TEMU நிறுவனம் சட்டவிரோத இறக்குமதி செய்ததன் காரணமாக முடக்கப்படவுள்ளதாகவும் அதனால் அந் நிறுவனத்தின் மின்சாதனப் பொருட்கள் இலவசமாக பொதுமக்களுக்கு வழங்கப்படுவதாகவும் பதிவொன்று சமூகவலைதளங்களில் பகிரப்படுவதை FactSeeker இனால் அவதானிக்க முடிந்தது.

மேலும், TEMU நிறுவனத்தின் உத்தியோகபூர்வ இணையதள கருத்துக் கணிப்பு விண்ணப்பத்தை பூர்த்தி செய்தால் இந்த பொருட்களை பெற்றுக்கொள்ளலாம் என்று அதற்கான இணைப்பு பதிவில் இணைக்கப்பட்டிருந்தமையையும் அவதானிக்க முடிந்தது.

2022 ஆம் ஆண்டு தொடங்கிய TEMU நிகழ்நிலை வணிக தளம், சீன விற்பனையாளர்களிடமிருந்து நேரடியாக பெறப்படும் பல்வேறு உற்பத்திப் பொருட்களை வழங்கும் PDD holdings எனும் நிறுவனத்திற்குச் சொந்தமானதாகும். இந்த தளம் மின்சாதனப் பொருட்கள், ஃபேஷன், வீட்டு உபயோகப் பொருட்கள், அழகு சாதனங்கள் உள்ளிட்ட பல பிரிவுகளுக்கு உட்பட்ட பொருட்களை விற்பனை செய்கிறது.

இந்நிலையில் TEMU இவ்வாறொரு சட்டப் பிரச்சனையை எதிர்கொண்டுள்ளதாக தகவல்கள் வெளியாகியுள்ளதா என ஆராய்ந்ததில், இது தொடர்பான எந்தவொரு நம்பகமான தகவல்களும் கிடைக்கவில்லை.

மேலும், இப் பதிவில் வழங்கப்பட்ட இணையத்தள இணைப்பு உண்மையானதா என URLVoid மற்றும் Easy Demark போன்ற கருவிகளைப் பயன்படுத்தி ஆராய்ந்த போது, அது ஒரு போலியான இணைப்பு என்பதை உறுதிப்படுத்த முடிந்தது.

ஆகவே, TEMU நிறுவனத்தின் மின்சாதனப் பொருட்கள் இலவசமாக பொதுமக்களுக்கு வழங்கப்படுவதாக சமூகவலைதளங்களில் பகிரப்படும் பதிவு போலியானது என்பதை FactSeeker உறுதிப்படுத்துகின்றது.