බව දක්වමින් සංසරණය වන මෙම පෝස්ටුවේ දිගුව හරහා සොයා බැලීමේදී එහි අන්තර්ගතය තුළ ඇතුළත් වන්නේ Dr. Ritesh Kumar යන අයෙකු විසින් දක්වන ලද ප්‍රකාශයක් බව අපට නිරීක්ෂණය විය.
එම ප්‍රකාශය පිළිබඳව විමර්ශනය කිරීමේදී එය Dr.Ritesh kumar, Pulmonologist යන ෆේස්බුක් ගිණුම හරහා 2021.03.30 පළකර ඇති බව අනාවරණය විය.
එසේම ඊට ආසන්න කාලයේදී එම පණිවිඩය බෙදාහරිනු ලැබූ වෙනත් පෝස්ටුද සොයා ගැනීමට හැකි විය. ශ්‍රී ලංකාවේ සිංහල බසින් සංසරණය වන්නේ මෙම පණිවිඩයේ සිංහල පරිවර්තනයකි.
ඒ අනුව මෙම පණිවිඩය මෑත දිනකදී පළ කරන ලද්දක් නොවන බව පැහැදිලි විය.
මේ සම්බන්ධයෙන් වසංගත රෝග විද්‍යා අංශයෙන් FactSeeker කළ විමසීමේදී හෙළි වූයේ දැනට ශ්‍රී ලංකාවේ එවැනි නව ප්‍රභේදයක් හඳුනාගෙන නොමැති බවයි.
ඒ අනුව දරුණු කොවිඩ් වෛරසයක් ශ්‍රී ලංකාවේ යනුවෙන් සංසරණය වන පෝස්ටුවල කිසිදු සත්‍යතාවක් නොමැති බවත් එහි අන්තර්ගතයේ ඇතුළත් තොරතුරු ද පැරණි ඒවා බවත් FactSeeker විසින් තහවුරු කරගන්නා ලදී.
