ජාත්‍යන්තර මුල්‍ය අරමුදලේ ඉහළ පෙළේ නියෝජිතයන් හා නව රජය විසින් ජාත්‍ය්තර මූල්‍ය අරමුදලේ සාකච්ඡා සඳහා පත් කර ඇති ආර්ථික නියෝජිත කණ්ඩායම අතර ආර්ථික ප්‍රතිසංස්කරණ පිළිබඳ සාකච්ඡාවක් ජනාධිපති කාර්යාලයේ දී පෙරේදා (02) පවත්වා ඇත.

ජනාධිපති මාධ්‍ය අංශය පළ කර තිබූ පුවත:
https://rb.gy/u4nv1x
ඉන් අනතුරුව ජාත්‍යන්තර මුල්‍ය අරමුදලේ ආසියා පැසිෆික් දෙපාර්තමේන්තුවේ අධ්‍යක්ෂ ක්‍රිෂ්ණ ශ්‍රී නිවාසන් (Krishna Srinivasan), ජ්‍යේෂ්ඨ දූත මණ්ඩල ප්‍රධානී ආචාර්ය පීටර් බෲවර් (Dr. Peter Breuer) සහ ජනාධිපති අනුර කුමාර දිසානායක අතර හමුවක් ජනාධිපති කාර්යාලයේ දී ඊයේ (03) පැවැත්විණි.

එය ජනාධිපති මාධ්‍ය අංශය නිවේදනය කර තිබුණේ මෙලෙසිනි:
https://rb.gy/ml1ez8

IMF නියෝජිතයින් සමග හමුවට ජනාධිපති අනුර කුමාර දිසානායක සහභාගී නොවූ බව සඳහන් පෝස්ටුවලට යොදාගෙන ඇති ඡායාරූපය ජාතික ජන බලවේගයේ ජාතික විධායක සභික සුනිල් හඳුන්නෙත්ති ජාත්‍යන්තර මූල්‍ය අරමුදලේ ඉහළ පෙ‌ළේ නියෝජිතයින් සමග ඔක්තෝබර් 02 වැනි දින පැවැති සාකච්ඡාවකදී ගත් ඡායාරූපයකි.

එහිදී දෙපාර්ශවය විසින් ශ්‍රී ලංකා රජය අතර ආර්ථික ප්‍රතිසංස්කරණ පිළිබඳව සාකච්ඡා කළ බව සුනිල් හඳුන්නෙත්ති විසින් සිය නිල ෆේස්බුක් පිටුවේ ඡායාරූපයක් ද සමග පළ කර ඇත. මෙසේ හුවමාරු වන්නේ එම ඡායාරූපයයි.
එහි සබැඳිය පහතින්:
https://www.facebook.com/share/p/N866BirV8ai4Fiiy/

ඔක්තෝබර් මස 02 වන දින පැවති ජාත්‍යන්තර මූල්‍ය අරමුදලේ ඉහළ පෙළේ නියෝජිතයන් හා ශ්‍රී ලංකා රජය අතර පැවැති සාකච්ඡාවට ශ්‍රී ලංකා රජය නියෝජනය කරමින් සහභාගී වී ඇත්තේ, නව රජය විසින් IMF සාකච්ඡා සඳහා පත් කර ඇති ආර්ථික කණ්ඩායමයි.

කෙසේ වෙතත්, පසුදින (03) ජනාධිපති අනුර කුමාර දිසානායක හා ජාත්‍යන්තර මුල්‍ය අරමුදලේ නියෝජිතයන් අතර හමුවක් පවත්වා ඇති අතර එහිදී ජාත්‍යන්තර මූල්‍ය අරමුදල සහ ශ්‍රී ලංකාව අතර මේ වන විට ක්‍රියාත්මක වැඩසටහනේ ප්‍රගතිය පිළිබඳව සමාලෝචනයට ලක් කර තිබේ.
ජනාධිපති අනුර කුමාර දිසානායක සහ ජාත්‍යන්තර මුල්‍ය අරමුදල අතර විශේෂ සාකච්ඡාවක් අද (04) දෙවන දිනටද පැවැත්විණි.

ඒ අනුව, IMF නියෝජිතයින්, ජනාධිපති අනුර කුමාර දිසානායක හමු නොවූ බවට හෝ සාකච්ඡා මගහැර ගිය බව දැක්වෙන පෝස්ටු සාවද්‍ය බව FactSeeker තහවුරු කරයි.