முதியவர் ஒருவர் தனது 259 வது பிறந்த நாளை கொண்டாடுவது போன்ற புகைப்படம் ஒன்று சமூகவலைதளங்களில் பகிரப்படுவதை FactSeeker இனால் அவதானிக்க முடிந்தது. “பிறந்தநாள் வாழ்த்துக்கள் தாத்தா” “பாசாங்கு செய்யாமல் அவருக்கு நல்வாழ்த்துக்கள் தெரிவிப்போம்” போன்ற பதிவுகளுடனேயே அப் புகைப்படம் பகிரப்பட்டு வருகின்றது.

இப் புகைப்படத்தை அவதானித்ததில் இது ஒரு நகைச்சுவைக்காக உருவாக்கப்பட்ட படமாக இருந்தாலும் சில பயனர்கள் இதை உண்மை நிகழ்வாக நம்பி, தமது கருத்துக்களை பதிவிட்டு வருவதால் FactSeeker இது குறித்து ஆராய்ந்தது.

புகைப்படத்தில் காணப்பட்ட சில தெளிவற்ற அம்சங்களின் அடிப்படையில் மேற்கொண்ட ஆய்வில், இது செயற்கை நுண்ணறிவு (AI) தொழில்நுட்பத்தின் மூலம் உருவாக்கப்பட்ட புகைப்படம் என்பதை உறுதிப்படுத்த முடிந்தது.

இதனைத் தொடர்ந்து, உலகில் உயிருடன் உள்ள வயதான நபர்கள் தொடர்பில் ஆராய்ந்ததில், CNN இணையதளத்தில் 2025 மே மாதம் வெளியான செய்தியின் படி, தற்போது உலகில் உயிருடன் இருக்கும் வயதான நபர் பிரித்தானியாவை சேர்ந்த எதெல் கட்டர்ஹாம் (Ethel Caterham) ஆவார். அவருக்கு 115 வயதும் 252 நாட்களும் ஆகியுள்ளன. மேலும், 1913க்கு முன்னால் பிறந்த இறுதி பிரித்தானியர் இவர் என்றும் அச் செய்தியில் குறிப்பிடப்பட்டுள்ளது.

BBC-யின் “Science Focus” சஞ்சிகையில் வெளியிடப்பட்ட தகவலின்படி, 2024 டிசம்பர் மாத நிலவரப்படி, உயிருடன் உள்ள உலகின் மிக வயதான நபர் ஜப்பான் நாட்டைச் சேர்ந்த டொமிகோ இடோக்கா (Tomiko Itooka) ஆவார். அவருக்கு அந்த நேரத்தில் 116 வயதாக இருந்ததாகவும், இது மனிதர்களின் சராசரி ஆயுள் எதிர்பார்ப்பை விட குறிப்பிடத்தக்க அளவிற்கு அதிகம் எனவும் அத் தகவலில் குறிப்பிடப்பட்டுள்ளது.

https://www.sciencefocus.com/the-human-body/oldest-person-in-the-world

இதேபோல், உலகில் இதுவரை பதிவாகிய மிகவும் வயதான நபராக பிரான்சைச் சேர்ந்த ஜீன் லூயிஸ் கல்மெண்ட் (Jeanne Louise Calment) எனும் பெண் குறிப்பிடப்படுகிறார். இவர் 1875 பிப்ரவரி 21ஆம் தேதி பிறந்தவராகும். தனது வாழ்க்கையில் 122 வருடங்கள் மற்றும் 164 நாட்கள் உயிர் வாழ்ந்த இவர், 1997 ஆகஸ்ட் 4 ஆம் திகதி மரணமடைந்தார்.

ஆகவே, முதியவர் ஒருவர் தனது 259வது பிறந்த நாளைக் கொண்டாடுவதை போல சமூக வலைதளங்களில் பகிரப்படும் அந்த புகைப்படம், செயற்கை நுண்ணறிவைப் பயன்படுத்தி உருவாக்கப்பட்ட புகைப்படம் என்பதை FactSeeker உறுதிப்படுத்துகிறது. மேலும், உலகில் இதுவரை பதிவாகிய மிகவும் வயதான நபர் 122வது வயதில் மரணமடைந்தவர் என்பதையும் இது மூலம் தெளிவுபடுத்தப்படுகிறது.