மக்களை நகைக்கவைக்கும் உலகப்புகழ் பெற்ற பிரித்தானிய நகைச்சுவை நடிகர் மிஸ்டர் பீன் (Mr. Bean) என அழைக்கப்படுகின்ற ரோவன் அட்கின்சன் (Rowan Atkinson), உயிரிழந்ததாகவும்,அவரது இறுதிக்கிரிகைகள் நடைபெறுவதாகவும் கூறும் காணொளி ஒன்று சமூக வலைதளங்களில் பகிரப்படுவதை FactSeeker இனால் அவதானிக்க முடிந்தது.

“சிரிப்பவன் மனிதன், சிரிக்கவைப்பவன் மாமனிதன் – இன்று மண்ணோடு Mr. Bean” எனும் பதிவுடன் அக் காணொளியை பலர் தங்களின் இரங்கலுடன் பகிர்ந்து வருகின்றனர்.

இதையடுத்து, இத் தகவலின் உண்மை தன்மை குறித்து FactSeeker ஆராய்ந்தது.

இது தொடர்பாக FactSeeker ஆராய்ந்த போது, Rowan Atkinson உயிரிழந்ததாக எந்தவொரு ஊடகங்களாலும் உத்தியோகப்பூர்வமாக செய்திகள் வெளியிடப்பட்டிருக்கவில்லை. மேலும், Mr. Bean பெயரில் இயங்கும் உத்தியோகப்பூர்வ சமூக வலைதள பக்கங்களிலும் இந்த செய்தி தொடர்பான எந்தவொரு பதிவும் காணப்படவில்லை.

அத்துடன், அவரது இறுதிக்கிரிகைகள் நடைபெறுவதாக பகிரப்படும் அக் காணொளியை Google Lens மூலம் ஆராய்ந்ததில், அக் காணொளி 2017 ஆம் ஆண்டு மார்ச் மாதம் வெஸ்ட்மின்ஸ்டர் பயங்கரவாத தாக்குதலில் கொல்லப்பட்ட பொலிஸ் அதிகாரி கீத் பால்மர் (Keith Palmer) அவர்களின் இறுதிக்கிரியையின் காணொளி என்பதை உறுதிப்படுத்த முடிந்தது.

மேலும், ரோவான் அட்கின்சன் தற்போது சினிமா துறையில் செயற்திறனுடன் ஈடுபட்டு வருகிறார் என்பதை அறிய முடிந்தது. Mr. Bean: The Animated Series-இன் நான்காவது பாகம் 2025 மே 1-ஆம் திகதி வெளியாகியுள்ளது. இதில் Mr. Bean கதாப்பாத்திரத்திற்கு ரோவான் அட்கின்சன் குரல் கொடுத்துளார்.

இதனைத் தொடர்ந்து, Man vs Bee தொடரின் தொடர்ச்சியாக Man vs Baby என்ற நகைச்சுவை தொடரில் நடித்து வருகிறார். மேலும், Johnny English திரைப்படத் தொடரின் அடுத்த பாகமான Johnny English 4-இல் அட்கின்சன் மீண்டும் நடிக்கவுள்ளதாக தகவல்கள் கூறுகின்றன, இது 2025-இல் வெளியாகும் என எதிர்பார்க்கப்படுகிறது.

• https://www.thesun.co.uk/tv/32336988/rowan-atkinson-to-reprise-tv-role-in-new-series/?utm_source=chatgpt.com
• https://www.reddit.com/r/JamesBond/comments/1as5s5c/if_rowan_atkinsons_4th_johnny_english_indeed/

ஆகவே, Mr. Bean என அழைக்கப்படுகின்ற ரோவன் அட்கின்சன் (Rowan Atkinson), உயிரிழந்ததாக சமூகவலைதளங்களில் பகிரப்படும் காணொளி தவறானது என்பதை FactSeeker உறுதிப்படுத்துகிறது.