මෙහි සත්‍යාසත්‍යතාව පරීක්ෂා කිරීමට FactSeeker කටයුතු කළේය.

අදාළ පළ කිරීම්වල සඳහන් වූ පුවත පහතින්.

“බලශක්ති අමාත්‍ය කුමාර ජයකොඩි මහතා ඉංජිනේරුවෙකු යයි ව්‍යාජ ලෙස පෙනී සිටින බවට සමාජ මාධ්‍යවල එල්ල වන චෝදනා කිසිදු සත්‍යතාවක් නැතැයි හිටපු මැතිවරණ කොමසාරිස් මහින්ද දේශප්‍රිය මහතා පවසයි.
ඔහු පෙන්වා දෙන්නේ, කුමාර ජයකොඩි මහතා පාර්ලිමේන්තුවට දුන් තොරතුරුවල සඳහන් වන්නේ, තමන් ඉංජිනේරු උපාධි අපේක්ෂකයකු (engineering undergraduate) ලෙස බවය.
ඒ අනුව ඇමතිවරයා අසත්‍යයක් ප්‍රකාශ කළ බවට චෝදනා කිරීම නිවැරදි නොවන බව ද හිටපු මැතිවරණ කොමසාරිස්වරයා පැවසුවේ, ගුවන්විදුලි නාලිකාවක් සමග සාකච්ඡාවකට සහභාගී වෙමින් යැයි සමාජ මාධ්‍ය ජාලවල පළ වූ පුවත්වල සඳහන් වේ”.

එම පුවත්වලට අදාළ සබැඳි පහතින්.

https://janahanda.site/#/news/9

https://sinhala-themorningtelegraph.com/?p=4617

https://newsweb.lk/archives/34102

මේ පිළිබඳව කරුණු විමර්ශනය කිරීමේදී FactSeeker මහින්ද දේශප්‍රිය සහභාගී වූ මෑතකාලීන ගුවන්විදුලි සාකච්ඡා පිළිබඳව අවධානය යොමු කළෙමු.

නෙත් FM නාලිකාවේ 2024 දෙසැම්බර් 06 දා ප්‍රචාරය වූ ̒ බැලුම්ගල̕ වැඩසටහන සමග දුරකතන සම්මුඛ සාකච්ඡාවකදී ඔහු එක්තරා අමාත්‍යවරයෙකු පිළිබඳව අදහස් පළ කරන අවස්ථාවක් අපට හමු විය.

https://youtu.be/Sj-8cwmNr-o?t=394

එහිදී ඔහු සඳහන් කරන්නේ, එක් අමාත්‍යවරයෙකු ඉංජිනේරුවෙකු යයි කීවද ඔහු ඉංජිනේරුවෙකු නොවන බවට චෝදනා එල්ල වන බවයි. එහෙත් පාර්ලිමේන්තුවේ ඔහුගේ තොරතුරු ඇතුළත් වන්නේ ඉංජිනේරු උපාධි අපේක්ෂකයෙකු ලෙස බව මහින්ද දේශප්‍රිය එම වැඩසටහනේදී පෙන්වා දෙයි.

ඔහු එම ප්‍රකාශයේ කිසිදු අවස්ථාවක බලශක්ති අමාත්‍ය කුමාර ජයකොඩිගේ නම සඳහන් නොකරයි.

ඔහුගේ ප්‍රකාශය කුමාර ජයකොඩි පිළිබඳව ද යන්න සොයා බැලීම සඳහා අප පාර්ලිමේන්තු වෙබ් අඩවියේ මන්ත්‍රීවරුන්ගේ නාමාවලියේ කුමාර ජයකොඩිගේ තොරතුරු පරීක්ෂා කළ ද එහි ඔහුගේ අධ්‍යාපනික සුදුසුකම් පිළිබඳව කිසිවක් සඳහන් නොවුණි. ඔහුගේ වෘත්තිය ලෙස ඉංජිනේරු ලෙස ඇතුළත් කර තිබිණි.

ඉන් අනතුරුව අප මේ පිළිබඳව මැතිවරණ කොමිෂන් සභාවේ හිටපු සභාපති මහින්ද දේශප්‍රියගෙන් විමසූ අතර ඔහු බලශක්ති අමාත්‍ය කුමාර ජයකොඩි සම්බන්ධයෙන් ඉහත පෝස්ටුවල දක්වා ඇති අන්දමේ කිසිදු ප්‍රකාශයක් කර නොමැති බව ප්‍රකාශ කළේය.

ඒ අනුව, බලශක්ති අමාත්‍ය පුණ්‍ය ශ්‍රී කුමාර ජයකොඩි ඉංජිනේරු උපාධි අපේක්ෂකයෙකු බවට මැතිවරණ කොමිෂන් සභාවේ හිටපු සභාපති මහින්ද දේශප්‍රිය විසින් සිදු කළ ප්‍රකාශයක් ලෙස දැක්වෙන සමාජ මාධ්‍ය පළකිරීම් අසත්‍ය බව FactSeeker තහවුරු කරයි.