விலங்குகள் பூங்காவொன்றில் சுற்றுலா பயணிகளின் வாகனங்களுக்கு குறுக்கே கருஞ்சிறுத்தையொன்று செல்வது போன்ற காணொளியொன்று சமூக வலைதளங்களில் பகிரப்படுவதை FactSeeker இனால் அவதானிக்க முடிந்தது.

அக் காணொளிக்கு பலர் இது உண்மை என்ற கருத்துகள் பதிவிடுவதோடு, சிலர் இக் காணொளி செயற்கை நுண்ணறிவை (AI) பயன்படுத்தி உருவாக்கப்பட்டிருக்கலாம் எனவும் கருத்துக்களை பதிவிட்டுள்ளனர்.

எனவே, இதன் உண்மை தன்மை குறித்து FactSeeker ஆராய்ந்தது.

இக் காணொளியை Deepware இணையதளத்தின் மூலம் ஆராய்ந்ததில், இது செயற்கை நுண்ணறிவை பயன்படுத்தி உருவாக்கப்பட்டிருக்கக் கூடிய சாத்தியம் இருப்பதை அறிய முடிந்தது முடிந்தது.

மேலும், சமூக வலைதளங்களில் அதிகம் பகிரப்படும் இக் காணொளியை Google Reverse Image Search மூலம் ஆராய்ந்தபோது, இந்தக் காணொளிக்கு ஒத்த புகைப்படமொன்றை கண்டறிய முடிந்தது.

யால தேசிய பூங்காவில் சுற்றுலாப் பயணிகள் அதிகரித்தமை தொடர்பாக 2024.12.13 அன்று Daily Mirror இணையத்தளத்தில் வெளியான செய்தியில் அந்தப் புகைப்படம் பயன்படுத்தப்பட்டிருந்தது.

அப் புகைப்படத்தில் காணப்படும் சூழலியல் அம்சங்கள் மற்றும் வாகனங்கள் அனைத்தும் காணொளியிலும் காணப்படுகின்றன. ஆனால், அந்த புகைப்படத்தில் கருஞ்சிறுத்தை அல்ல, இலங்கையில் காணப்படும் சாதாரண சிறுத்தையே வாகனங்களுக்கு குறுக்கே செல்வது போன்று காணப்படுகிறது.

ஆகவே, குறித்த புகைப்படத்தை பயன்படுத்தி, செயற்கை நுண்ணறிவினால் (AI) இக் காணொளி திரிபுபடுதப்பட்டுள்ளது என்பதை FactSeeker உறுதிப்படுத்துகிறது.