ශුද්ධෝත්තම ෆ්‍රැන්සිස් පාප් වහන්සේ අභාවප්‍රාප්ත වී ඇති බව වන පුවතක්  සමාජ මාධ්‍යවල හුවමාරු වන බව FactSeeker නිරීක්ෂණය කළේ ය.

පාප්වහන්සේට බ්‍රොන්කයිටීස් රෝගතත්වය ඇති විමත් සමඟ උන්වහන්සේගේ සෞඛ්‍ය තත්වය අයහපත් අතට හැරී ඇති බව මීට දින කිහිපයකට පෙර ජාත්‍යන්තර මාධ්‍ය වාර්තා කළේය.  නමුත් සමාජ මාධ්‍ය ඔස්සේ උන්වහන්සේගේ මරණය පිළිබඳ පුවත් පැතිරීමත් සමඟ FactSeeker ඊට අදාළ කරුණු සොයා බැලීය.

මේ අනුව කරන ලද කරුණු විමර්ශනයේදී උන්වහන්සේගේ  අභාවය පිළිබඳ නිල පුවත් කිසිවක් පිළිගත හැකි මාධ්‍ය ඔස්සේ පළ වී නොමැති බව තහවුරු කර ගැනීමට හැකි විය. ඇතැම් ජාත්‍යන්තර මාධ්‍ය විසින්  අද (24) දිනයේ  පළ කරන ලද ප්‍රවෘත්ති වාර්තාවල “ඔහු ද්විත්ව නියුමෝනියාව සමඟ පොරබදමින් සිටින” බවත් “දැඩි සත්කාර ඒකකයේ” සිටින බවත් සඳහන් කර තිබිණි.

ඒ සම්බන්ධ පළ කිරීම් කිහිපයක් මෙතැනින්:

https://www.geo.tv/latest/592245-pope-francis-in-critical-condition-and-faces-minor-kidney-issue-vatican

https://newscentral.africa/pope-francis-remains-in-hospital-as-health-concerns-grow/

තවද මේ පිළිබඳව සොයා බැලීමේදී නයිජීරියාවේ ප්‍රවෘත්ති වෙබ් අඩවියක් වන “The Nigerian Voice” ප්‍රවෘත්ති වෙබ් අඩවිය විසින් පළ කරන ලද කරුණු පරීක්ෂා කිරීමේ ලිපියක් නිරීක්ෂණය කිරීමට FactSeeker ට හැකි විය.  එම ලිපියේ ෆ්‍රැන්සිස් පාප්වහන්සේගේ අභාවය සම්බන්ධයෙන් හුවමාරු වූ පුවත අසත්‍ය බවත්, vatican news X වෙබ් අඩවියේ හුවමාරු වූ ඡායාරූපය විකෘති ඡායාරූපයක් බවත් සටහන් කර තිබුණි.

එම පළ කිරීම මෙතැනින්:

https://www.thenigerianvoice.com/news/347245/fact-check-pope-francis-not-dead-statement-announcing-his.html

මේ අනුව, ශුද්ධෝත්තම ෆ්‍රැන්සිස් පාප් වහන්සේ අපවත් වූ බවට සමාජ මාධ්‍යවල හුවමාරු වූ පුවත අසත්‍ය බව FactSeeker තහවුරු කරයි.